တႆးႁွတ်ႈမိူင်းဢမေရိၵၢၼ်ႇ ႁူမ်ႈငိုၼ်းၵၼ်သေ ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆး – မိူင်းယၢင်းလႅင် ၶူဝ်းၶွင်တႃႇငိုၼ်း 60 သႅၼ်ပျႃး။
ၼႂ်းလိူၼ်ၵျႅၼ်ႊၼိဝ်ႊရီႊ 2022 ၼႆႉ ယူႇတီႈ ၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇ ၸွႆႈၵမ်ႉထႅမ်မႃး တႃႇၵူၼ်းပၢႆႈၽေးသိုၵ်း ၼႂ်းၸႄႈဝဵင်း မိူင်းၵိုင် ၸိုင်ႈတႆးပွတ်းၸၢၼ်းတင်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၊ ၸွႆႈထႅမ်ပႃးထႅင်ႈ တၢင်းၸႄႈမိူင်းယၢင်းလႅင် ႁူမ်ႈငိုၼ်း တင်းမူတ်း 60 သႅၼ်ပျႃး ၼႆယဝ်ႉ။
ၸၢႆးၼေႃႇ ၽူႈတၢင်တူဝ် ၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းၶႃႈ တႆးမိူင်း USA ႁူမ်ႈၵၼ်လူႇတၢၼ်း ငိုၼ်းတွင်း၊ တႃႇၶဝ်ႈ သၢၼ် ၶွင်ၵိၼ်ယႅမ်ႉ ၵူႈမဵဝ်း ၸွႆႈထႅမ်ၵူၼ်းပၢႆႈၽေးသိုၵ်းၶႃႈ။ ဢၼ်လႆႈႁူမ်ႈၵၼ်သေၸွႆႈထႅမ်ၵူၼ်းပၢႆႈၽေးသိုၵ်းမိူင်းႁဝ်းၶႃႈၼႆႉ ၵမ်းထူၼ်ႈ 8 ပႃးၼႆႉယဝ်ႉၶႃႈ။ ၼင်ႇၵႃႈပွင်ပဵၼ်လႆႈၼၼ်ႉဢေႃႈ”- ဝႃႈၼႆ။
ယၢမ်းလဵဝ် ၼႂ်းမိူင်းတႆးၼႆႉ တၢင်းပွတ်းႁွင်ႇ၊ ပွတ်းၸၢၼ်း ၵူၼ်းပၢႆႈၽေးသိုၵ်း မီးၼပ်ႉႁူဝ်မိုၼ်ႇ ။ တၢင်းၸႄႈတွၼ်ႈ တူၼ်ႈတီး လွႆ လႅမ် ၸိူဝ်းၼႆႉၵေႃႈ ၵူၼ်းမိူင်းယၢင်းလႅင် ပၢႆႈၽေးသိုၵ်း မႃးသွၼ်ႈဝႆႉ မီးၼပ်ႉႁူဝ်မိုၼ်ႇ။ တၢင်းလၢႆးၶႃႈ မိူင်းၵိုင် သိုၵ်း ၸၢဝ်းၶိူဝ်း ၼႂ်းမိူင်းတႆးၼင်ႇၵၼ် တိုၵ်ႉပိုတ်းယိုဝ်းၵၼ်ယူႇလႄႈ ၵူၼ်းမိူင်းၵေႃႈတိုၵ်ႉလႆႈပၢႆႈၽေးသိုၵ်း ယူႇတိၵ်းတိၵ်း ။
ၼွၵ်ႈလိူဝ်ၼၼ်ႉ တၢင်းၸႄႈဝဵင်းၵျွၵ်ႉမႄး သီႇပေႃႉ ၸိူဝ်းၼႆႉၵေႃႈ ၵူၼ်းမိူင်းပိုၼ်ႉတီႈ လႆႈပၢႆႈၽေးသိုၵ်းထႅင်ႈတင်းၼမ်။ လိူဝ်ၼၼ်ႉ တၢင်းၸႄႈ တွၼ်ႈမူႇၸေႊ ယွၼ်ႉသိုၵ်းမၢၼ်ႈ ၵူဝ်းၵၢင်ႉလႄႈ ၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၼၼ်ႉၵေႃႈ မီးၵူၼ်းပၢႆႈၽေးဝႆႉထႅင်ႈတင်းၼမ် ၼႆယဝ်ႉ။
