ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတီႈဢိူင်ႇပၢင်ႇၵေႇတု ႁူဝ်ၵူၼ်း 670 ပၢႆၼၼ်ႉ ယၢမ်းလဵဝ် လူဝ်ႇတၢင်း ၸွႆႈထႅမ်ၶဝ်ႈၼမ်ႉ တၢင်းၵိၼ် ႁၢဝ်ႈႁႅင်း။

တႄႇဢဝ် ႁၢင်လိူၼ်သႅပ်ႊထႅမ်ႊပိူဝ်ႊမႃး တေႃႇထိုင် ဝၼ်းတီႈ 2/11/2021  ၼႂ်းၶၢဝ်းတၢင်း လိူၼ်ပၢႆ  ၵူၼ်းပၢႆႈၽေးသိုၵ်း  တီႈဢိူင်ႇပၢင်ႇၵေႇတု ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁူဝ်ၵူၼ်း 674 ၵေႃႉ ဢမ်ႇၸၢင်ႈပွၵ်ႈႁိူၼ်းၶိုၼ်း ၊ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ် လိူဝ်ႁႅင်း။  

ၵူၼ်းၼႂ်းဢိူင်ႇပၢင်ႇၵေႇတု လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေး  တီႈပၢင်ႇၵေႇတုၼႆႉ ယၢပ်ႇၽိုတ်ႇ လွင်ႈၵိၼ် ယႅမ်ႉ ၶဝ်ႈၼမ်ႉတၢင်းၵိၼ်ၶႃႈဢေႃႈ။ ဢမ်ႇမီးပီႈၼွင်ႉမႃးၸွႆႈထႅမ်ၼႆႉ တေမီးလၢႆဝူင်ႈယဝ်ႉၶႃႈ။ ၽၵ်းၵိၼ် ၸိူဝ်းၼႆႉၵေႃႈ ဢမ်ႇမီးယဝ်ႉၶႃႈ။ ၵူၼ်းပၢႆႈ ၽေး ႁဝ်းၶႃႈ မီးၸိူင်ႉႁိုဝ်ၵေႃႈ ၵိၼ်ၵႂႃႇၸိူင်ႉၼၼ်ၵၼ်ၵူၺ်းၶႃႈယဝ်ႉ။ လူဝ်ႇတၢင်းၸွႆႈထႅမ်ႁႅင်းၶႃႈဢေႃႈ။ သင်ဝႃႈ ပီႈၼွင်ႉႁဝ်းၶႃႈ တီႈၸမ်ၵႆၸွႆႈ ၵမ်ႉ ထႅမ်ၶဝ်ႈမႃးထႅင်ႈၼႆ ႁဝ်းၶႃႈ ႁူမ်ၸူမ်းႁပ်ႉတွၼ်ႈယူႇၶႃႈ”- ဝႃႈၼႆ။

 ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတု ယၢမ်းလဵဝ်မီးႁူဝ်ၵူၼ်း 674 ၵေႃႉ လင်ႁိူၼ်း 164 လင် ပဵၼ်ၵူၼ်းဝၢၼ်ႈၼွင်လႅဝ်၊ ပၢင်ႇၵွင်းမူး၊ ၼမ်ႉႁူး၊ ဝၢၼ်ႈမႂ်ႇလၵ်းမႃႉ၊ ၵုင်းပဝ်းလႄႈ ၵုင်းလႅင်း ၸိူဝ်းၼႆႉ။

“ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉၼမ်တႄႉ ပဵၼ်ၵူၼ်းဝၢၼ်ႈၵုင်းလႅင်းတင်းၵုင်းပဝ်း ၊ ပၢင်ႇၵွင်းမူး၊ ၼမ်ႉႁူး ၸိူဝ်းၼႆႉၶႃႈ ဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 14/9/2021 ၼၼ်ႉမႃးသေ သိုၵ်း SSPP တင်း RCSS ပဵၼ်ပၢင်တိုၵ်းၵၼ် တၢင်းၼႂ်းဢိူင်ႇႁူဝ်ၶၢႆး မႃးႁၢဝ်ႈႁႅင်း။ ၽႄႈ လၢမ်းထိုင်ဢိူင်ႇပၢင်ႇၵေႇတု၊ ႁၢမ်းငၢႆး ၸိူဝ်းၼႆႉ  ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ၼပ်ႉႁူဝ်ႁဵင် လႆႈပၢႆႈၽေးသိုၵ်း။   ထိုင်ယၢမ်းလဵဝ် မီးၶၢဝ်းတၢင်းလိူၼ်ပၢႆယဝ်ႉ  ပႆႇလႆႈပွၵ်ႈၶိုၼ်းႁိူၼ်းယေး ။

မိူဝ်ႈဝႃး ဝၼ်းတီႈ 1/11/2021 ယၢမ်းၵၢင်ၼႂ် 9 မူင်း ထိုင် 2 မူင်းၶိုင်ႈဝၢႆးဝၼ်း သဵင်ၵွင်ႈတႅၵ်ႇတၢင်း ႁိမ်းဝၢၼ်ႈလွႆယွႆးလႄႈ ဝၢၼ်ႈၵုင်းပဝ်းထႅင်ႈ ၼႆယဝ်ႉ။