ယၢမ်းလဵဝ် ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတု ႁူဝ်ၵူၼ်း 327 ၵေႃႉ ပႆႇႁတ်းပွၵ်ႈႁိူၼ်းယေးၵၼ် ယွၼ်ႉၼႂ်းပိုၼ်ႉတီႈ ပႆႇမီးလွင်ႈၼိမ်သဝ်း တိုၵ်ႉမီးသိုၵ်းတူင်ႉၼိုင် ၶဵင်ၶႅင်ႈၵၼ်ယူႇ။
မိူဝ်ႈၼႆႉ ဝၼ်းတီႈ 10/11/2021 ၵူၼ်းဝၢၼ်ႈၵုင်းပဝ်း၊ ပၢင်ႇၵွင်းမူး၊ ၼမ်ႉႁူးလႄႈ ၼွင်လႅဝ် ႁူဝ်ၵူၼ်း 105 ၵေႃႉ လင်ႁိူၼ်း 34 လင် ဢၼ်ပၢႆႈ မႃးသွၼ်ႈဝႆႉတီႈဢိူင်ႇပၢင်ႇၵေႇတု ၸႄႈဝဵင်းမိူင်းၵိုင်ၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉသေတႃႉ ၵိုတ်းၵူၼ်းဝၢၼ်ႈၵုင်းလႅင်း ႁူဝ်ၵူၼ်း 327 ၵေႃႉတႄႉ ပႆႇႁတ်းပွၵ်ႈႁိူၼ်းယေးၵၼ် ယွၼ်ႉၼႂ်းပိုၼ်ႉတီႈ တိုၵ်ႉမီးသိုၵ်းတူင်ႉၼိုင် ၶဵင်ႈၶႅင်ႈၵၼ်ဝႆႉယူႇ ဝႃႈၼႆ။
ၽူႈၸွႆႇထႅမ်ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတု လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵူၼ်းဝၢၼ်ႈၵုင်းပဝ်း၊ ပၢင်ႇၵွင်းမူး၊ ၼမ်ႉႁူးလႄႈ ၼွင်လႅဝ် ၸိူဝ်းၼႆႉတႄႉ မိူဝ်းယဝ်ႉၶႃႈ။ ၵိုတ်းဝၢၼ်ႈၵုင်းလႅင်း ႁူဝ်ၵူၼ်း 327 ၵေႃႉ လင်ႁိူၼ်း 87 လင်တႄႉတိုၵ်ႉၵိုတ်းဝႆႉယူႇၶႃႈ။ ယွၼ်ႉသိုၵ်းၼႆႉ တိုၵ်ႉမီးယူႇဝႆႉၼႂ်းဝၢၼ်ႈၶဝ်လႄႈ ပႆႇႁတ်းပွၵ်ႈၵၼ်ၶႃႈဢေႃႈ”- ဝႃႈၼႆ။
ယၢမ်းလဵဝ် ငဝ်းလၢႆး ၼႂ်းပိုၼ်ႉတီႈတႄႉ ပႆႇၼိမ်ယဵၼ် ၵူၼ်းမိူင်းပွၵ်ႈႁိူၼ်းယေးၵေႃႈ တိုၵ်ႉလႆႈမႆႈၸႂ်ၵၼ်ယူႇ ယွၼ်ႉသိုၵ်းတင်းသွင်ၾၢႆႇ တိုၵ်ႉပဵၼ်ပၢင်တိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ် ၸိူဝ်းၼႆႉယူႇ ဝႃႈၼႆ။
“ပၢင်တိုၵ်းတႄႉ ၶႂ်ႈဝႃႈ ပဵၼ်ၵူႈဝၼ်းၶႃႈဢေႃႈ မီးမိူဝ်ႈၼႆႉၵူၺ်းယဵၼ်ဝႆႉ။ မိူဝ်ႈဝႃး မိူဝ်ႈသိုၼ်းၼႆႉ ပဵၼ်ၵၼ်တၢင်းႁၢမ်းငၢႆး ၼွင်လႅဝ် ၸိူဝ်းၼႆႉ။ တေ ႁိုင်မွၵ်ႈ 2 ၸူဝ်ႈမူင်းၼႆၶႃႈ။ တင်းသွင်ၾၢႆႇၵေႃႈ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ယူႇ ၽႂ်ပႆႇထွႆထွၼ်ပၼ်ၵၼ် လႅပ်ႈ 4-5 ဝၼ်းၼႆႉ သဵင်ၵွင်ႈ တေ ၸၢင်ႈတႅၵ်ႇႁႅင်းထႅင်ႈယူႇ”- ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈၼင်ႇၼႆ။
ထႅင်ႈၾၢႆႇၼိုင်ႈၵေႃႈ ယၢမ်းလဵဝ် ပဵၼ်ၽွင်းၶဝ်ႈၶၢဝ်းၵတ်းမႃးယဝ်ႉလႄႈ ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉ လူဝ်ႇတၢင်းၸွႆႈထႅမ် ၶူဝ်းဢုၼ်ႇ ၽႃႈဝႆ၊ ၽၵ်းၶဵဝ်တႃႇၵိၼ်ၵႂႃႇၵူႈဝၼ်း ။
ၵမ်ႈၼမ် ၵူၼ်းပၢႆႈၽေးသိုၵ်း ႁူဝ်ၵူၼ်း 327 ၼႆႉ ယူႇသဝ်းဝႆႉ ၸွမ်းႁိူၼ်းယေး ပီႈၼွင်ႉၽႂ်မၼ်း၊ ၵမ်ႈၽွင်ႈၼိူဝ်ထေႃႈလႃႈၵျီႈၸဝ်ႈၵဝ်ႇ။
တႄႇဢဝ် ဝၼ်းတီႈ 14/9/2021 ၼၼ်ႉမႃးသေ သိုၵ်း SSPP တင်း RCSS ပဵၼ်ပၢင်တိုၵ်းၵၼ် တၢင်းၼႂ်းဢိူင်ႇႁူဝ်ၶၢႆးမႃးႁၢဝ်ႈႁႅင်း။ ၽႄႈ လၢမ်းထိုင်ဢိူင်ႇပၢင်ႇၵေႇတု၊ ႁၢမ်းငၢႆး ၸိူဝ်းၼႆႉ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ၼပ်ႉႁူဝ်ႁဵင် လႆႈပၢႆႈၽေးသိုၵ်း။ ထိုင်ယၢမ်းလဵဝ် မီးၶၢဝ်းတၢင်း လိူၼ်ပၢႆယဝ်ႉ ပၢင်တိုၵ်းတင်းသွင်ၾၢႆႇ ပႆႇယဵၼ်။
