ၵူၼ်းပၢႆႈၽေးသိုၵ်းဢၼ်ႁွတ်ႈၽႅဝ်သွၼ်ႈယူႇဝႆႉတီႈဝတ်ႉၵျွင်းၵုင်းၸူင် ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် တိုၵ်ႉၵိုၼ်းယူႇ 130 ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေး ယွၼ်ႉပိူဝ်ႈသိုၵ်းသွင်ၸုမ်းတိုၵ်ႉၶဵင်ႈၶႅင်ၵၢၼ်သိုၵ်းၵၼ်ယူႇ။

ၵူၼ်းပၢႆႈၽေး 130 ပၢႆၼႆႉပဵၼ်ၵူၼ်းဝၢၼ်ႈၽႃလၢမ်းလႄႈ ဝၢၼ်ႈပႅၵ်ႇၼႃးမူၼ်း ဢၼ်ပၢႆႈဢွၵ်ႇမႃး ယွၼ်ႉ RCSS လႄႈ SSPP ပိုတ်းယိုဝ်းၵၼ် မိူဝ်ႈဝၼ်းတီႈ 8 /12/2021 ၼႆႉ။ ၽွင်းၼၼ်ႉပၢႆႈဢွၵ်ႇမႃးၽွမ်ႉၵၼ် 4 ဝၢၼ်ႈသေတႃႉ ဢၼ်ပႆႇၸၢင်ႈပွၵ်ႈႁိူၼ်းၶိုၼ်း ၵိုတ်းၵူၼ်းဝၢၼ်ႈ 2 ဝၢၼ်ႈၼႆႉ။

“ၶႂ်ႈမိူဝ်းၶိုၼ်းႁိူၼ်းၵျႃႉယဝ်ႉဢေႃႈ  ၵူၺ်းၵႃႈယင်းပႆႇၸၢင်ႈပွၵ်ႈမိူဝ်းၶိုၼ်း၊ ပၢင်တိုၵ်းမႃးပဵၼ်ၸမ်ဝၢၼ်ႈႁဝ်းၼႃႇ။ ၵူဝ်မၢၵ်ႇလူင်မႃးတူၵ်းၼႂ်းဝၢၼ်ႈဢေႃႈ။ ဢၼ်လူဝ်ႇႁဵတ်းၵေႃႈမီးၼမ်ၵျႃႉတီႈဝၢၼ်ႈ။ ဢမ်ႇၸၢင်ႈမိူဝ်းႁဵတ်းဢမ်ႇႁတ်းၵႂႃႇသူၼ်ၵႂႃႇႁိူၵ်ႈ။ ၶဝ်ႈပႆႇလႆႈပၢတ်ႇ ၶဝ်ႈၵၢပ်ႇ ပႆႇလႆႈႁၢၵ်း ၶႂ်ႈမိူဝ်းၶိုၼ်းၼႃႇယဝ်ႉဢေႃႈၼႆႉ ”- ၼၢင်းယိင်းၵူၼ်းဝၢၼ်ႈၽႃလၢမ်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း 134 ၵေႃႉ ဢၼ်မီးတီႈ ဝတ်ႉၵျွင်းၵုင်းၸူင်ၼႆႉ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်လႄႈ ၶူဝ်းၼုင်ႈတၢင်းဝႆ ။ ယွၼ်ႉပဵၼ်ၶၢဝ်းၵတ်းယဝ်ႉလႄႈ လူဝ်ႇၽႃႈႁူမ်ႇၶူဝ်းၼွၼ်း ။

“ယၢပ်ႇၽိုတ်ႇတၢင်းၵိၼ်ဢေႃႈယၢမ်းလဵဝ်။ ၸဝ်ႈတႃႇၼ ၸိူဝ်းၶႂ်ႈမႃးၸွႆႈထႅမ်ၵေႃႈမီးယူႇ ။ ၵူၺ်းၵႃႈ လႆႈထွမ်ႇၶၢဝ်ႇငၢဝ်းသေ ၸင်ႇမႃးဢေႃႈ။ ယၢမ်းလဵဝ်ၵတ်းၼႃႇယဝ်ႉလႄႈ လူဝ်ႇၽႃႈႁူမ်ႇၶူဝ်းၼွၼ်းလႄႈၶူဝ်းဢုၼ်ႇဢေႃႈ ” – ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းတီႈဝတ်ႉၵျွင်းၵုင်းၸူင် ၵေႃႈလၢတ်ႈတီႈၽူႈတွႆႇႁွၵ်ႈၼင်ႇၼႆ။

ဝၢၼ်ႈၽႃလၢမ်းလႄႈ ဝၢၼ်ႈပႅၵ်ႇၼႃးမူၼ်းၼႆႉ မီးၾၢႆႇႁွင်ႇဝဵင်းမိူင်းၵိုင် ။ မီးၼႂ်းၵႄႈ ဢိူင်ႇႁၢမ်းငၢႆးလႄႈ ဝၢင်ႈမိူင်း။ ထုင်ႈႁၢမ်းငၢႆးၼၼ်ႉ RCSS လႄႈ  SSPP ပိုတ်းယိုဝ်းၵၼ်မႃးၸဵမ်မိူဝ်ႈၵၢင်ပီ 2021 ၼႆႉယိုဝ်းယိုဝ်းၵိုတ်းၵိုတ်း။ ၵူၼ်းဝၢၼ်ႈၵေႃႈ ပၢႆႈပၢႆႈပွၵ်ႈပွၵ်ႈ ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉလီလီ ယၢပ်ႇၽိုတ်ႇၵိၼ်းၸႂ် ၵူၼ်းဝၢၼ်ႈၶၢင်းပွင်ႉၼင်ႇၼႆ။