ၵူၼ်းပၢႆႈၽေးသိုၵ်း ၼႂ်းၸႄႈဝဵင်းမိူင်းၵိုင် ႁူဝ်ၵူၼ်း 2 ႁဵင်ပၢႆ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ၽႃႈႁူမ်ႈၶူဝ်းၼွၼ်း ၸိူဝ်းၼႆႉ ဝႃႈၼႆ။
တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2022 ၼႆႉမႃး ၵူၼ်းဝၢၼ်ႈ ၼႂ်းဢိူင်ႇႁူၺ်ႈလူင် ဢိူင်ႇႁူဝ်ၼႃး ဢၼ်မီးၾၢႆႇဢွၵ်ႇဝဵင်း ၸႄႈဝဵင်းမိူင်းၵိုင် ၸႄႈ တွၼ်ႈလွႆလႅမ် ၸိုင်ႈတႆးပွတ်းၸၢၼ်း ဢွၼ်ၵၼ်ငိူင်ႈပၢႆႈဝႆႉထႃး မႃးသွၼ်ႈဝႆႉ ၸွမ်းႁိူၼ်းယေးပီႈၼွင်ႉလႄႈ ၸွမ်းဝတ်းဝႃးမုၼ်ၸဝ်ႈ ၼႂ်းဝဵင်း ႁူဝ် ၵူၼ်းဢမ်ႇယွမ်း 2 ႁဵင် ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ၽႃႈႁူမ်ႇၶူဝ်းၼွၼ်း သိူဝ်ႈၶူဝ်းဢုၼ်ႇ ၸိူဝ်းၼႆႉ ၼႆယဝ်ႉ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၼႂ်းဝဵင်းၼႆႉ မီးၵူၼ်းပၢႆႈၽေးသိုၵ်းမႃးသွၼ်ႈယူႇဝႆႉ တေ ဢမ်ႇယွမ်း 2 ႁဵင်ၼႆႉယဝ်ႉ။ ၸိူဝ်းယူႇၸွမ်းႁိူၼ်းပီႈၼွင်ႉ၊ ဝတ်ႉဝႃးမုၼ်ၸဝ်ႈ ၼႂ်းဝဵင်းၼႆႉ ၶႂ်ႈဝႃႈ မီးၵူႈဝတ်ႉ/ၵျွင်းယဝ်ႉ။ ယဝ်ႉၵေႃႈ ႁဵတ်းသုမ်ႉသွင်းသေ ယူႇၸွမ်းၵၢင်ပၢင်ႇ တီႈႁဵတ်းပွႆးလိူၼ်သီႇမူၼ်း၊ ယွၼ်းႁဵတ်းသုမ်ႉသွင်း တီႈၼႂ်းဝၢင်းႁိူၼ်းယေး ၵူၼ်းဝၢၼ်ႈ ၸိူဝ်းၼႆႉၵေႃႈမီးၶႃႈဢေႃႈ။ လွင်ႈၵိၼ် ယႅမ်ႉ မိူၼ်ၶဝ်ႈသၢၼ်၊ ၼမ်ႉမၼ်း၊ ၽၵ်းမီႇ ၸိူဝ်းၼႆႉတႄႉ တိုၼ်းဝႃႈလူဝ်ႇၶႃႈယဝ်ႉ ယွၼ်ႉဝႃႈ လူဝ်ႇၵိၼ်ယူႇၵူႈဝၼ်းလႄႈ”- ဝႃႈၼႆ။
ၼွၵ်ႈလိူဝ်ၼၼ်ႉ ၵူၼ်းပၢႆႈၽေးသိုၵ်း မၢင်ၵေႃႉ ဢမ်ႇတၼ်းလႆႈၶူဝ်းၼုင်ႈဝႂ်သင်မႃး ၸိူဝ်းၼႆႉၵေႃႈမီးလႄႈ လွင်ႈၼုင်ႈဝႂ် ၽႃႈႁူမ်ႇၶူဝ်းၼွၼ်း ၸိူဝ်း ၼႆႉၵေႃႈ လူဝ်ႇထႅင်ႈတင်းၼမ် ၼႆယဝ်ႉ။
“ဢၼ်လူဝ်ႇထႅင်ႈ ႁႅင်းသုတ်းတႄႉ လွင်ႈၼုင်ႈဝႂ်ၶႃႈဢေႃႈ။ မၢင်ၵေႃႉ ဢမ်ႇလႆႈၽႃႈႁူမ်ႇၶူဝ်းၼွၼ်းသိူဝ်ႈဢုၼ်ႇ ၸိူဝ်းၼႆႉမႃးၵေႃႈမီး။ ၸိူဝ်းလႆႈ မႃးတႄႉၵေႃႈ ၶႅၼ်းယူႇ။ ၸိူဝ်းဢမ်ႇလႆႈမႃးသင်ၼၼ်ႉဢေႃႈ ပဵၼ်ဢၼ်ထူပ်းတၢင်းယၢပ်ႇၽိုတ်ႇ။ ယၢမ်းလဵဝ် တီႈၼႆႈသမ်ႉ ပဵၼ်ၶၢဝ်းၵတ်းႁႅင်းသေ မႆႈၸႂ်တႃႇၵူၼ်းပၢႆႈၽေးႁဝ်းၶႃႈတႄႉ။ ယဝ်ႉၵေႃႈ မႆႈၸႂ်ပႃး ၸိူဝ်းႁဵတ်းသုမ်ႉသွင်းယူႇၵၼ်ၼၼ်ႉပႃးထႅင်ႈ။ သင်ဢမ်ႇမီးၽႃႈႁူမ်ႇၶူဝ်းၼွၼ်း သိူဝ်ႈ ၽႃႈဢုၼ်ႇၸိုင် ယိုင်ႈၶႅၼ်း တေတုၵ်းၶ ၵတ်းၵၼ်ႁႅင်းၶႃႈဢေႃႈ။ ၸိူဝ်းၼွၼ်းၸွမ်းႁိူၼ်းပီႈၼွင်ႉ ၸလွပ်ႈသလႃး ဝတ်ႉၵျွင်းတႄႉ တေၶႅၼ်း ဢိတ်းၼိုင်ႈယူႇ”- ၽူႈၸွႆႈထႅမ် ၵူၼ်းပၢႆႈၽေးလၢတ်ႈထႅင်ႈ။
ထႅင်ႈၾၢႆႇၼိုင်ႈ ယၢမ်းလဵဝ်သမ်ႉ ပဵၼ်ၽွင်းတၢင်းပဵၼ်ၶူဝ်ႊဝိတ်ႉ 19 ၵေႃႈ တိုၵ်ႉၽႄႈလၢမ်းႁႅင်းဝႆႉယူႇလႄႈ လွင်ႈၵူၼ်းပၢႆႈၽေးသိုၵ်း မႃးသွၼ်းယူႇ ႁူမ်ႈၸွမ်းၵၼ်ၼမ်ၸိူင်ႉၼႆ လွင်ႈၼႆႉၵေႃႈ ပဵၼ်ဢၼ်မႆႈၸႂ် လွင်ႈပၢႆးယူႇလီ တႃႇၵူၼ်းပၢႆႈၽေးသိုၵ်းထႅင်ႈ ၼႆယဝ်ႉ။
“တၢင်းပဵၼ်ၵေႃႈ ပႆႇႁၢႆ ယၢမ်းလဵဝ်တိုၵ်ႉပဵၼ်ၽွင်းၶူဝ်ႊဝိတ်ႉဝႆႉယူႇလႄႈ လွင်ႈပၢႆးယူႇလီ တႃႇၵူၼ်းပၢႆႈၽေးၵေႃႈ ပဵၼ်ဢၼ်လႆႈမႆႈၸႂ်ဝႆႉယူႇၶႃႈ။ ၼင်ႇ ႁိုဝ် တၢင်းပဵၼ်ပေႃးတေဢမ်ႇၸပ်းၽႄႈလၢမ်းၼၼ်ႉ လူဝ်ႇတၢင်းၸွႆႈထႅမ် လွင်ႈၶိူင်ႈၵမ်ႉၵႅမ် တႃႇႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၶႃႈဢေႃႈ”- ၽူႈ ၸွႆႈထႅမ် ၵူၼ်းပၢႆႈၽေးသိုပ်ႇလၢတ်ႈၼႄၼင်ႇၼႆ။
ၵမ်ႈၼမ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉၼႂ်းဝဵင်းၼႆႉသမ်ႉ ပဵၼ်ၵူၼ်းဝၢၼ်ႈ တၢင်းၾၢႆႇဢွၵ်ႇဝဵင်းမိူင်းၵိုင် ။ ယၢမ်းလဵဝ်ပၢင်တိုၵ်းဢမ်ႇပဵၼ် သေတႃႉ လွင်ႈထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းပိုၼ်ႉတီႈ RCSS တင်း SSPP တႄႉ တိုၵ်ႉၶဵင်ႈၶႅင်ၵၼ်ႁႅင်းဝႆႉယူႇ ဝႃႈၼႆ။
ၵူၼ်းၼုမ်ႇ မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တၢင်းၾၢႆႇဢွၵ်ႇဝဵင်းတႄႉ ပၢင်တိုၵ်းပႆႇပဵၼ် ယွၼ်ႉၶဝ်သွင်ၸုမ်း ထႅမ်ႁႅင်းသိုၵ်းၼင်ႇၵၼ် ၶဵင်ႈ ၶႅင်ၵၢၼ်သိုၵ်းၵၼ်ႁၢဝ်ႈႁႅင်းလႄႈ ၵူၼ်းဝၢၼ်ႈၵူဝ်သေ ငိူင်ႈဝႆႉထႃႈဢေႃႈ။ ၵမ်ႈၼမ် ပၢင်တိုၵ်းတႄႉ တေပဵၼ်တၢင်းၾၢႆႇႁွင်ႇဝဵင်းမိူင်းၵိုင်ၶႃႈ”- ဝႃႈၼႆ။
တႄႇဢဝ် ၵၢင်လိူၼ်သႅပ်ႊထႅမ်ႊပိူဝ်ႊ 2021 ၼၼ်ႉမႃး သိုၵ်း RCSS တင်း SSPP တႄႇပဵၼ်ပၢင်တိုၵ်းၵၼ်မႃးႁၢဝ်ႈႁႅင်း တၢင်းၼႂ်းဢိူင်ႇႁူဝ်ၶၢႆး ၼၼ်ႉသေ လၢမ်းၽႄႈထိုင်မႃးႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ် ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈပၢႆႈၽေးသိုၵ်း ၼပ်ႉႁူဝ် ႁဵင် ၼႆယဝ်ႉ။
