ၶွင်ႇသီႇသိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင်/ ၵွင်ႈဢွၼ်ႇၵႂႃႇၵူႈႁူးၵူႈတၢင်းထႅင်ႈ ၼႂ်းဝဵင်းၼမ်ႉၶမ်း ဝႃႈၼႆ။
မိူဝ်ႈဝၼ်းတီႈ 19/1/2022 ယၢမ်းၵၢင်ၶမ်ႈ မွၵ်ႈ 8 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ်ၵွင်ႈလူင်/ ၵွင်ႈဢွၼ်ႇသေ လၢမ်းလိမ်းၵႂႃႇ ၵူႈႁူးၵူႈ တၢင်း ၼႂ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်းပိုၼ်ႉတီႈတူၵ်းၸႂ်ၵၼ် ၼႆယဝ်ႉ။
ၵူၼ်း ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“ ၵမ်းလိုၼ်း မႃးလႆႈႁူႉဝႃႈ ပဵၼ်သိုၵ်းမၢၼ်ႈ လၢမ်းလိမ်းယိုဝ်း ႁဵတ်းၼၼ်ၶႃႈဢေႃႈ။ ၵွပ်ႈသင်လႄႈ ၶဝ်ယိုဝ်း ဢၼ်ဝႃႈၼၼ်ႉ ဢမ်ႇလႆႈႁူႉၶႃႈ။ ဢၼ်ၶဝ်ယိုဝ်း ၼၼ်ႉၵေႃႈ ပဵၼ်တီႈၼႂ်းဝဵင်းၼႆႉၵူၺ်း”- ဝႃႈၼႆ။
ၼွၵ်ႈလိူဝ်ၼၼ်ႉ တီႈလုမ်းၾၢႆႇၶႄၾႆး ပွၵ်ႉ 2 (ပွၵ်ႉၵွင်းၼွင်ၸၢင်ႉ) ၼၼ်ႉၵေႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈ ဢမ်ႇယွမ်း မွၵ်ႈ 3 ၵမ်းၼႆႉ ဝႃႈၼႆ။
မိူဝ်ႈဝၼ်းတီႈ 5 ပူၼ်ႉမႃးၼႆႉ ယွၼ်ႉသိုၵ်းမၢၼ်ႈတင်း သိုၵ်းတဢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ သိုၵ်းမၢၼ်ႈ မႃးပၵ်းတပ်ႉဝႆႉ တီႈလုမ်းၶႄၾႆး ပွၵ်ႉၵွင်းၼွင်ၸၢင်ႉဝႆႉ ႁၢၼ်ႉတေႃႇထိုင် ယၢမ်းလဵဝ် ။
ၼႂ်းဝၼ်းတီႈ 5 ၼၼ်ႉၵူၺ်း ယွၼ်ႉသိုၵ်းမၢၼ်ႈ လၢမ်းလိမ်းပိုတ်းယိုဝ်းၵွင်ႈလူင်သေ မၢၵ်ႇလူင်တႅၵ်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်း ၼႂ်းပိုၼ်ႉတီႈ ၼမ်ႉၶမ်း လႆႈမၢတ်ႇၸဵပ်းၸွမ်း 6 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ 3 ၵေႃႉ ၼႆယဝ်ႉ။