ၵူၼ်းမိူင်းယၢင်းလႅင် ပၢႆႈၽေးသိုၵ်း ႁွတ်ႈထိုင်မႃး ယူႇဝႆႉ ၸွမ်းႁိူၼ်းပီႈၼွင်ႉ ဢူၺ်းၵေႃႉ ၵူၼ်း မိုတ်ႈၵိုဝ်းလႄႈ ၵျွင်း ၶရိတ်ႊယၼ်ႊ ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း မွၵ်ႈ 200 ၵေႃႉ သိုၵ်းမၢၼ်ႈယင်းတိုၵ်ႉထႅမ်ႁႅင်းလိုပ်ႈလမ်း ပိုတ်းယိုဝ်း ၸုမ်းၵႅတ်ႇၶႄၵူၼ်းမိူင်းယၢင်းလႅင်၊ ပၢင်တိုၵ်းတိုၵ်ႉ ပဵၼ် ႁၢဝ်ႈႁႅင်း ယူႇတေႃႇထိုင်ဝၼ်းမိူဝ်ႈၼႆႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ – “ ပီႈၼွင်ႉ ၵူၼ်း မိူင်းယၢင်းလႅင်ပၢႆႈမႃး ယၢမ်းလဵဝ် တေမီး ႁူဝ်ၵူၼ်းမွၵ်ႈ 200 ၼႆႉၶႃႈ။ ပၢႆႈမႃး မီးမွၵ်ႈ 5 ဝၼ်းၼႆႉယဝ်ႉၶႃႈဢေႃႈ။ ၵမ်ႈၼမ်တႄႉ ပဵၼ်ပီႈၼွင်ႉယၢင်းလႄႈ ပီႈၼွင်ႉတႆးၶႃႈဢေႃႈ”- ဝႃႈၼႆ။
ၵူၼ်းမိူင်းယၢင်းလႅင် ဢၼ်ပၢႆႈႁွတ်ႈထိုင်ဝႆႉ တီႈၸႄႈဝဵင်းလွႆလႅမ်ၼႆႉ ပၢႆႈမႃးသွၼ်ႈဝႆႉ ၸွမ်းႁိူၼ်းယေးပီႈၼွင်ႉၽႂ်မၼ်း၊ ႁိူၼ်းဢူၺ်း ၵေႃႉဢူၺ်းသေႈ ၵူၼ်းမိုတ်ႈၵိုဝ်းၵၼ် ၸွမ်းၼႂ်းပွၵ်ႉ တေမီးႁူဝ်ၵူၼ်းမွၵ်ႈ 100 ပၢႆ။ မႃးသွၼ်ႈယူႇၸွမ်း ၵျွင်းၶရိတ်ႊယၼ်ႊ (Roman Catholic/ RC Church) သမ်ႉမီး 70 ၵေႃႉ။ တီႈၵျွင်းၶရိတ်ႊယၼ်ႊ (Baptist Church) သမ်ႉ မီး 11 ၵေႃႉ။ ဢၼ် ၸွမ်းႁိူၼ်းပီႈၼွင်ႉ ဢူၺ်းၵေႃႉ ၵူၼ်းႁူႉၸၵ်းမိုတ်ႈၵိုဝ်း ၸိူဝ်းၼႆႉတႄႉ မၢင်ႁိူၼ်းမီး 20 ပၢႆ 10 ပၢႆ 3-4 ၵေႃႉ ၸိူဝ်းၼႆႉ။
ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းသိုၵ်း ရူတ်ႉၵႃးယိုဝ်းသိုၵ်း ပိုတ်းယိုဝ်းၸုမ်းသိုၵ်းၵႅတ်ႇၶႄၵူၼ်းမိူင်းၼႂ်းမိူင်းယၢင်းလႅင်လႄႈ ၵူၼ်းမိူင်းယၢင်းလႅင်လႆႈပၢႆႈၽေးသိုၵ်းမီးၸမ် 2 သႅၼ်ယဝ်ႉၼႆ ၸုမ်းၼၢင်းယိင်းမိူင်းမၢၼ်ႈ WLB လႄႈ ၸုမ်းတူင်ႇဝူင်းၵူၼ်းမိူင်းယၢင်းလႅင် ႁၢႆးငၢၼ်းဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ