လုၵ်ႈဢွၼ်ႇမိူင်းၵိုင် ၵႂႃႇလၢမ်ႈၵႂၢႆးတီႈႁႆႈ  ၽႃႇၺႃးမၢၵ်ႇ ၸွမ်းသဵၼ်ႈတၢင်း  မၢတ်ႇၸဵပ်းလူႉတၢႆတင်းၵူၼ်းတင်းၵႂၢႆး။

မိူဝ်ႈဝႃး ဝၼ်းတီႈ 2/11/2021 ယၢမ်းဝၢႆးဝၼ်း 2 မူင်းပၢႆ ၸၢႆးထုၼ်းဢေး ဢႃယု 17 ပီ ၵူၼ်းဝၢၼ်ႈလွႆယွႆး ပွၵ်ႉႁွင်ႇ ဢိူင်ႇပၢင်ႇၵေႇတု ၸႄႈဝဵင်း မိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း  ၶီႇၵႂၢႆးသေ တေၵႂႃႇလၢမ်ႈ/ လဵင်ႉၼႂ်းႁႆႈ ။ ၵႂႃႇၽႃႇၺႃးမၢၵ်ႇ တၢင်းၾၢႆႇ ႁွင်ႇဝၢၼ်ႈလွႆယွႆး လႆႈမၢတ်ႇၸဵပ်းႁၢဝ်ႈႁႅင်း  သူင်ႇယူတ်းယႃတူဝ်တီႈႁူင်းယႃမိူင်းၵိုင်  လူႉတၢႆၵႂႃႇတီႈႁူင်းယႃ  ။

ၵူၼ်း  ဢိူင်ႇပၢင်ႇၵေႇတု လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၼ်း ၶီႇၵႂၢႆးလုၵ်ႉ ဝၢၼ်ႈလွႆယွႆး ပွၵ်ႉႁွင်ႇသေ လူင်းၵႂႃႇသဵၼ်ႈ တၢင်းလုၵ်းၶၢႆႉ တေၵႂႃႇတီႇႁႆႈသူၼ်ၶဝ်ၼၼ်ႉသေ ယဵပ်ႇၺႃးမၢၵ်ႇၸွမ်းသဵၼ်ႈတၢင်းၶႃႈဢေႃႈ။ ၵႂၢႆးသွင်တူဝ်မႄႈလုၵ်ႈၼၼ်ႉတႄႉ လူႉတၢႆထင်တီႈ ၵမ်ႈလဵဝ်ၶႃႈဢေႃႈ။ တူဝ်မၼ်းၸၢႆးသမ်ႉ လႆႈမၢတ်ႇၸဵပ်းႁႅင်းသေ သူင်ႇယူတ်းယႃ တီႈႁူင်းယႃ လႆႈဢဝ်လူႉတၢႆၵႂႃႇတီႈႁူင်းယႃၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ ပဵၼ်မၢၵ်ႇၽႂ် ၸုမ်းလႂ် ႁၢင်ႈၵၢင်ဝႆႉ ဢၼ်ဝႃႈၼၼ်ႉ ဢမ်ႇလႆႈႁူႉၸွမ်း ၵူၼ်းပိုၼ်ႉတီႈ ဢိူင်ႇပၢင်ႇၵေႇတု လၢတ်ႈၼႄၼင်ႇၼႆ။

လိူဝ်ၼၼ်ႉ မိူဝ်ႈပဵၼ်ပၢင်တိုၵ်းၵၼ် တၢင်းဝၢၼ်ႈလွႆယွႆး မိူဝ်ႈဝၼ်းတီႈ 1 ပူၼ်ႉမႃးၼႆႉ ၸၢၵ်ႇမၢၵ်ႇလူင် – မၢၵ်ႇၵွင်ႈ တိူဝ်ႉသႂ်ႇ ႁိူၼ်းယေးၵူၼ်းဝၢၼ်ႈ လႆႈလူႉၵွႆၸွမ်းထႅင်ႈ ပဵၼ်လၢႆလင်။

“မၢၵ်ႇလူင် မၢၵ်ႇၵွင်ႈ တူၵ်းတႅၵ်ႇသႂ်ႇ ႁိူၼ်းၵူၼ်းဝၢၼ်ႈလင် 3 ၶႃႈဢေႃႈ။    ၽႃမုင်း ႁိူၼ်း၊ လင်ၶႃးႁိူၼ်း ၸိူဝ်းၼႆႉၵေႃႈ ပွင်ႇၼမ်။ ပဵၼ်ႁွႆးမၢၵ်ႇၵွင်ႈ၊ ၸၢၵ်ႇမၢၵ်ႇၸိူဝ်းၼႆႉ သဵၼ်တိူဝ်ႉသႂ်ႇၶႃႈ လွင်ႈၾႆးမႆႈတႄႉ ဢမ်ႇမီး။ ယွၼ်ႉၼၼ် လႄႈ တုၵ်းယွၼ်းထိုင် ၸုမ်းသိုၵ်းယိပ်းၵွင်ႈၵၢင်ႇ ၸိူဝ်းပဵၼ်ပၢင်တိုၵ်းၵၼ်ၼၼ်ႉ ႁႂ်ႈမႃးဢဝ်ပုၼ်ႈၽွၼ်းသၢႆႈတႅၼ်း ပၼ်ၶိုၼ်းၵူၼ်းဝၢၼ်ႈၶႃႈ ဢေႃႈ လိူဝ်ၼၼ်ႉ လွင်ႈၵူၼ်းလူႉတၢႆ ၵႂၢႆးလူႉတၢႆၼၼ်ႉၵေႃႈ ယဵပ်ႇၺႃးမၢၵ်ႇၼၼ်ၵေႃႈ ႁႂ်ႈၶဝ်မႃးႁပ်ႉဢဝ်ပုၼ်ႈၽွၼ်း သၢႆတႅၼ်းပၼ်ၶႃႈဢေႃႈ”- ၵူၼ်းပိုၼ်ႉတီႈ ဢိူင်ႇပၢင်ႇၵေႇတု တုၵ်းယွၼ်းလၢတ်ႈ ၼႄၼင်ႇၼႆ။

ဝၢၼ်ႈလွႆယွႆးၼႆႉ တင်းမူတ်းမီးလင်ႁိူၼ်းယူႇ 76 လင် ယူႇၼႂ်းဢိူင်ႇပၢင်ႇၵေႇတု မိူဝ်ႈဝၼ်းတီႈ 1/11/2021 ပူၼ်ႉမႃး သဵင်ၵွင်ႈတႅၵ်ႇတၢင်းဝၢၼ်ႈ ၼႆႉသေ ၵူၼ်းဝၢၼ်ႈၵမ်ႈၼမ် ဢွၼ်ၵၼ်ပၢႆႈၵႂႃႇ သွၼ်ႈမူၵ်းဝႆႉၸူဝ်ႈၶၢဝ်း တီႈတႂ်ႈၵျွင်း/ ဝတ်ႉမုၼ်ၸဝ်ႈ လွႆယွႆး ၼႆယဝ်ႉ။

ၵဵဝ်ႇလူၺ်ႈ လွင်ႈၸုမ်းယိပ်းၵွင်ႈၵၢင်ႇ ပိုတ်းယိုဝ်းၵၼ် တၢင်းၼႂ်းဢိူင်ႇပၢင်ႇၵေႇတုၼႆႉ ယူႇတီႈ ၵူၼ်းမိူင်း ၼႂ်းပိုၼ်ႉတီႈ ဢွၼ်ၵၼ်တုၵ်းယွၼ်းဝႃႈ ပၢင်တိုၵ်းဢၼ်ပဵၼ်ယူႇၼႆႉ ယႃႇႁႂ်ႈလႆႈပဵၼ် ၸွမ်းႁိမ်းႁွမ်း သူၼ်ႁႆႈၼႃး ယဝ်ႉၵေႃႈ ႁိမ်းဝၢၼ်ႈၵူၼ်း ၸိူဝ်းၼႆႉ။ လိူဝ်ၼၼ်ႉ မၢၵ်ႇဢၼ်ၾင်လိၼ် ဝႆႉၸိူဝ်းၼၼ်ႉၵေႃႈ ႁႂ်ႈၽဵဝ်ႈဢွၵ်ႇပၼ်မူတ်းမူတ်း ဢမ်ႇဝႃႈ ၸွမ်းသဵၼ်ႈတႃႇသၢႆတၢင်း ၵူၼ်းၵႂႃႇမႃး ၸွမ်းၼႂ်းႁႆႈသူၼ်ၼႃး ၸိူဝ်းၼႆႉ။

ထႅင်ႈၾၢႆႇၼိုင်ႈ ယၢမ်းလဵဝ်ၼႆႉ ပဵၼ်ၶၢဝ်းၵူၼ်းဝၢၼ်ႈ လူဝ်ႇဢဝ်ၶဝ်ႈၼႂ်းႁႆႈၼႂ်းၼႃး၊  လူဝ်ႇဢဝ်ၶဝ်ႈၵၢပ်ႇ ၸိူဝ်းၼႆႉထႅင်ႈ လႄႈ သင်ပဵၼ်လႆႈ ပၢင်တိုၵ်းတင်းသွင်ၾၢႆႇၼၼ်ႉ ႁႂ်ႈၵိုတ်း သေၵမ်း ၵူၼ်းၼႂ်းဢိူင်ႇပၢင်ႇၵေႇတု တုၵ်းယွၼ်းၼင်ႇၼႆထႅင်ႈ။

ယၢမ်းလဵဝ် ၼႂ်းဢိူင်ႇပၢင်ႇၵေႇတုၼႆႉ ပၢင်တိုၵ်းယဵၼ်လူင်းဝႆႉသေတႃႉ  သိုၵ်းတင်းသွင်ၾၢႆႇ တိုၵ်ႉထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်း  ဝႆႉႁၢဝ်ႈႁႅင်း။ ၾၢႆႇလႂ်ၵေႃႈ ပႆႇယွမ်းထွႆထွၼ်ပၼ်ၵၼ် ၵူၼ်းပိုၼ်ႉတီႈလၢတ်ႈ။

ၼွၵ်ႈလိူဝ်ၼၼ်ႉ ၼႂ်းဢိူင်ႇပၢင်ႇၵေႇတုၼႆႉ မီးဝႆႉၵူၼ်းပၢႆႈၽေး ယၢမ်းလဵဝ် ၵိုတ်းဝႆႉ 500 ပၢႆ ပႆႇၸၢင်ႈပွၵ်ႈႁိူၼ်းယေး  ယွၼ်ႉငဝ်းလၢႆးၵၢၼ်သိုၵ်း ၼႂ်းပိုၼ်ႉတီႈ ပႆႇၼိမ်ယဵၼ် ဝႃႈၼႆ။

မိူဝ်ႈဝႃး ဝၼ်းတီႈ 2/11/2021 ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတု ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း မွၵ်ႈ 100 ပဵၼ်ၵူၼ်းဝၢၼ်ႈ ပၢင်ႇၵွင်းမူး ၼမ်ႉႁူး ၸိူဝ်းၼႆႉ ယၢမ်းလဵဝ် ၵိုတ်းဝႆႉ 500 ပၢႆ။ တႃႇလွင်ႈၵိၼ်ယႅမ်ႉ ၶူဝ်းၼုင်ႈဢုၼ်ႇ ၸိူဝ်းၼႆႉ တိုၵ်ႉလူဝ်ႇတၢင်းၸွႆႈထႅမ်ထႅင်ႈ တင်း ၼမ် တႃႇၵူၼ်းပၢႆႈၽေးသိုၵ်း ၸိူဝ်းၵိုတ်းဝႆႉၼႆႉ ဝႃႈၼႆ။