ဝၼ်းတီႈ 14/12/2021 မိူဝ်ႈၼႆႉယၢမ်းၵၢင်ၶမ်ႈမွၵ်ႈ 6 မူင်းပၢႆ မၢၵ်ႇတႅၵ်ႇတီႈႁူင်းႁႅမ်း ပိၼ်ႇလူင်ႇထဵၵ်ႉထႃး ဢၼ်မီႁိမ်းၵျွင်းၽြႃးၵၢင်ဝဵင်း ဝဵင်းၼမ်ႉၶမ်း ။
ဝၢႆးလင်မၢၵ်ႇတႅၵ်ႇ ၸုမ်းပျီႇတူႉၸိတ်ႉ တႂ်ႈသိုၵ်းမၢၼ်ႈ ၵုမ်းၵမ်ၸိူဝ်းၼၼ်ႉႁွတ်ႈထိုင်မႃးသေ တီႉၺွပ်းဢဝ်ၵူၼ်းၼုမ်ႇ 2 ၵေႃႉ ဝႃႈၼႆ။
ၽူႈၸၢႆး ၵူၼ်းၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ –“ဝၢႆးလင်မၢၵ်ႇတႅၵ်ႇယဝ်ႉ ပျီႇတူႉၸိတ်ႉၶဝ်ထိုင်မႃးတီႈႁူင်းႁႅမ်းၼၼ်ႉသေ ႁၼ်ၵူၼ်းၼုမ်ႇ 2 ၵေႃႉၶီႇရူတ်ႉၶိူင်ႈလတ်းမႃးလႄႈ ႁႄႉသေတီႉဢဝ်ၵူၼ်းၼုမ်ႇၼၼ်ႉၵႂႃႇၶႃႈဢေႃႈ။ ”– ဝႃႈၼႆ။
မၢၵ်ႇၼၼ်ႉပဵၼ်ၽႂ် မႃးပွႆႇတႄႉၼႆၽႂ်ၵေႃႈဢမ်ႇလႆႈႁူႉၸွမ်း။ ၵူၼ်းၼုမ်ႇဢၼ်ၺႃးတီႉၵႂႃႇ 2 ၵေႃႉၼၼ်ႉၵေႃႈ ပဵၼ်ၽႂ်ယင်းပႆႇႁူႉ တေႃႇထိုင်တလဵဝ်။ လွင်ႈမၢတ်ႇၸဵပ်းလူႉတၢႆတႄႉဢမ်ႇမီး။ လွင်ႈတုမ်ႉတိူဝ်ႉလူႉသုမ်းၵေႃႈဢမ်ႇပေႃးမီးၼမ် လႆႈႁူႉၼင်ႇၼႆ။
ဝၢႆးလင်မၢၵ်ႇတႅၵ်ႇတီႈႁူင်းႁႅမ်းၼၼ်ႉယဝ်ႉ ၵူၼ်းၶၢႆၶူဝ်းတီႈၵၢတ်ႇၵၢင်ၶမ်ႈ တီႈၵၢတ်ႇပၢင်ပွႆး ၵေႃႈဢွၼ်ၵၼ်တူၵ်းၸႂ်။ ယွၼ်ႉဝႃႈ မိူဝ်ႈပူၼ်ႉမႃး 2-3 ဝၼ်းၵေႃႈ ၵူၼ်းၸုမ်းၼိုင်ႈၶီႇၵႃးမႃးသေ မႃးယိုဝ်းၼႃႈႁူင်းႁႅမ်းၼၼ်ႉ၊ ယိုဝ်းၺႃးၽူႈၸၢႆး (ၵူၼ်းမိူင်း) ၸဝ်ႈရူတ်ႉၶိူင်ႈ ႁပ်ႉၸၢင်ႈၵေႃႉၼိုင်ႈ၊ မၢၵ်ႇၵွင်ႈၶဝ်ႈတီႈၶႃလူင်လႄႈၶႅၼ် ယင်းတိုၵ်ႉယူတ်းယႃတူဝ်ဝႆႉယူႇတေႃႇထိုင်ယၢမ်းလဵဝ်။
ၸွမ်းၼင်ႇၵူၼ်းႁူႉၼႃႈႁၼ်လင် ၵူၼ်းထဝ်ႈတီႈၼမ်ႉၶမ်းၵေႃႉၼိုင်ႈယၢမ်ႈလၢတ်ႈၼႄၽူႈတွႆႇႁွၵ်ႈတႄႉဝႃႈ ႁူင်းႁႅမ်း ပိၼ်ႇလူင်ႇထဵၵ်ႉထႃးၼၼ်ႉပဵၼ်ႁူင်းႁႅမ်း သႅၼ်းၽူႈၼမ်းၸၼ်ႉသုင်ၼႂ်းသိုၵ်း TNLA ဝႃႈၼႆ။
ယၢမ်းလဵဝ် ၵူၼ်းၶၢႆၶူဝ်းၼႂ်းၵၢတ်ႇၼမ်ႉၶမ်း ဢွၼ်ၵၼ်ၼႄၵၢင်ၸႂ်သၢၼ်ၶတ်းလွင်ႈ TNLA ၵဵပ်းၶွၼ်ႇၼမ်လိူဝ်ႁႅင်း ။ ပႃးၸဵမ်ၵူၼ်းၶၢႆၽၵ်းၶဵဝ်ၵေႃႈဢမ်ႇၵိုတ်း ႁႂ်ႈၵႂႃႇသႂ်ႇ။ ၶွၼ်ႇပၼ် တီႈတႅမ်ႇသုတ်း 3 သႅၼ်ပျႃး တေႃႇထိုင်တီႈသုင်သုတ်းဢမ်ႇယွၼ်း 7 -8 သႅၼ် ။ ၵွပ်ႈၼႆလႄႈ ၵူၼ်းၶၢႆၶူဝ်းႁူမ်ႈၼႄၵၢင်ၸႂ်လူၺ်ႈလၢႆး ဢမ်ႇပိုတ်ႇႁၢၼ်ႉၶၢႆၶူဝ်း ဝၼ်းတီႈ 13 ထိုင် 17 ဝႃႈၼႆ။
