ပၢၼ်သိုၵ်းမၢၼ်ႈယိုတ်းမိူင်းၼႆႉ သူၼ်ယႃႈမႃးမီးႁိမ်းၶၢင်ႈတၢင်းၵႃး ပၢင်လူင် – ႁူဝ်ပူင်း

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 10 လိူၼ်ၼႆႉ ၸွမ်းၶႅပ်ႇ သဵၼ်ႈတၢင်းပၢင်လူင်- ႁူဝ်ပူင်း သဵၼ်ႈမႂ်ႇ  ပဵၼ်သူၼ်ယႃႈၾိၼ်ႇ  သုတ်းသၢႆတၢင်း ၊ သိုၵ်းမၢၼ်ႈပၼ်ၶႂၢင်ႉၽုၵ်ႇတေႃႇၼႃႈတေႃႇတႃ ၊ ၵူၼ်းမိူင်းမႆႈၸႂ်တႃႇ မိူဝ်းၼႃႈလုၵ်ႈလၢင်း ။

ၼၢင်းယိင်းၵူၼ်းၼုမ်ႇ ဢႃယု 30 ပီ ၵေႃႉဢၼ်တႆႇသဵၼ်ႈတၢင်းၼၼ်ႉၵႂႃႇမႃးတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ထုင်ႉၼႆႉ သူၼ်ယႃႈလိူင်ႇၼႆမႅၼ်ႈယူႇ ၵူၺ်းၵႃႈၵူႈပွၵ်ႈ ဢမ်ႇမီးတေႃႇၼႃႈတေႃႇတႃ မိူၼ်ၼႆၶႃႈ။ ယၢမ်းလဵဝ်ၼႆႉတႄႉ သူၼ်ယႃႈ မီးႁိမ်းၶၢင်ႈတၢင်း ၽႂ်ၵႂႃႇမႃးၵေႃႈတိုၼ်းႁၼ်ၵမ်းလဵဝ်ယဝ်ႉၶႃႈ ဢၼ်ၼႆႉပဵၼ်ဢၼ်လီဢၢမ်းတႄႉတႄႉ လွင်ႈသိုၵ်းမၢၼ်ႈပၼ်ဢၼုယၢတ်ႈႁႂ်ႈၽုၵ်ႇယႃႈလႆႈလွတ်ႈလွတ်ႈလႅဝ်းလႅဝ်း ၼၼ်ႉယဝ်ႉၶႃႈ”- ဝႃႈၼႆ။

ၵူၼ်းမိူင်းထုင်ႉၼၼ်ႉဢွၼ်ၵၼ်ထတ်းသၢင်ဝႃႈ ၼႂ်းၶၢဝ်းတၢင်း ပီ သွင်ပီၼႆႉ ပၢႆးမၢၵ်ႈမီးဢမ်ႇလီလႄႈ ယူဝ်ၶေးသိုၵ်းမၢၼ်ႈပၼ်ဢၼုယၢတ်ႈႁႂ်ႈၽုၵ်ႇယႃႈ ၵေႃႈပဵၼ်လႆႈ၊ ဢမ်ႇၼၼ် ပဵၼ်ၽႅၼ်ၵၢၼ်သိုၵ်းမၢၼ်ႈၶျေႃးဢဝ်ၸႂ်ၵူၼ်းမိူင်းၵေႃႈပဵၼ်လႆႈ –  ၼႆၵေႃႈမီး။

ၵဵဝ်ႇၵပ်းလွင်ႈၼႆႉ ၵူၼ်းၼုမ်ႇမိူင်းၵိုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -”ပဵၼ်ၾၢင်ႁၢင်ႈၼိမိၵ်ႈဢမ်ႇလီတွၼ်ႈတႃႇမိူဝ်းၼႃႈၵူၼ်းၼုမ်ႇမိူင်းတႆးႁဝ်းတႄႉတႄႉၶႃႈဢေႃႈ။ သိုၵ်းမၢၼ်ႈႁူႉသေပၼ်ၽုၵ်ႇၵေႃႈလီ သိုၵ်းမၢၼ်ႈဢမ်ႇႁူႉသေဢမ်ႇၵႂႃႇၽဵဝ်ႈၵေႃႈလီ  သိုၵ်းတႆး 2 ၸုမ်း  ၽိူဝ်ႇၶဝ်တေယိုဝ်းၵၼ်ႁဵတ်းႁႂ်ႈၵူၼ်းမိူင်းလႆႈတုၵ်ႉၶ ယူႇၼၼ်ႉ တႃႉၶဝ်ၵႂႃႇၽဵဝ်ႈ ၸိူဝ်းၼၼ်ႉလႃႈ ၊ တေပဵၼ်ၵၢၼ်ၸိူဝ်ႉၸၢတ်ႈဢၼ်ယႂ်ႇမျၢတ်ႈလူင်ဢၼ်ၼိုင်ႈဢေႃႈၼၼ်ႉ  ”- ဝႃႈၼႆ။

တၢင်းသဵၼ်ႈၼႆႉ ပဵၼ်သဵၼ်ႈတၢင်းဢၼ်လုၵ်ႉပၢင်လူင် ၵႂႃႇတူၼ်ႈတီး  ပဵၼ်သဵၼ်ႈတၢင်းမႂ်ႇ။ လုၵ်ႉဝဵင်းပၢင်လူင် ၶီႇၵႃးၵႂႃႇတၢင်းၵျွင်းပၢင်မူင်ႈ မွၵ်ႈ 20 မိၼိတ်ႉၵေႃႈထိုင်သဵၼ်ႈတၢင်းမႂ်ႇၼႆႉ။ လုၵ်ႉတီႈသဵၼ်ႈတၢင်းမႂ်ႇၼႆႉသေၶိုၼ်ႈၵႂႃႇပွင်ႇ ႁူဝ်ပူင်း ႁိမ်းထမ်ႈၸၢင်ႉ ။ ပဵၼ်သဵၼ်ႈတၢင်းမႂ်ႇလႄႈ ပဵၼ်သဵၼ်ႈတၢင်းလီ၊ ၶၢဝ်းတၢင်းပွတ်း ၸဵဝ်းထိုင်။ တင်ႈဢဝ်ၵၢင်ပီ 2021 မႃး ၵူၼ်းထုင်ႉၼၼ်ႉ ၸႂ်ႉသဵၼ်ႈတၢင်းၼႆႉသေၵႂႃႇမႃးတူၼ်ႈတီး-ပၢင်လူင် -လႆႈႁူႉၼင်ႇၼႆ။