မီးၸုမ်းယိပ်းၵွင်ႈၵၢင်ႇ ဢမ်ႇႁူႉၾၢႆႇ ပႂ်ႉငွႆးယိုဝ်းသၢႆသိုၵ်းမၢၼ်ႈ ၼိူဝ်သဵၼ်ႈတၢင်းလူင် လႃႈသဵဝ်ႈ – မူႇၸေႊ ႁၢဝ်ႈႁႅင်း  ။

မိူဝ်ႈဝႃး ဝၼ်းတီႈ 26/10/2021 ယၢမ်းဝၢႆးဝၼ်း မွၵ်ႈ 4:45 မူင်း မီးၸုမ်းယိပ်းၵွင်ႈၵၢင်ႇ ဢမ်ႇႁူႉၾၢႆႇ ယူႇၼိူဝ်လွႆ ၾၢႆႇတူၵ်းဝၢၼ်ႈမေႃႈတွင်းသေ ငွႆးယိုဝ်းသႂ်ႇ ၵႃးသိုၵ်းမၢၼ်ႈ/ သၢႆသိုၵ်းမၢၼ်ႈ ဢၼ်လုၵ်ႉတၢင်းလႃႈသဵဝ်ႈ ၶိုၼ်ႈမႃး တၢင်းမူႇၸေႊ ၼိူဝ်သဵၼ်ႈတၢင်းလူင် ၼႂ်းၵႄႈဝၢၼ်ႈမေႃႈတွင်း – ၵွင်းဝႅတ်ႈ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၺႃးယိုဝ်းႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ပွတ်းတွၼ်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵႃးသိုၵ်းမၢၼ်ႈ ထႅမ်ႁႅင်းသိုၵ်းၶိုၼ်ႈမႃးတၢင်းမူႇၸေႊၼႆႉ ထုၵ်ႇၺႃး ယိုဝ်း 5 လမ်း သွင်ၾၢႆႇပဵၼ်ပၢင်တိုၵ်းၵၼ် ႁိုင် 20 မိၼိတ်ႉၼႆႉ။ သိုၵ်းမၢၼ်ႈ ဢဝ်ၵွင်ႈလူင်ယိုဝ်းတႅၼ်ႇသႂ်ႇ ၸွမ်းၵွင်းလွႆၸိူဝ်းၼၼ်ႉၶိုၼ်း ႁၢဝ်ႈႁႅင်းၶႃႈ။ ႁဝ်းၶႃႈ ယူႇၼႂ်းႁိူၼ်းသေ ထွမ်ႇသဵင်ၵွင်ႈတႅၵ်ႇယူႇ ဢမ်ႇႁတ်းဢွၵ်ႇႁိူၼ်းၶႃႈ။ ၸွမ်းၼႂ်းဝၢၼ်ႈၸိူဝ်းၼႆႉ ပဵၼ်သိုၵ်းမၢၼ်ႈ ပေႃးတဵမ်ၵႂႃႇမူတ်း ၶႃႈ။ ယူႇၵမ်းၼိုင်ႈသေ ၶဝ်ၶိုၼ်းထွႆဢွၵ်ႇဝၢၼ်ႈ ၵႂႃႇမူၵ်းဝႆႉၸွမ်းႁၢၼ်ႉၶၢႆၼမ်ႉမၼ်း၊ ၼႂ်းၵႄႈၵႃးလူင် ၸွမ်းသဵၼ်ႈတၢင်းလူင် ၸိူဝ်းၼၼ်ႉဝႆႉၶႃႈ ဢေႃႈ။ လွင်ႈၵူၼ်းၶဝ် မၢတ်ႇၸဵပ်းလူႉတၢႆတႄႉ ဢမ်ႇႁၼ်မီးၶႃႈ”- ဝႃႈၼႆ။

ဝၢႆးသေ သွင်ၸုမ်း ပဵၼ်ပၢင်တိုၵ်းၵၼ်ယဝ်ႉၼၼ်ႉ ဢဵၼ်ႁႅင်းသိုၵ်းမၢၼ်ႈ  လုၵ်ႉတၢင်းလႃႈသဵဝ်ႈ ၶိုၼ်ႈ ၵႂႃႇတၢင်းမူႇၸေႊ ထႅင်ႈၵႃးမွၵ်ႈ 20 လမ်းၼႆႉ ဢဵၼ်ႁႅင်းၵူၼ်း ဢမ်ႇယွမ်းမွၵ်ႈ 400-500။   လုၵ်ႉဢဝ်တီႈပၢင်တိုၵ်းၵၼ်ၼၼ်ႉသေ  ၶိုၼ်းသိုပ်ႇပႆတၢင်းၶိုၼ်ႈၵႂႃႇတၢင်း မူႇၸေႊ – 105 လၵ်း ၼႆယဝ်ႉ။

“တႄႇဢဝ် ၶဝ်ပဵၼ်ပၢင်တိုၵ်းၵၼ်မႃးယဝ်ႉၼၼ်ႉ သၢႆသိုၵ်းမၢၼ်ႈ ၸိူဝ်းၼႆႉ ဢမ်ႇသိုပ်ႇၶီႇၵႃးယဝ်ႉ ဢွၼ်ၵၼ်ပႆပဵၼ်ထႅဝ် လူင် ၶိုၼ်ႈၵႂႃႇ ၶႃႈဢေႃႈ။ လႅပ်ႈၶဝ်တေၵႂႃႇထႅမ်ႁႅင်းသိုၵ်း တၢင်းမိူင်းၵူဝ်း၊ ပၢင်ႇသၢႆး လႄႈ 105 လၵ်း ၸိူဝ်းၼႆႉ။ သၢႆသိုၵ်းမၢၼ်ႈၼၼ်ႉၵေႃႈ ပဵၼ်တပ်ႉသင် ၸိူဝ်း ၼႆႉႁဝ်းၶႃႈ ဢမ်ႇလႆႈႁူႉ  ၊ယွၼ်ႉပဵၼ်ႁူဝ်ၶမ်ႈၶၢဝ်းလပ်းသိင်ႇယဝ်ႉလႄႈ”-  ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ဢွင်ႈတီႈ ပွတ်းတွၼ်ႈၼၼ်ႉ ၵမ်ႈၼမ် ၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးယူႇဝႆႉသမ်ႉ ပဵၼ်ၸုမ်းသိုၵ်းၶၢင် KIA လႄႈ သိုၵ်းတဢၢင်း TNLA ၸိူဝ်းၼႆႉ ၵူၼ်းပိုၼ်ႉတီႈလၢတ်ႈ။

ၼွၵ်ႈလိူဝ်ၼၼ်ႉ ၼႂ်းဝဵင်းပၢင်ႇသၢႆးၵေႃႈ ၶွင်ႇသီႇသိုၵ်းမၢၼ်ႈ တင်း ၵူဝ်းၵၢင်ႉ MNDAA ပဵၼ်ပၢင်တိုၵ်းႁၢဝ်ႈႁႅင်း မႃးႁၢဝ်ႈႁႅင်း သိုၵ်းမၢၼ်ႈ ဢဝ် ၵွင်ႈယိုဝ်းသႂ်ႇ ၸွမ်းႁိူၼ်းယေး ၵူၼ်းဝၢၼ်ႈမႂ်ႇ လႆႈလူႉၵွႆၸွမ်း မွၵ်ႈ 5 လင် မိူဝ်ႈပူၼ်ႉမႃး မိူဝ်ႈဝၼ်းတီႈ 25 ယၢမ်းၵၢင်ၶိုၼ်း မွၵ်ႈ 10 မူင်း ၼႆယဝ်ႉ။