သိုၵ်းမၢၼ်ႈတဵၵ်းၸႂ်ႉၵူၼ်းမိူင်းၶဝ်ႈႁူမ်ႈ ပၢင်ၵမ်ႉထႅမ် သိုၵ်းမၢၼ်ႈ တီႈဝဵင်းႁူဝ်ပူင်း ၼိုင်ႈႁိူၼ်းလႂ် တေလႆႈၶဝ်ႈႁူမ်ႈ ၼိုင်ႈၵေႃႉ ၼႂ်းၵႄႈၶေႃႈသင်ႇ Semi Lockdown ဝဵင်းဝႆႉ သင်ဢမ်ႇၶဝ်ႈႁူမ်ႈၸိုင် တေထုၵ်ႇမႂ်ငိုၼ်း ၼိုင်ႈႁိူၼ်းလႂ် ၼိုင်ႈမိုၼ်ႇပျႃး။
မိူဝ်ႈၼႆႉ ဝၼ်းတီႈ 27/10/2021 ယၢမ်းၵၢင်ၼႂ် 8 မူင်း ပၢင်ၵမ်ႉထႅမ် တပ်ႉသိုၵ်းမၢၼ်ႈ တီႈၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆး ပွတ်းၸၢၼ်း တႄႇဢဝ်ၼႃႈၵျွင်းၽြႃး ဝဵင်းႁူဝ်ပူင်းသေ ပႆႁွတ်ႈထိုင်လၵ်းသဝ်ႁိၼ်ၵၢင်ဝဵင်း ၼိုင်ႈဝၢၼ်ႈလႂ် တေလႆႈၶဝ်ႈႁူမ်ႈ 100 ၵေႃႉ ပဵၼ် ၶေႃႈၸီႉသင်ႇတၢင်းၼိူဝ် လူင်းမႃး ၼႆယဝ်ႉ။
ၵူၼ်းပိုၼ်ႉတီႈ ႁူဝ်ပူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်တဵၵ်းတဵင်ၵူၼ်းဝၢၼ်ႈႁႂ်ႈၵႂႃႇၶဝ်ႈႁူမ်ႈၶႃႈဢေႃႈ ဢမ်ႇၵႂႃႇဢမ်ႇလႆႈၶႃႈ။ ၼိုင်ႈ ႁိူၼ်းလႂ် ၼိုင်ႈၵေႃႉ။ သင်ဢမ်ႇၵႂႃႇ တေထုၵ်ႇမႂ်ငိုၼ်း ၼိုင်ႈႁိူၼ်းလႂ် ၼိုင်ႈမိုၼ်ႇပျႃးၶႃႈ။ ၼိုင်ႈဝၢၼ်ႈလႂ် ႁႂ်ႈသူင်ႇႁႅင်းၵူၼ်းၶဝ်ႈႁူမ်ႈ 100 ၵေႃႉၼႆ ၶႃႈ လႆႈငိၼ်းဝႆႉၸိူင်ႉၼႆ”- ဝႃႈၼႆ။
ပၢင်ၵမ်ႉထႅမ် တပ်ႉသိုၵ်းမၢၼ်ႈ ၼႂ်းၸႄႈဝဵင်းႁူဝ်ပူင်းမိူဝ်ႈၼႆႉၵူၼ်းဢၼ်ၵႂႃႇၶဝ်ႈ ႁူမ်ႈ ၵမ်ႈၼမ်ပဵၼ်ၵူၼ်းပိုၼ်ႉတီႈ သၢႆဝၢၼ်ႈၼွၵ်ႈၼႃးပၢင်ႇ ၸွမ်းႁိမ်းႁွမ်းဝဵင်းႁူဝ်ပူင်း ။ ၵမ်ႈၼမ်ပဵၼ်ၼႃႈႁိူၼ်းၼႂ်းတပ်ႉသိုၵ်းမၢၼ်ႈလႄႈ ပလိၵ်ႈမၢၼ်ႈ ၸိူဝ်းၼႆႉၵူၺ်း ဝႃႈၼႆ။
“ဢဵၼ်ႁႅင်းၵူၼ်းၶဝ်ႈႁူမ်ႈတႄႉ မီးမွၵ်ႈ 500 ပၢႆ ။ ၵူၼ်းတိတ်းၸပ်း ယူႇၸမ်ၵၼ်ၼမ်တၢၼ်ႇၼႆႉ တၢင်းပဵၼ်ၶူဝ်ႊဝိတ်ႉတႄႉ တေၸၢင်ႈၽႄႈ လၢမ်းထႅင်ႈယူႇၶႃႈ။ လႆႈငိၼ်းဝႃႈ ၶဝ်ပၼ်ပႃးၵႃႈၸၢင်ႈ ၶဝ်ႈႁူမ်ႈပၢင်ၵမ်ႉထႅမ်ၼၼ်ႉပႃး ၵူၺ်းၵႃႈ ၼိုင်ႈၵေႃႉလႂ် လႆႈႁပ်ႉၵႃႈႁိုဝ်တႄႉ ဢမ်ႇႁူႉၶႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ထႅင်ႈၾၢႆႇၼိုင်ႈၵေႃႈ ၼႂ်းၸႄႈဝဵင်းႁူဝ်ပူင်းၼႆႉ ဝၢႆးသေ ပူၼ်ႉၶၢပ်ႈတူဝ် ၸဝ်ႈသၢင်ႇဢွၼ်ႇ (ကိုရင်လေး) မႃး ၵူၼ်းမိူင်း ၸပ်းတၢင်းပဵၼ်ၶူဝ်ႊဝိတ်ႉ 19 ၼိုင်ႈဝၼ်းဢမ်ႇယွမ်း 10 ၵေႃႉ၊ ႁၼ်ၵူႈဝၼ်း၊ တေႃႇထိုင်ယၢမ်းလဵဝ် ၵူၼ်းၸပ်းတၢင်းပဵၼ်ၼႂ်းဝဵင်းႁူဝ်ပူင်း ဢမ်ႇယွမ်း 1000 ၵေႃႈယဝ်ႉ။ ဢၼ်တၢႆၵေႃႈ ဢမ်ႇယွမ်း 20 ၵေႃႉယဝ်ႉ လႆႈႁူႉၸွမ်းၾၢႆႇပၢႆးယူႇလီၼင်ႇၼႆ။
ၵွပ်ႈၼႆလႄႈ ၼႂ်းၸႄႈဝဵင်းႁူဝ်ပူင်းၼႆႉ ယၢမ်းလဵဝ်ထုၵ်ႇပိၵ်ႉဢိုတ်းၸူဝ်ႈၶၢဝ်း Semi Lockdown ဝႆႉ တႄႇဢဝ်ဝၼ်းတီႈ 19/10/2021 တေႃႇထိုင် 2/11/2021 ၼႆယဝ်ႉ။
ၵူၼ်းၼုမ်ႇ ႁူဝ်ပူင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈလဵဝ် တီႈဝဵင်းႁူဝ်ပူင်းၼႆႉ Lockdown ဝႆႉ ၸူဝ်ႈၶၢဝ်း။ ၽွင်းတၢင်းပဵၼ်ၶူဝ်ႊဝိတ်ႉ 19 ၼႆႉ တပ်ႉသိုၵ်းမၢၼ်ႈသမ်ႉ တဵၵ်းၵူၼ်းမိူင်း ႁဵတ်းပၢင်ၵမ်ႉထႅမ်ၶဝ်ၸိူင်ႉၼႆ ဢမ်ႇၵႂႃႇဢမ်ႇလႆႈ တဵၵ်းၸႂ်ႉႁႂ်ႈၵူၼ်းမိူင်းၵႂႃႇ မိူၼ်တင်းဝႃႈ ဢဝ်တၢင်းပဵၼ်ၼႆႉ ၽႄႈလၢမ်း ထႅင်ႈၵူၺ်း။ ယၢမ်းလဵဝ် ဢမ်ႇၸႂ်ႈထုၵ်ႇလီႁဵတ်းလႄႈ ႁဵတ်းၵႂႃႇၼႆႉ ၶႅၼ်းႁဵတ်းႁႂ်ႈ သရေႇၼႃႈတႃၶဝ် တူၵ်းထႅင်ႈၵူၺ်းၶႃႈယဝ်ႉ”- ဝႃႈၼႆ။
ယၢမ်းလဵဝ် ၸႄႈဝဵင်းႁူဝ်ပူင်းၼႆႉ ထုၵ်ႇပိၵ်ႉဢိုတ်းဝႆႉ ၸူဝ်ႈၶၢဝ်း၊ ၼိုင်ႈႁိူၼ်းလႂ် လႆႈၶႂၢင်ႉဢွၵ်ႇႁိူၼ်းၼိုင်ႈၵေႃႉ ၵူၺ်း၊ တၵ်းတေလႆႈမီးဝႂ်ၶႂၢင်ႉဢွၵ်ႇႁိူၼ်းၵွၼ်ႇၸင်ႇဢွၵ်ႇႁိူၼ်း။ ပိူင်လူင်လႆႈၶႂၢင်ႉဢွၵ်ႇႁိူၼ်း တွၼ်ႈၵၢင်ၼႂ် ၊ ယၢမ်းဝၢႆးဝၼ်း 1 မူင်းပူၼ်ႉၵႂႃႇၼႆ တေဢမ်ႇလႆႈဢွၵ်ႇႁိူၼ်းယေးၵၼ်ယဝ်ႉ ယူႇတီႈၽူႈမီးပုၼ်ႈၽွၼ်း ၾၢႆႇပၢႆးယူႇလီၶဝ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ၼႂ်းၸိုင်ႈတႆး ဢၼ်ၸတ်းႁဵတ်းပၢင်ၵမ်ႉထႅမ် တပ်ႉသိုၵ်းမၢၼ်ႈမႃးယဝ်ႉၼႆႉ ပဵၼ်ၸႄႈဝဵင်းလႃႈသဵဝ်ႈ၊ တၢင်ႉယၢၼ်း၊ လွႆလႅမ်လႄႈ မိူင်းတူၼ် ၸိူဝ်းၼႆႉ။
ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ တႄႇဢဝ်ဝၼ်းတီႈ 1/2/2021 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 25/10/2021 ၼႆႉ တီႉၺွပ်းၵူၼ်းမိူင်း 9200 ပၢႆ ၶႃႈႁႅမ်တၢႆ 1,200 ပၢႆ။ ဝၼ်းဢွၵ်ႇဝႃႇၼၼ်ႉ ပွႆႇပၼ်ၶိုၼ်းၵူၼ်းတူၵ်းၶွၵ်ႈ 1000 ပႆ ၊ ပူတ်းပွႆႇပၼ်ၸိူဝ်းဢဝ်လိူင်ႈဝႆႈ 4000 ပၢႆ။ ဢၼ်ပႆႇပူၼ်ႉလွတ်ႈမႃးယင်းတိုၵ်ႉမီးတင်းၼမ် ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP ပိုၼ်ၽၢဝ်ႇဢွၵ်ႇဝႆႉၼင်ႇၼႆ။