ၸုမ်းဢဵၼ်ႁႅင်းမႂ်ႇပၢႆးမွၼ်းတႆး ၵဵင်းမႆႇၸွႆႈထႅမ် ၵူၼ်းပၢႆႈၽေးသိုၵ်းတီႈမိူင်းၵိုင်

ၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး ၵဵင်းမႆႇ ႁူမ်ႈၵၼ်ၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇႁၢမ်းငၢႆး မိူင်းၵိုင် တႃႇငိုၼ်း 5 သႅၼ် ပျႃး။

မိူဝ်ႈဝၼ်းတီႈ 29/10/2021 ပူၼ်ႉမႃးၼႆ ယူႇတီႈၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး ဝဵင်းၵဵင်းမႆႇ ၸိုင်ႈထႆး ႁူမ်ႈငိုၼ်းတွင်းၵၼ် လၢႆၵေႃႉ လၢႆၾၢႆႇသေ ၸွႆႈထႅမ်ၵူၼ်းပၢႆႈၽေးသိုၵ်း တီႈဝတ်ႉၵွင်းမူးၶမ်း ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တႃႇငိုၼ်း 10,000 ဝၢတ်ႇ (မႅၼ်ႈငိုၼ်းမၢၼ်ႈ 5 သႅၼ်ပျႃး) ၼႆယဝ်ႉ။

ၸၢႆးပၢင်ႇ တူဝ်တႅၼ်း ၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈ ႁဝ်းၶႃႈ လုၵ်ႈၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး တင်းသဵင်ႈသေ ယဝ်ႉၵေႃႈ ၽူႈႁွင်ႉၵႂၢမ်းႁဝ်းၶႃႈ ထႅင်ႈလၢႆလၢႆၵေႃႉ၊ ပီႈၼွင်ႉႁႅင်းၵၢၼ်ႁဝ်းၶႃႈ ၸိူဝ်းဢမ်ႇၸႂ်ႈလုၵ်ႈၸုမ်းၵေႃႈပႃး လႆႈႁူမ်ႈငိုၼ်းၵၼ် ၵေႃႉ ဢိတ်းဢွတ်း ၼိုင်ႈၵေႃႈ 200 – 300 ဝၢတ်ႇ၊ 500 – 1,000 ဝၢတ်ႇ ႁူမ်ႈၵၼ် တင်းမူတ်း လႆႈငိုၼ်းၵမ်ႉၸွႆႈ 10,000 ဝၢတ်ႇသေ လႆႈၵမ်ႉ ၸွႆႈထႅမ်မိူဝ်းၶႃႈ”-  ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈတူဝ်တႅၼ်းၽူႈမီးပုၼ်ႈၽွၼ်း ၼႂ်းပိုၼ်ႉတီႈ တီႈဢိူင်ႇႁၢမ်းငၢႆး လႆႈႁပ်ႉပုၼ်ႈၽွၼ်းသေ ၸွႆႈထႅမ်ပၼ်ၵႂႃႇ တီႈၵူၼ်းပၢႆႈ ၽေးသိုၵ်း ဝတ်ႉၵွင်းမူးၶမ်း ဢၼ်မီးႁူဝ်ၵူၼ်း 100 ပၢႆၼၼ်ႉ တႃႇ 3 သႅၼ်ပျႃး။ ယဝ်ႉၵေႃႈ ၸွႆႈထႅမ် ပၼ်ၼႂ်းမူႇဝၢၼ်ႈတႃႇၸႂ်ႉတိုဝ်းၼႃႈဝၢၼ်ႈတႃႇသူၼ် ဝၢၼ်ႈၽႃလၢၼ်း တႃႇ ငိုၼ်း 2 သႅၼ်ပျႃး ၼႆယဝ်ႉ။

ဝၢႆးၼၼ်ႉ ဝၼ်း သွင်ဝၼ်း ၵူၼ်းပၢႆႈၽေးသိုၵ်းတီႈဝတ်ႉၵွင်းမူးၶမ်းလႄႈၼႂ်းဢိူင်ႇပၢင်ႇၵေႇတု တင်းမူတ်းဢွၼ်ၵၼ်ပွၵ်ႈႁိူၼ်းၶိုၼ်းၽႂ်မၼ်းယဝ်ႉ ဝႃႈၼႆ။

ၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး ၵဵင်းမႆႇၼႆႉ ၵမ်ႈၼမ် ပဵၼ်ဢဵၼ်ႁႅင်းၵူၼ်းၼုမ်ႇတႆး ၸိူဝ်းႁွတ်ႈၽႅဝ် ႁဵတ်းၵၢၼ်ယူႇဝႆႉ ၼႂ်းဝဵင်းၵဵင်းမႆႇသေ ၶွတ်ႇ ၽွတ်ႈၶိုၼ်ႈမႃး ၵမ်ႈၼမ် တေတူင်ႉၼိုင် ၾၢႆႇတၢင်းၵႃႈဝႅၼ် ႁိတ်ႈႁွႆးတႆး ယဝ်ႉၵေႃႈ ပၢႆးမွၼ်းတႆး ၸိူဝ်းၼႆႉ။

ယူႇတီႈၸုမ်းဢဵၼ်ႁႅင်းမႂ်ႇ ပၢႆးမွၼ်းတႆး ၵဵင်းမႆႇၼႆႉသေ တႄႇႁပ်ႉငိုၼ်းၵမ်ႉၸွႆႈၵူၼ်းပၢႆႈၽေးသိုၵ်းမႃး မိူဝ်ႈဝၼ်းတီႈ 8/10/2021 တေႃႇထိုင် ဝၼ်းတီႈ 25/10/2021 ၼႆယဝ်ႉ။