ၵူၼ်းပႂ်ႉယၢမ်းတီႈ ၵၢတ်ႇၶၢႆၶူဝ်း မျၢၼ်ႇမႃႇပလႃႇသႃႇ တီႉၺွပ်းႁဵတ်းႁၢႆႉတေႃႇ ၵူၼ်းၼုမ်ႇၼႄၵၢင်ၸႂ် ၼႂ်းၵၢတ်ႇမိူဝ်းဝႃး ၊ ထိုင်မႃးၼႂ်ၼႆႉ သုမ်ႉၶၢႆၶူဝ်းၼႂ်းၵၢတ်ႇၵမ်ႈပႃႈၼမ် ဢမ်ႇပိုတ်ႇၶၢႆသေသုမ်ႉ ၵူၼ်းမႃးဢႅဝ်ႇသိုဝ်ႉၶူဝ်းၵေႃႈဢမ်ႇမီး။
ဝၼ်းတီႈ 25/11/2021 ၵူၼ်းၼုမ်ႇၸုမ်းၼိုင်ႈ မႃးၼႄႈၵၢင်ၸႂ်သၢၼ်ၶတ်းသိုၵ်းမၢၼ်ႈလူၺ်ႈလၢႆးၵတ်းယဵၼ် တီႈၵၢတ်ႇ မျၢၼ်ႇမႃႇပလႃႇသႃႇ ဝဵင်းတႃႈၵုင်ႈ၊ ၵူၼ်းပႂ်ႉယၢမ်းတီႈၵၢတ်ႇ တီႉၺွပ်းပေႃႉထုပ်ႉၵူၼ်းၼုမ်ႇၼႄၵၢင်ၸႂ် ပႃးၼၢင်းယိင်းဢွၼ်ႇၵေႃႉၼိုင်ႈ ၵေႃႈၺႃးလၢၵ်ႈၸၼ်ၵႂႃႇ ထိုင်တီႈပေႃးႁၢင်ႈႁၢႆႉတႃ။ ႁၢင်ႈၼၼ်ႉထုၵ်ႇပိုၼ်ၽႄႈၼိူဝ်သိုဝ်ႇဢွၼ်ႊလၢႆႊ သေ ဢွၼ်ၵၼ်တိုၵ်းသူၼ်းပႃးဝႃႈ ထုၵ်ႇလီၶွမ်ႈၶတ်း သၢၼ်ၶတ်းတေႃႇ ၵၢတ်ႇ မျၢၼ်ႇမႃႇပလႃႇသႃႇ လူၺ်ႈဢမ်ႇသိုဝ်ႉၶူဝ်း ၶၢႆၶူဝ်း ဝႃႈၼႆ။
ဝၢႆးလင်ၶႅပ်းႁၢင်ႈလႄႈလိၵ်ႈသၢၼ်ၶတ်းဢွၵ်ႇမႃးဢမ်ႇႁိုင် ၵူၼ်းၶၢႆၶူဝ်းတီႈၵၢတ်ႇ ဢွၼ်ၵၼ်တၢင်ႇၼိူဝ်ၾဵတ်ႉသ်ပုၵ်ႉ ၽႂ်မၼ်းဝႃႈ တေပိၵ်ႉႁၢၼ်ႉၶၢႆၶူဝ်းဝႆႉၸူဝ်ႈၶၢဝ်း ဝႃႈၼႆသေ ထိုင်မႃးမိူဝ်ႈၼႆႉၵၢင်ၼႂ် ၵၢတ်ႇမျၢၼ်ႇမႃႇပလႃႇသႃႇ ၵေႃႈဢမ်ႇမီးၵူၼ်းသိုဝ်ႉလႄႈၵူၼ်းၶၢႆ ၵၢတ်ႇသမ်ႉပေႃးႁႅင်ႈႁႅတ်း။
ၵဵဝ်ႇလူၺ်ႈလွင်ႈဢၼ်ပဵၼ်ၵႂႃႇၼႆႉသေ ၾၢႆႇၽွင်းငမ်းတီႈၵၢတ်ႇ ဢွၵ်ႇလိၵ်ႈပိုၼ်ၽၢဝ်ႇယွၼ်းၼွမ်း ၊ တေၶဵင်ႈၶႅင်မၢႆမီႈလိူဝ်ၼႆႉသေ တေႁပ်ႉပုၼ်ႈၽွၼ်းၼင်ႇႁိုဝ်တေဢမ်ႇပဵၼ်ထႅင်ႈ ဝႃႈၼႆဝႆႉ။
ၵူၺ်းၵႃႈ ၵူၼ်းဝဵင်းတႃႈၵုင်ႈၵူၺ်းဢမ်ႇၵႃး ပတ်းပိုၼ်ႉၸိုင်ႈမိူင်းတႄႉ ဢွၼ်ၵၼ်တႅမ်ႈတၢင်ႇၼိူဝ်ဢွၼ်ႊလၢႆႊ ၼႄၵၢင်ၸႂ်ဝႃႈ – ၸႂ်ႉလၢႆးႁုၵ်ႉႁၢႆႉ ႁဵတ်းတေႃႇၵူၼ်းၼုမ်ႇၼႄၵၢင်ၸႂ်လူၺ်ႈလၢႆးၵတ်းယဵၼ်လႄႈ ႁႂ်ႈဢွၼ်ၵၼ်သိုပ်ႇၶွမ်ႈၶတ်း ၼႄၵၢင်ၸႂ်တေႃႇမျၢၼ်ႇမႃႇပလႃႇသႃႇ ၵႂႃႇထႅင်ႈ ဝႃႈၼႆ။
ၼႂ်းသိုဝ်ႇတၢင်ႇဢၼ်တႄႉဢွၵ်ႇဝႆႉဝႃႈ မျၢၼ်ႇမႃႇပလႃႇသႃႇၼႆႉ ၸဝ်ႈၶွင်ၵၢတ်ႇပဵၼ် လုၵ်ႈလၢၼ် ၽူႈၼမ်း သိုၵ်းယိုတ်းမိူင်းၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ