သိုၵ်းမၢၼ်ႈ သူင်ႇႁႅင်းသိုၵ်း တူင်ႉၼိုင် ၵူတ်ႇထတ်းၸွမ်းဝဵင်းလႄႈ ပႂ်ႉၸွမ်းၵဵၵ်ႉလၢၼ်ႇတၢင်းၶဝ်ႈဢွၵ်ႇဝဵင်းတႃႈၶီႈလဵၵ်း ၼမ်မႃးလိူဝ်ၵဝ်ႇ ဝႃႈၼႆ။
ဝၢႆးသေ ၸုမ်းၵႅတ်ႇၶႄၵူၼ်းမိူင်း PDF ဝဵင်းတႃႈၶီႈလဵၵ်း ပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 10/1/2022 ၼၼ်ႉဝႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်း သူင်ႇႁႅင်းသိုၵ်းတူင်ႉၼိူင် ဢႅဝ်ႇၵူတ်ႇထတ်း တင်ႈလၢၼ်ႇ ထဵတ်ႈထၢမ် ၵူၼ်း ၵႂႃႇမႃးၸွမ်းၼႂ်းဝဵင်းတႃႈၶီႈလဵၵ်း လႅၼ်လိၼ်တႆး – ထႆး ၸိုင်ႈတႆးပွတ်းဢွၵ်ႇၶူင်း ႁၢဝ်ႈႁႅင်းမႃးလိူဝ်ၵဝ်ႇ ။
ၵူၼ်းၼုမ်ႇ တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးသေ မၢၵ်ႇတႅၵ်ႇမႃး၊ PDF ၶဝ်ၵေႃႈ ပိုၼ်ၽၢဝ်ႇမႃးၸိူင်ႉၼၼ်သေ သိုၵ်း မၢၼ်ႈၼႆႉ တူင်ႉၼိုင် ၸွမ်းၼႂ်းဝဵင်း ၵူတ်ႇထတ်းၵူၼ်းၵႂႃႇမႃး ၸိူဝ်းၼႆႉ ႁၢဝ်ႈႁႅင်း ယဝ်ႉၵေႃႈ ယွၼ်းတူၺ်းပႃးၼႂ်းၾူၼ်းထႅင်ႈလူးၵွၼ်ႇ။ လွင်ႈၵႂႃႇမႃး ၵူၼ်းပိုၼ်ႉတီႈ လွတ်ႈလႅဝ်း မိူၼ်မိူဝ်ႈၵူႈပွၵ်ႈတႄႉ ဢမ်ႇမီးယဝ်ႉ”- ဝႃႈၼႆ။
ယဝ်ႉၵေႃႈ ၸွမ်းၵဵၵ်ႉ/ လၢၼ်ႇၶဝ်ႈဢွၵ်ႇ ဝဵင်းၸိူဝ်းၼႆႉၵေႃႈ ပဵၼ်ၵႃႈသိုၵ်းမၢၼ်ႈ ထႅမ်ႁႅင်းသိုၵ်းသေ ပႂ်ႉၼမ်မႃးထႅင်ႈ လိူဝ်ၵဝ်ႇ ၊ တဵၵ်းႁႂ်ႈဢဝ်မၢၼ်ႇၵႃးလူင်း ၸိူဝ်းၼႆႉဝႃႈၼႆ။
တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2022 ၼႆႉမႃး ၼႂ်းဝဵင်းတႃႈၶီႈလဵၵ်း မၢၵ်ႇတႅၵ်ႇထပ်းၵၼ်မႃး 3 ဝၼ်း တႄႇဢဝ် ဝၼ်းတီႈ 8-10/1/2022 ၼၼ်ႉမႃး ယဝ်ႉၵေႃႈ မိူဝ်ႈဝၼ်းတီႈ 14 ၼႆႉ မၢၵ်ႇတႅၵ်ႇထပ်းၵၼ်ထႅင်ႈ 2 လုၵ်ႈ တီႈႁူင်းပလိၵ်ႈပွၵ်ႉဝၢၼ်ႈၵွင်း ၼႆယဝ်ႉ။
မိူဝ်ႈဝၼ်းတီႈ 10/1/2022 ၼၼ်ႉ ယူႇတီႈ ၸုမ်းၵႅတ်ႇၶႄၵူၼ်းမိူင်း ဝဵင်းတႃႈၶီႈလဵၵ်း PDF သမ်ႉ ပိုၼ်ၽၢဝ်ႇဢွၵ်ႇမႃးဝႃႈ ၵူၼ်းမိူင်းၵႂႃးမႃး ၼႂ်း ၵႄႈတႃႈၶီႈလဵၵ်း – ၵဵင်းတုင်ၼၼ်ႉ တေလႆႈပိုတ်ႇမၢၼ်ႇၵႃးလူင်းတင်းမူတ်းသေ ၵႂႃႇမႃး။ တေဢမ်ႇလႆႈသူင်ႇၶၢဝ်ႇၸူးသိုၵ်းမၢၼ်ႈ၊ တေဢမ်ႇလႆႈ ၶဝ်ႈႁူမ်ႈလဵၼ်ႈၸွမ်း ႁႂ်ႈယူႇႁၢင်ၵႆၵၼ် တၢင်းၸုမ်းၸိူဝ်းဢမ်ႇႁဵတ်း CDM ယဝ်ႉၵေႃႈ ႁၢၼ်ႉတၢင်းၵိၼ် KTV လႄႈ Bar ဢၼ်ဢိင်သိုၵ်းမၢၼ်ႈ သေ ပိုတ်ႇဝႆႉၼႂ်းဝဵင်းတႃႈၶီႈလဵၵ်းၼၼ်ႉႁႂ်ႈပိၵ်ႉမူတ်းမူတ်း ၼႆယဝ်ႉ။
ၵွပ်ႈၼႆလႄႈ ၸွမ်းၵဵၵ်ႉတၢင်းၶဝ်ႈဢွၵ်ႇဝဵင်း ၵဵင်းတုင် – မိူင်းၽၢၵ်ႈ လႄႈ တႃႈၶီႈလဵၵ်း ၸိူဝ်းၼႆႉ ၶွင်ႇသီႇသိုၵ်းမၢၼ်ႈ ထႅမ်ႁႅင်းသိုၵ်း တူင်ႉၼိုင်လိူဝ် မႃးထႅင်ႈ တင်းၼမ် ၼႆယဝ်ႉ။
