သိုၵ်းမၢၼ်ႈ ယိုဝ်းၵွင်ႈလူင် တိူဝ်ႉသႂ်ႇႁိူၼ်းၵူၼ်းဝၢၼ်ႈ လူႉၵွႆလင်ၼိုင်ႈ တီႈမိူင်းယေႃ

 သိုၵ်းမၢၼ်ႈ   ယိုဝ်းၵွင်ႈလူင်သႂ်ႇ ႁိူၼ်းယေးၵူၼ်းဝၢၼ်ႈ လူႉၵွႆလင်ၼိုင်ႈ တီႈထုင်ႉမိူင်းယေႃ ၸႄႈဝဵင်းလႃႈသဵဝ်ႈ။

မိူဝ်ႈဝႃး ဝၼ်းတီႈ 28/10/2021 ယၢမ်းဝၢႆးဝၼ်းမွၵ်ႈ 2 မူင်းပၢႆ ၶွင်ႇသီႇသိုၵ်းမၢၼ်ႈ ယိုတ်းမိူင်း ယူႇတီႈတပ်ႉပၢင်သဝ်းပျီႇတူႉၸိတ်ႉမၢၼ်ႈပၢင်ႇ ဢၼ်ပၵ်းဝႆႉတီႈမိူင်းယေႃၼႆႉသေ ယိုဝ်းမၢၵ်ႇလူင်သႂ်ႇ ႁိူၼ်းယေးၵူၼ်းဝၢၼ်ႈ တီႈဝၢၼ်ႈၵုၼ်ၽိဝ် ၾၢႆႇၸၢၼ်းမိူင်းယေႃ ၼႂ်းဢိူင်ႇမိူင်းယေႃ ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။

ၵူၼ်းမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ လုၵ်ႉတီႈတပ်ႉပျီႇတူႉၸိတ်ႉမၢၼ်ႈပၢင်ႇ မိူင်းယေႃၼႆႉ ယိုဝ်းမၢၵ်ႇလူင်ၵႂႃႇတၢင်း ဝၢၼ်ႈၵုၼ်ၽိဝ် တူၵ်းတႅၵ်ႇသႂ်ႇၼႂ်းဝၢင်းႁိူၼ်းၵူၼ်းဝၢၼ်ႈ လင်ၼိုင်ႈ လႆႈလူႉၵွႆၶႃႈဢေႃႈ။ ၸဝ်ႈႁိူၼ်းတႄႉလွတ်ႈၽေးၶႃႈ ”- ဝႃႈၼႆ။

ႁိူၼ်း ၵူၼ်းဝၢၼ်ႈၵုၼ်ၽိဝ် ဢၼ် မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇသႂ်ႇၼၼ်ႉ ပဵၼ်ႁိူၼ်း လုင်းပႃႉယၢဝ်းလႄႈ ပႃႈၶမ်းလႃႉ ၊ၸဝ်ႈႁိူၼ်းတႄႉပၢႆႈဝႆႉၸဵမ်ၸဝ်ႉယဝ်ႉလႄႈဢမ်ႇတၼ်းတိူဝ်ႉၼႆယဝ်ႉ။

ၼွၵ်ႈလိူဝ်ၼၼ်ႉ မိူဝ်ႈဝႃးဝၼ်းတီႈ 28 ၼႆႉ ရူတ်ႉၵႃးတၢင်ႇၵူၼ်းတၢင်ႇၵုၼ်ႇ ဢၼ်လုၵ်ႉတၢင်းလႃႈသဵဝ်ႈမႃးမိူင်းယေႃၼၼ်ႉ သိုၵ်းမၢၼ်ႈဢမ်ႇပၼ်ပူၼ်ႉသၢႆသိုၵ်း ဢၼ်ၶဝ်လုၵ်ႉလႃႈသဵဝ်ႈမႃးထႅမ်ႁႅင်းတၢင်းမိူင်းယေႃၼႆႉ။ ဢဝ်ရူတ်ႉၵႃးၵူၼ်းမိူင်းႁဵတ်းႁူဝ်ႉႁႄႉတႃႇၶဝ် ၼင်ႇႁိုဝ်ၾၢႆႇၸုမ်းဢူၺ်းလီတေဢမ်ႇၸၢင်ႈယိုဝ်းၶဝ်။ ယၢမ်းတဵင်ႈၶိုၼ်း ၵႃးၵူၼ်းမိူင်းၸင်ႇထိုင်မိူင်းယေႃ  – ၵူၼ်းမိူင်းယေႃလၢတ်ႈၼင်ႇၼႆ။

“ ၵႃးဢၼ်လုၵ်ႉလႃႈသဵဝ်ႈမႃးၼၼ်ႉ ၵၢင် ၶိုၼ်းလိုၵ်း 1 မူင်း  ၸင်ႇၽႅဝ် ႁိူၼ်းယေးၵၼ်ၶႃႈဢေႃႈ။ မိူဝ်ႈထူပ်းသိုၵ်းမၢၼ်ႈၼၼ်ႉ ၵူၼ်းမိူင်းၸဝ်ႈၵႃး ယွၼ်းပွၵ်ႈ ၶိုၼ်းလႃႈသဵဝ်ႈၵေႃႈ ဢမ်ႇပၼ် ယွၼ်းမႃးတၢင်းမိူင်းယေႃ ၵေႃႈဢမ်ႇလႆႈ မိူၼ်ဝႃႈ ဢဝ်ၵူၼ်းမိူင်းႁဵတ်းႁူဝ်ႉၶႄတူဝ်ပၼ်ၶဝ်ၵူၺ်းၶႃႈဢေႃႈ  ”- ၵူၼ်းပိုၼ်ႉတီႈ မိူင်းယေႃ သိုပ်ႇလၢတ်ႈၼႄၼင်ႇၼႆ။

ဢိူင်ႇမိူင်းယေႃၼႆႉ မီးၾၢႆႇဢွၵ်ႇဝဵင်းလႃႈလဵဝ်ႈ ယၢၼ်ၵၼ်ဝဵင်း 30 လၵ်းပၢႆ ပေႃးၼင်ႈ ရူတ်ႉၵႃးၸိုင် တေႁိုင်မွၵ်ႈ 1 ၸူဝ်ႈမူင်းပၢႆ  ။

ၼႂ်းၶၢဝ်းတၢင်း 2-3 ဝၼ်းမႃးၼႆႉ သိုၵ်းမၢၼ်ႈ ထႅမ်ႁႅင်းသိုၵ်း လုၵ်ႉလႃႈသဵဝ်ႈ မုင်ႈၸူးတင်းမိူင်းယေႃၼႆႉ တင်းၼမ်။ ၵူၺ်းၵႃႈ ႁႅင်းသိုၵ်းမၢၼ်ႈ ၸိူဝ်းၼၼ်ႉသမ်ႉ ႁၢႆတူဝ်မူၵ်းဝႆႉ ၸွမ်းၼႂ်းထိူၼ်ႇ။ မိူဝ်ႈသိုၼ်းၵေႃႈ သိုၵ်းမၢၼ်ႈ လုၵ်ႉတၢင်းဝၢၼ်ႈလူင်မူၼ်းသေ ယိုဝ်းမၢၵ်ႇလူင်ၵႂႃႇတၢင်းမိူင်းယေႃ ဢမ်ႇထၢတ်ႇ  ။