မိူဝ်ႈၼႆႉ ဝၼ်းတီႈ 1/2/2022 ယၢမ်းၵၢင်ဝၼ်း မွၵ်ႈ 12 မူင်းၶိုင်ႈ မၢၵ်ႇတႅၵ်ႇၼႂ်းပၢင်ၵမ်ႉထႅမ် တပ်ႉသိုၵ်းမၢၼ်ႈ တီႈၵၢင်ပၢင်ႇ သျၢၼ်းယူဝ်းမ (ရှမ်းရိုးမကွင်း) ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႂ်းပၢင်ၼၼ်ႉ မီးၵူၼ်းလူႉတၢႆၸွမ်း 2 ၵေႃႉ၊ မၢတ်ႇၸဵပ်း 30 ပၢႆ ။
ၵူၼ်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ မၢၵ်ႇတႅၵ်ႇၼႂ်းပၢင်ၵမ်ႉထႅမ်သိုၵ်းမၢၼ်ႈတီႈတႃႈၶီႈလဵၵ်းၼၼ်ႉ မၢတ်ႇၸဵပ်း 30 ပၢႆ။ လူႉတၢႆ 2 ၵေႃႉ။ ၼႂ်းၵူၼ်းမၢတ်ႇၸဵပ်းၼၼ်ႉ ပႃးၵူၼ်းသိုၵ်းမၢၼ်ႈ။ ၵူၼ်းမၢတ်ႇၸဵပ်းလူႉတၢႆ ၸိူဝ်းၼၼ်ႉတႄႉ ယူႇ တီႈၸုမ်းပရႁိတ မႃးတေႃႉဢဝ်ၵႂႃႇႁူင်းယႃယဝ်ႉ”- ဝႃႈၼႆ။
ၼႂ်းပၢင်ၵမ်ႉထႅမ် တပ်ႉသိုၵ်းမၢၼ်ႈ တီႈၸႄႈဝဵင်းတႃႈၶီႈလဵၵ်းၼႆႉ ပဵၼ်လုၵ်ႈမေးသိုၵ်းမၢၼ်ႈ၊ ၵူၼ်းသိုၵ်းၵဝ်ႇ လႄႈ ပီႈၼွင်ႉၸၢဝ်း လႃးႁူႇလႄႈ ဢႃးၶႃႇ ၵူၼ်းပိုၼ်ႉတီႈ ။
“ပၢင်ၵမ်ႉထႅမ် တီႈတႃႈၶီႈလဵၵ်းၼႆႉ ႁဵတ်းမိူဝ်ႈဝႃးလႄႈမိူဝ်ႈၼႆႉ။ သိုၵ်းမၢၼ်ႈ ဢဝ်ၸၢဝ်းၶိူဝ်းႁဵတ်းပဵၼ်ၶိူင်ႈမိုဝ်းသေ ၸတ်းႁဵတ်း ပၢင်ၵမ်ႉ ထႅမ်ၶဝ်။ ၼႂ်းဝၼ်းထူၼ်ႈသွင် မိူဝ်ႈၼႆႉၺႃးမၢၵ်ႇထိုမ်ႈပွႆႇ။ ဝၢႆးသေ မၢၵ်ႇတႅၵ်ႇယဝ်ႉၼၼ်ႉ သိုၵ်းမၢၼ်ႈ ၸိူဝ်းဢဝ်ႁူမ်ႇလူမ်ႈ ၸိူဝ်းၼၼ်ႉ လၢမ်းလိမ်းယိုဝ်းၵွင်ႈၵူႈႁူးၵူႈတၢင်းသေ တိူဝ်ႉသႂ်ႇပႃးၵူၼ်းၼႄၵၢင်ၸႂ် ၸိူဝ်းၼၼ်ႉပႃးထႅင်ႈတင်းၼမ်။ တီႉၺွပ်း ၵူၼ်းၼုမ်ႇ ၵႂႃႇမႃး ႁိမ်းႁွမ်းၸိူဝ်းၼၼ်ႉထႅင်ႈတင်းၼမ်”- ၵူၼ်းတီႈတႃႈၶီႈလဵၵ်းလၢတ်ႈ။
မိူဝ်ႈၼႆႉ ဝၼ်းတီႈ 1/2/2022 ၶွပ်ႈတဵမ် 1 ပီ သိုၵ်းမၢၼ်ႈယိုတ်ႈမိူင်းမႃးသေ ဢိင်ၼိူဝ် လွင်ႈၼႆႉ သိုၵ်းမၢၼ်ႈ ဢထမ်ႇမ တဵၵ်းၸႂ်ႉၵူၼ်းမိူင်း မႃးၼႄၾၢင်ႁၢင် လွင်ႈၵမ်ႉထႅမ် ႁၼ်လီတပ်ႉသိုၵ်းမၢၼ်ႈၶဝ် ၼႂ်းၸႄႈဝဵင်းတႃႈၶီႈလဵၵ်း မီးၽူႈၶဝ်ႈႁူမ်ႈ ၼပ်ႉႁူဝ်ပၢၵ်ႇ။ ဢၼ်ၵူၼ်းၼုမ်ႇပတ်းပိုၼ်ႉၸိုင်ႈမိူင်းၽႅၼ်ၵၢၼ်တေႁဵတ်း Silent Strike ၵေႃႈ သိုၵ်းမၢၼ်ႈ ႁိပ်ႈၼႅတ်ႈတဵၵ်းတဵင်ၵူၼ်းမိူင်းၵူႈၸႄႈဝဵင်း ႁႂ်ႈပိုတ်ႇၵၢတ်ႇၶၢႆၶူဝ်းၼႂ်းဝၼ်းတီႈ 1။
 ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႂ်းပၢင်ၼၼ်ႉ မီးၵူၼ်းလူႉတၢႆၸွမ်း 2 ၵေႃႉ၊ မၢတ်ႇၸဵပ်း 30 ပၢႆ ။){kind=link}