Friday, March 29, 2024

သိုၵ်းမၢၼ်ႈ ယိုဝ်းၵူၼ်းမိူင်းမူႇၸေႊ တၢႆၵေႃႉၼိုင်ႈ

Must read

 သိုၵ်းမၢၼ်ႈ မိူၵ်ႈမႂ်ႈ တီႉၺွပ်းၵူၼ်းမိူင်း မူႇၸေႊ ၵေႃႉၼိုင်ႈသေ ပေႃႉထုပ်ႉ ယိုဝ်းတၢႆပႅတ်ႈ ဝႃႈၼႆ။

Image: ၵူၼ်းပိုၼ်ႉတီႈ/ လၽၢႆႇတဵင်ႇ ဢႃယု 65 ပီ ထုၵ်ႇသိုၵ်းမၢၼ်ႈယိုဝ်းတၢႆ

မိူဝ်ႈဝၼ်းတီႈ 22/11/2021 ပူၼ်ႉမႃးၼႆႉ ၽူႈၸၢႆး ၵေႃႉၼိုင်ႈ ၸိုဝ်ႈႁွင်ႉ လၽၢႆႇတဵင်ႇ(လဖိုင်တိန်) ဢႃယု 56 ပီ ၵႂႃႇႁဵတ်းႁႆႈ တီႈၾၢႆႇၸၢၼ်း ဝၢၼ်ႈမၢင်းႁၢင်ႇ (ၼမ်ႉလိူင်မၢင်းႁၢင်ႇ) ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၺႃးသိုၵ်းမၢၼ်ႈ တီႉၺွပ်းပေႃႉထုပ်ႉ ယိုဝ်းတၢႆပႅတ်ႈ တီႈၼႂ်းႁႆႈ  ။

- Subscription -

ၵူၼ်းဝၢၼ်ႈပွတ်းတွၼ်ႈၼၼ်ႉ ဢၼ်ႁၼ်သိုဝ်ႈတႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းမၼ်းၸၢႆး ႁဵတ်းၵၢၼ်ဝႆႉၼႂ်းႁႆႈ ၼၼ်ႉ သိုၵ်းမၢၼ်ႈ  မႃးၺွပ်းမၼ်းသေ လၢတ်ႈသင်တႄႉ ဢမ်ႇႁူႉ။ ယဝ်ႉၵေႃႈ ပေႃႉထုပ်ႉမၼ်းၸၢႆး ဝၢႆးၼၼ်ႉ ဢဝ်ၵွင်ႈယိုဝ်းမၼ်းၸၢႆးတၢႆ ”- ဝႃႈၼႆ။

လၽၢႆႇတဵင်ႇ ၵေႃႉထုၵ်ႇသိုၵ်းမၢၼ်ႈ  ယိုဝ်းတၢႆၼႆႉ မၼ်းၸၢႆးပဵၼ်ၵူၼ်းၸၢဝ်းၶၢင် ပဵၼ်ၵူၼ်းႁႃလဵင်ႉၼႃႈႁိူၼ်းၵေႃႉၼိုင်ႈ မၼ်းၸၢႆးမီးဝႆႉ လုၵ်ႈလၢင်း 4 ၵေႃႉ ။

ပူၼ်ႉမႃးပႆႇႁိုင်ၼႆႉ ၶွင်ႇသီႇသိုၵ်းမၢၼ်ႈ တူင်ႉၼိုင်ၽႅဝ်ႁွတ်ႈမႃးထိုင် တီႈဢိူင်ႇမၢင်းႁၢင်ႇသေ လႆႈပဵၼ် ပၢင်တိုၵ်းၵၼ်တၢင်း သိုၵ်းၵူဝ်းၵၢင်ႉ MNDAA ။

“မိူဝ်ႈဝႃးၼႆႉ တီႈႁိမ်းဝၢၼ်ႈမၢင်းႁၢင်ႇၼႆႉ ပဵၼ်ပၢင်တိုၵ်းၵၼ် ၵမ်းၼိုင်ႈသေ သိုၵ်းမၢၼ်ႈတီႈၼႆႉ ႁၢင်ႈႁႅၼ်းမုင်ႈၸူးၵႂႃႇတၢင်းမိူင်းၵူဝ်း ဢဵၼ်ႁႅင်း ဢၼ်ၶဝ်မႃးတၢင်းၼႆႉ ၼမ်တႄႉတႄႉၶႃႈ”-  ၵူၼ်းပိုၼ်ႉ တီႈသိုပ်ႇလၢတ်ႈထႅင်ႈၼင်ႇၼႆ။

ၼႂ်းဢိူင်ႇမၢင်းႁၢင်ႇ ဝၢၼ်ႈမၢင်းႁၢင်ႇၼႆႉ ၵမ်ႈၼမ် ပဵၼ်ပီႈၼွင်ႉၸၢဝ်းၶၢင်ယူႇသဝ်းဝႆႉ တင်းမူတ်းလင် ႁိူၼ်းမီး မွၵ်ႈ 70 လင် ႁူဝ်ၵူၼ်း မီးမွၵ်ႈ 500 ၵေႃႉ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း