သိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ သိုၵ်းၶၢင် ပိုတ်းယိုဝ်းၵၼ်ၶိူဝ်းယႂ်းၼႂ်းထိုင် ဝဵင်းသႅၼ်ဝီ – ၵူတ်ႉၶၢႆ ၵူၼ်းမိူင်းတူၵ်းၸႂ်ၵူဝ်ႁႄ ယၢပ်ႇၽိုတ်ႇတႃႇယူႇသဝ်း ႁဵတ်းၵၢၼ်ႁႃၵိၼ်လဵင်ႉတွင်ႉ။
ဝၼ်းတီႈ 28/11/2021 ယၢမ်းၵၢင်ၼႂ် 9 မူင်း ထိုင် 12 မူင်းၵၢင်ဝၼ်း သိုၵ်းမၢၼ်ႈ လႄႈ သိုၵ်း MNDAA- KIA ယိုဝ်းၵၼ် ၼႂ်းၵႄႈၵူတ်ႉၶၢႆ – သႅၼ်ဝီ သဵၼ်ႈတၢင်းလူင် မူႇၸေႊ – ဝဵင်းလိူဝ်ႇ ။
ၵူၼ်းမၢၼ်ႈဝဵင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ် ၶိုင်ႈဝၼ်းၼႆႉၶႃႈ။ တႄႇဢဝ် 9 မူင်းပၢႆၵၢင်ၼႂ်မႃးၶႃႈ ဢေႃႈ သိုၵ်းမၢၼ်ႈယိုဝ်းၵွင်ႈလူင်၊ ၵွင်ႈဢွၼ်ႇ တီႈႁိမ်းလွႆႁွႆးၶႃႈဢေႃႈ မွၵ်ႈ 12 မူင်းၵၢင်ဝၼ်းၼႆႉ သဵင်ၵွင်ႈၸင်ႇတေယဵၼ် ၶႃႈ ။ ပဵၼ်သိုၵ်းမၢၼ်ႈတင်း ၸုမ်းၵူဝ်းၵၢင်ႉ လႄႈ ၸုမ်းၶၢင်ၶဝ်ဢေႃႈ ။ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ဢမ်ႇလႆႈႁူႉၶႃႈ။ ပၢင်တိုၵ်းၵႆ ဝၢၼ်ႈႁဝ်းၶႃႈယူႇသေတႃႉ တေၵႂႃႇႁိူၵ်ႈၵႂႃႇသူၼ်တႄႉ သမ်ႉၶႆႈယၢၼ်ႈဝႆႉၼင်ႇၵဝ်ႇဢေႃႈ ”- ဝႃႈၼႆ။
မိူဝ်ႈဝၼ်းတီႈ 29/11/2021 ၼၼ်ႉၵေႃႈ တီႈမိူင်းၵူဝ်းလႄႈ ပၢင်ႇသၢႆး ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်ႁၢဝ်ႈႁႅင်းထႅင်ႈ ။
ၵူၼ်း ၽွင်းသႅင် လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ပၢင်တိုၵ်းဢၼ်ပဵၼ်ယူႇၼႆႉ တေပဵၼ်တီႈတၢင်းဝၢၼ်ႈၽွင်းသႅင်၊ မၢၼ်ႈယၢၼ်း (မန့်ယန်း)၊ ပၢၼ်းမူၺ်း (ဘန်းမွှေး) ၸိူဝ်းၼႆႉ။ တင်းသွင်ၾၢႆႇယိုဝ်းၵွင်ႈလူင် ၵွင်ႈဢွၼ်ႇသႂ်ႇၵၼ် ။ တူၵ်းၸွမ်းႁိမ်းဝၢၼ်ႈၸိူဝ်းၼႆႉ ၶႂ်ႈဝႃႈမီးၵူႈဝၼ်းၶႃႈဢေႃႈ”- ဝႃႈၼႆ။
မိူဝ်ႈဝၼ်းတီႈ 28/11/2021 ႁိမ်းဝၢၼ်ႈၼမ်ႉႁႃႉ(နမ့်ဟာရွာ) ၸႄႈဝဵင်းမိူင်းၵူဝ်းၼႆႉၵေႃႈ သိုၵ်းမၢၼ်ႈတင်း ၵဝ်ႈၵၢင်ႉ ပဵၼ်ပၢင် တိုၵ်းၵၼ် ႁၢဝ်ႈႁႅင်း လိူဝ်ၵူႈဝၼ်းပူၼ်ႉမႃး ။
တႄႇဢဝ် လိူၼ်ၵျုႊလၢႆႊၼၼ်ႉမႃး တေႃႇထိုင်ယၢမ်းလဵဝ် ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ၼႆႉ ၶႂ်ႈဝႃႈ ပဵၼ်ပၢင် တိုၵ်းၵၼ်မႃးၵူႈဝၼ်းသေ ယဝ်ႉၵေႃႈ တင်းသွင်ၾၢႆႇ တိုၵ်ႉသိုပ်ႇၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ