ပၢင်တိုၵ်းသိုၵ်းသိူဝ် ၼႂ်းပိုၼ်ႉတီႈ ပႆႇၼိမ်၊ ပဵၼ်ၶၢဝ်းလူဝ်ႇ ပၢတ်ႇၶဝ်ႈသႂ်ႇယွင် သႂ်ႇယေး မႆႈၸႂ် ႁႆႈၼႃး ႁိူၼ်းယေး လႄႈ ၵူၼ်းပၢႆႈၽေး ဢၼ်မႃးမီး ပၢင်ႇၵေႇတု တင်း ႁၢမ်းငၢႆး ၸႄႈဝဵင်းမိူင်းၵိုင်ၼၼ်ႉ ပွၵ်ႈမိူဝ်းဝၢၼ်ႈၶိုၼ်းၽွင်ႈ။
ဝၼ်းတီႈ 22/10/2021 ၼႆႉ ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ တီႈဢိူင်ႇပၢင်ႇၵေႇတု ႁူဝ်ၵူၼ်း 2000 ပၢႆ ၼၼ်ႉ ယၢမ်းလဵဝ် ၵိုတ်း 1000 ပၢႆ ၊ ၼႂ်းဢိူင်ႇႁၢမ်းငၢႆး ဢၼ်မီးၵူၼ်းပၢႆႈၽေးပၢင်တိုၵ်း ႁူဝ်ၵူၼ်းႁိမ်းႁဵင်ၼၼ်ႉ ယၢမ်းလဵဝ် တီႈဝတ်ႉၵုင်းၸူင် မီး194 ၵေႃႉ၊ တီႈဝတ်ႉၵွင်းမူးမီး 166 ၵေႃႉ ၵူၺ်းယဝ်ႉ – ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇႁၢမ်းငၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉၵေႃႈ မိူဝ်းထႅင်ႈဢိတ်း ဢွတ်းၶႃႈ။ ၵမ်ႈၼမ် ဢၼ်ပွၵ်ႈမိူဝ်းၵၼ်တႄႉ ယွၼ်ႉမႆႈၸႂ်တႃႇပၢတ်ႇၶဝ်ႈ၊ ပေႃႉၶဝ်ႈ၊ သမ်ႉၵူဝ်ဝူဝ်းၵႂၢႆး ၶဝ်ႈတဝ်၊ သမ်ႉမႆႈ ၸႂ် ဝူဝ်းၵႂၢႆး ဢွၼ်ႇၶဝ် ၼၼ်ႉၶႃႈၼႃႇ ” – ဝႃႈၼႆ။
တီႈၵူၼ်းပၢႆႈၽေးသိုၵ်း ၼႂ်းဢိူင်ႇပၢင်ႇၵေႇတုၵေႃႈ ဢွၼ်ၵၼ်ပွၵ်ႈၶိုၼ်းႁိူၼ်းယေး ၵမ်ႈၽွင်ႈ တင်ႈတႄႇ ဝၼ်းတီႈ 20 ၼႆႉမႃး။ ယၢမ်းလဵဝ်တီႈပၢင်ႇၵေႇတု ၵိုတ်းဝႆႉႁူဝ်ၵူၼ်းမွၵ်ႈ 1,069 ၵေႃႉ ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တီႈပၢင်ၵေႇတုတႄႉ ယၢမ်းလဵဝ် ၵိုတ်းဝႆႉ ႁူဝ်ၵူၼ်း 1,069 ၵေႃႉ ပဵၼ် သဵၼ်ႈမၢႆ ဝၼ်းတီႈ 21 ယၢမ်းႁူဝ်ၶမ်ႈ မိူဝ်ႈဝႃး ၼႆႉၶႃႈ။ မိူဝ်ႈၼႆႉ ပွၵ်ႈမိူဝ်းၵၼ် ထႅင်ႈၵႃႈႁိုဝ်တႄႉ ပႆႇလႆႈႁူႉၶႃႈ။ ဢၼ်ပွၵ်ႈမိူဝ်းတႄႉၵမ်ႈၼမ် ပဵၼ် ၵူၼ်းၼႂ်းဢိူင်ႇႁူဝ်ၶၢႆးဢေႃႈ”– ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉ ၼႂ်းဢိူင်ႇပၢင်ႇၵေႇတုတင်း ႁၢမ်းငၢႆးတႄႉ တင်းမူတ်း ႁူမ်ႈၵၼ်မီး 1,429 ၵေႃႉ။
တီႈၵူၼ်းပၢႆႈၽေးသိုၵ်း ၼႂ်းဢိူင်ႇပၢင်ႇၵေႇတု လူဝ်ႇတၢင်းၸွႆႈထႅမ်ထႅင်ႈ ၼမ်ႉမၼ်းၵိၼ်၊ ၽွင်ဝၢၼ်၊ ယႃႈယႃ လႄႈ ၽၵ်းႁႅင်ႈ ၸိူဝ်းၼႆႉ ၽူႈၸွႆႈထႅမ် ၵူၼ်းပၢႆႈၽေး သိုၵ်း ၸႄႈဝဵင်းမိူင်းၵိုင်လၢတ်ႈ။
“ပၢင်တိုၵ်းၵေႃႈ ပႆႇယဵၼ်ၶႃႈ၊ ပေႃးၾၢႆႇၼိုင်ႈ လွမ်ငွႆးယိုဝ်း၊ ၾၢႆႇၼိုင်ႈသမ်ႉထႅမ် ႁႅင်းသိုၵ်းသေ လိုပ်ႈလမ်းထႅင်ႈ။ ပေႃးၼၼ် ၵုမ်ႇလိုပ်ႈၵၼ်လမ်းၵၼ်၊ ၸုမ်းလႂ်ထၢင်ႇထိူမ်ၽႂ်ၵေႃႈတီႉ၊ ယၢပ်ႇၼႃႇၶႃႈ။ ပေႃးလူဝ်ႇ ၶၢၼ်း ၶဝ်ႈ/ငိုၼ်း ၵေႃႈ သမ်ႉတေမႃးၶၢၼ်းထႅင်ႈ၊ ၶဝ်သမ်ႉယိုဝ်းၵၼ်လႄႈ တႃႇမိူဝ်းပၢတ်ႇၶဝ်ႈ ပေႃႉၶဝ်ႈၵေႃႈယၢပ်ႇ” – ၵူၼ်းၼုမ်ႇ ဢၼ်မႃးမီးတီႈမိူင်းၵိုင်ၵေႃႉၼိုင်ႈလၢတ်ႈၼင်ႇၼႆ။
တႄႇဢဝ် ဝၼ်းတီႈ 14/9/2021 ၼၼ်ႉမႃးသေ သိုၵ်း SSPP တင်း RCSS ပဵၼ်ပၢင်တိုၵ်းၵၼ် ၼႂ်းဢိူင်ႇႁူဝ်ၶၢႆး၊ ၵူၼ်းၼႂ်းပိုၼ်ႉတီႈ ၼပ်ႉႁဵင် လႆႈဝႆႉ မႃႉ လႃး ဝူဝ်း ၵႂၢႆး သေ ပၢႆႈ – တေႃႇယၢမ်းလဵဝ် မီး လိူၼ်ပၢႆ ငဝ်းလၢႆးသိုၵ်းသိူဝ် ယင်းပႆႇယဵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ