သင်ႇၶတႆးလႄႈ တၵ်ႉၵႃႇသတ်ႉထႃး ႁူမ်ႈၵၼ် ၸတ်းပၢင်ယွၼ်းသူး တႃႇဝၼ်းၵိူတ်ႇၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈဝတ်ႉမႂ်ႇတႆး သႃထု ပရႃႇတိတ်ႇ မိူင်းၵွၵ်ႇ ၸိုင်ႈထႆး။
မိူဝ်ႈဝႃး ဝၼ်းတီႈ 2/1/2022 ယၢမ်းၵၢင်ၼႂ် ယူႇတီႈသင်ႇၶတႆး လုၵ်ႈႁဵၼ်း ၸၼ်ႉၸွမ်မိူင်းၵွၵ်ႇ ၸိုင်ႈထႆး ႁူမ်ႈလူၺ်ႈ တၵ်ႉၵႃႇသတ်ႉထႃး တီႈၸမ်ၵႆ ၸတ်းႁဵတ်းပၢင်ယွၼ်းသူး သုတ်ႇမုၼ်းပၼ် တႃႇဝၼ်းၵိူတ်ႇ ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ၺႃꧣသံဝရ ဢႃယု ထူၼ်ႈတဵမ် 58 ပီ ဢၼ်တေထိုင်ၼႂ်းဝၼ်းတီႈ 5/1/2022 ၼႆႉ တီႈ ဝတ်ႉမႂ်ႇတႆး သႃထု ပရႃႇတိတ်ႇ သွႆး/ၵိဝ်ႇ 44/1 ယၼ်းၼႃးဝႃး မိူင်းၵွၵ်ႇ/ ၵုင်းထဵပ်ႈ ၸိုင်ႈထႆး ၼႆယဝ်ႉ။
ၸဝ်ႈၶူး သၢႆဝၼ်း သုၼၼ်ႇတ ႁူဝ်ပဝ်ႈ သင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈဝႃး ဝၼ်းတီႈ 2 တွၼ်ႈၵၢင် ၼႂ်ၼႆႉ ႁဝ်းၸဝ်ႈၶဝ် လႆႈၸတ်းႁဵတ်းတွၼ်ႈ ယွၼ်းသူးဝၼ်းၵိူတ်ႇၸဝ်ႈသိလ်ထမ်းၶူးဝႃးၸုမ်းဝုၼ်ႉ ၺႃꧣသံဝရ ဢႃယု ၸဝ်ႈႁဝ်း တေတဵမ် 58 ပီ။ ဝၼ်းၵိူတ်ႇၸဝ်ႈႁဝ်းတႄႉ မႅၼ်ႈၼႂ်းဝၼ်းတီႈ 5 လိူၼ်ၵျႅၼ်ႊၼိဝ်ႊ ရီႊၵူႈပီဝႃႈၼၼ်သေ တႃႉၵေႃႈ ဢိင်ၼိူဝ်ၶၢဝ်းယၢမ်း ၼႃႈၵၢၼ် တၵ်ႉၵႃႇႁဝ်းၶဝ်သေ ပေႃးၸတ်းႁဵတ်းၼႂ်းဝၼ်းတီႈ 5 ၼႆ ၵူဝ်ဢမ်ႇတူဝ်ႈတၼ်း လိုဝ်ႈၵၢၼ်ၵၼ်လႄႈ ၸင်ႇမႃးၸတ်းႁဵတ်းၼႂ်းဝၼ်းတီႈ 2 ၼႆႉ။ ႁူမ်ႈၵၼ်ယွၼ်းသူး သုတ်ႇမုၼ်းသၢင်ႈပရႃႇမီႇၸွမ်းၵၼ် တႃႇဝၼ်းၵိူတ်ႇၸဝ်ႈၶူးဝႃး ၸဵမ်သင်ႇၶၸဝ်ႈ လႄႈ တၵ်ႉၵႃႇတင်းမူတ်းတင်းသဵင်ႈၶႃႈ”- ဝႃႈၼႆ။
ၶူးဝႃးဝုၼ်းၸုမ်ႉၶဝ်ႈထမ်ႈ ဢတိတ်ႉထၢၼ်ႇၽႃဝၼႃတြႃးတႃႇ 3 ပီ 3 လိူၼ် တီႈထမ်ႈမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ ဢတိတ်ႉထၢၼ်ႇၸဝ်ႈတေတဵမ်ၼႂ်းပီ 2022 ၼႆႉ။
တွၼ်ႈဝၢႆးဝၼ်းသမ်ႉ ၸတ်းႁဵတ်းပႃး ပၢင်ယွင်ႈၵုင်ႇယေႃးမုၼ် ၸဝ်ႈၶူး ၸိူဝ်းလႆႈႁပ်ႉ ၸုမ်ႈၶူး Ph.D, M.A လႄႈ B.A ၼႂ်းပီ 2021 တီႈၸၼ်ႉၸွမ်မႁႃၸူႊလႃႊလူင်ႊၵွၼ်ႊ ဝင်ႊၼွႆႉ ဢယုတ်ႉထယႃး ၸိုင်ႈထႆး မိူဝ်ႈႁူဝ်လိူၼ်ၻီႊသႅမ်ႊပိူဝ်ႊ 2021 ပူၼ်ႉမႃးၼႆႉ ဝႃႈၼႆ။
“ၼႂ်းဝၼ်းလဵဝ်ၵူၺ်း ႁဝ်းၸဝ်ႈၶဝ် လႆႈၸတ်းႁဵတ်း 2 ပၢင်။ တွၼ်ႈၵၢင်ၼႂ် ပၢင်ယွၼ်းသူးဝၼ်းၵိူတ်ႇ ၸဝ်ႈသိလ်ထမ်းၶူးဝႃး ဝုၼ်းၸုမ်ႉ တွၼ်ႈဝၢႆး ဝၼ်းသမ်ႉ ၸတ်းႁဵတ်းပၢင်ယွင်ႈၵုင်ႇ ၸဝ်ႈၶူးၸိူဝ်းႁပ်ႉၸုမ်ႈၶူး Ph.D, M.A B.A ၼႂ်းပီ 2021 တီႈၸၼ်ႉၸွမ်မႁႃႊၸူႊလႃႊလူင်ႊ ၵွၼ်ႊ ဝင်ႊၼွႆႉ ဢယုတ်ႉထယႃး။ မိူဝ်ႈဝၼ်းႁပ်ႉၸုမ်ႈၼၼ်ႉ ယွၼ်ႉတၢင်းပဵၼ်လႄႈ တၵ်ႉၵႃႇဢမ်ႇၸၢင်ႈလႆႈ ၵႂႃႇၶဝ်ႈႁူမ်ႈ။ ၵွပ်ႈၼႆ ၸင်ႇလႆႈမႃးၸတ်းႁဵတ်းပၢင်ယွင်ႈၵုင်ႇတီႈဝတ်ႉမႂ်ႇတႆးၼႆႉထႅင်ႈၶႃႈ”- ၸဝ်ႈၶူး သၢႆဝၼ်း သုၼၼ်ႇတ သိုပ်ႇလၢတ်ႈၼင်ႇၼႆ။
ပီ 2021 ပူၼ်ႉမႃးၼႆႉသင်ႇၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး လႆႈႁပ်ႉၸုမ်ႈ တင်းမူတ်းမီး 50 တူၼ်/ ၵေႃႉ။ ၼႂ်းၼၼ်ႉ ၸၼ်ႉ B.A (48) ၵေႃႉ၊ M.A (1) ၵေႃႉလႄႈ Ph.D (1) ၵေႃႉ ၼႆယဝ်ႉ။
ၼႂ်းပၢင်ယွၼ်းသူးဝၼ်းၵိူတ်ႇၸဝ်ႈသိလ်ထမ်းၶူးဝႃးဝုၼ်းၸုမ်ႉလႄႈ ပၢင်ယွင်ႈၵုင်ႇယေႃးမုၼ် သင်ႇၶတႆး တီႈဝတ်ႉမႂ်ႇတႆး သထုပရႃႇတိတ်ႇၼႆႉ မီး သင်ႇၶၸဝ်ႈ လႄႈ တၵ်ႉၵႃႇသတ်ႉထႃး ၶဝ်ႈႁူမ်ႈ 600 ပၢႆ ၸတ်းႁဵတ်းလူၺ်ႈၸွမ်းၼင်ႇၶၵ်ႉတွၼ်ႈ ပိူင်ပၢႆးယူႇလီ မိူင်းထႆးတမ်းဝၢင်းဝႆႉၼၼ်ႉ ယဝ်ႉ တူဝ်ႈလီ ငၢမ်းၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ