သၢႆသိုၵ်းမၢၼ်ႈ တူင်ႉၼိုင် ၾၢႆႇဢွၵ်ႇဝဵင်းမိူင်းၵိုင် ၵူၼ်းမိူင်း  မႆႈၸႂ်ၵူဝ်ပဵၼ်ပၢင်တိုၵ်း   ဝႃႈၼႆ။

ဝၼ်းတီႈ 4/1/2022 သၢႆသိုၵ်းမၢၼ်ႈ ဢဵၼ်ႁႅင်း မွၵ်ႈ 50 တူင်ႉၼိုင်ၵႂႃႇတၢင်း ၾၢႆႇဢွၵ်ႇဝဵင်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်း ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း လၢမ်းၽႄႈႁႅင်းလႄႈ ဢွၼ်ၵၼ်ပၢႆႈၽေးသိုၵ်းထႃႈၵေႃႈမီး။

ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈထႅမ်ႁႅင်းၵႂႃႇၾၢႆႇဢွၵ်ႇဝဵင်းဢေႃႈ။ ပၢႆလိူဝ်သိုၵ်း RCSS တင်း SSPP သွင်ၸုမ်းၼႆႉသမ်ႉပေႃး ဢိူမ်ႈၸမ်ဝဵင်းႁႅင်းၼႃႇယဝ်ႉ ။ ၵူၼ်းဝၢၼ်ႈ  ၾၢႆႇဢွၵ်ႇဝဵင်း ၸိူဝ်းၼၼ်ႉတႄႉ တေႃႉၶူဝ်းတေႃႉလဵင်းသေ ဢွၼ်ၵၼ်ငိူင်ႉပၢႆႈ ထူဝ်ႈဢွၼ်ႇမွၵ်ႈ 7-8 လမ်းယဝ်ႉၶႃႈၼႆႉ”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းမိူင်းၵိုင်ၼႆႉ  ၵူၼ်းပၢႆႈၽေးသိုၵ်း မီးၸမ် 2,000 ။ ၵမ်ႈၼမ် မႃးသွၼ်ႈဝႆႉၸွမ်းႁိူၼ်းယေး ပီႈၼွင်ႉၽႂ်မၼ်း လႄႈ ၸွမ်းဝတ်ႉဝႃး ၸိူဝ်းၼႆႉ။

“ယၢမ်းလဵဝ် တီႈမိူင်းၵိုင်ၼႆႉ ၵူၼ်းပၢႆႈၽေးသိုၵ်း  မီးမွၵ်ႈ 2,000  သၢႆမၢႆမၼ်းတႅတ်ႈတေႃးတႄႉ ပႆႇလႆႈႁူႉ ။ ၵမ်ႈၼမ် ပဵၼ်ၵူၼ်း ၼႂ်း ဢိူင်ႇႁူၺ်ႈလူင်၊ ဢိူင်ႇႁူဝ်ၼႃး၊ ဢိူင်ႇမိူင်းၶုၼ် ၸိူဝ်းၼႆႉၶႃႈဢေႃႈ။ ဢၼ်ပၢႆႈမႃးသွၼ်ႈဝႆႉတႄႉ ၸွမ်းႁိူၼ်းယေးပီႈၼွင်ႉ ၸွမ်းယူင်ႇၸၢတ်ႈ ၸွမ်း ဝတ်ႉဝႃး မုၼ်ၸဝ်ႈ ၸိူဝ်းၼႆႉၶႃႈ”- ၵူၼ်းမိူင်းၵိုင် သိုပ်ႇလၢတ်ႈၼႄၼင်ႇၼႆ။

ဢၼ်ၵူၼ်းပၢႆႈၽေးသိုၵ်း မႃးသွၼ်ႈယူႇသဝ်းဝႆႉတႄႉပဵၼ်ၸွမ်းဝတ်ႉ/ၵျွင်းမူၺ်ႇတေႃႇၸၢၼ်း၊ ၵျွင်းၼႃးလူင်ဢွၵ်ႇ၊ ၵျွင်းလွႆလႅင်၊ ၵျွင်းၶမ်း၊ ၵျွင်းဝဵင်းငိုၼ်း၊ ၵျွင်းၵၢင်   ၸိူဝ်းၼႆႉ။

မိူဝ်ႈဝႃးတင်းမိူဝ်ႈၼႆႉ သိုၵ်း RCSS တင်း SSPP ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈပၼ်ႇၼိဝ်းလႄႈ ၶူင်ႈပၢင်ႇၵႂၢႆး၊  တီႈႁိမ်းဝၢၼ်ႈ ၵုင်းမူင်ႈလႄႈ ၼႃးပုင်ႇ ၼႂ်းဢိူင်ႇမိူင်းၶုၼ်  ၸိူဝ်းပဵၼ် ဝၢၼ်ႈပဵင်းမၢၵ်ႇမူင်ႈ၊ ၵုင်းၼမ်ႉမေႃႇ လႄႈ ပၢင်ႇမႆႉႁႆး ၸိူဝ်းၼႆႉ ၵူၼ်းမိူင်းပိုၼ်ႉတီႈလၢတ်ႈ။