ၶၢဝ်းတၢင်းၸမ်လိူၼ် ပၢင်တိုၵ်းယင်းတိုၵ်ႉပဵၼ်ယူႇလႄႈ ၵူၼ်းမိူင်းၵိုင်ဢၼ်လႆႈပၢႆႈၽေးသိုၵ်း ႁူဝ်ၵူၼ်း 3 ႁဵင်ပၢႆၼၼ်ႉ ပႆႇၸၢင်ႈပွၵ်ႈႁိူၼ်းယေးဝၢၼ်ႈဢိူင်ႇၸဝ်ႈၵဝ်ႇၶိုၼ်း။
တႄႇဢဝ် ဝၼ်းတီႈ 14/9/2021 မႃး တေႃႇထိုင် မိူဝ်ႈၼႆႉ ဝၼ်းတီႈ 11/10/2021 ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ပၢင်တိုၵ်း ၼႂ်းၵႄႈ SSPP တင်း RCSS ပဵၼ်ႁၢဝ်ႈႁႅင်း တေႃႇထိုင်ယၢမ်းလဵဝ် ယင်းတိုၵ်ႉၽႄႈလၢမ်း ပဵၼ်လၢႆတီႈလႄႈၵူၼ်းပၢႆႈၽေးသိုၵ်း 3 ႁဵင်ပၢႆ ပႆႇၸၢင်ႈပွၵ်ႈႁိူၼ်းယေး ၊တႄႇယၢပ်ႇၽိုတ်ႇၶဝ်ႈၼမ်ႉတၢင်းၵိၼ် မႃး လႆႈႁူႉၼင်ႇၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းမိူင်းၵိုင် လၢတ်ႈ ၽူႈတွႆႇႁွၵ်ႈဝႃႈ – “မိူဝ်ႈသိုၼ်းၼၼ်ႉ သဵင်ၵွင်ႈၸၢၵ်ႈ ၵွင်ႈလူင် ၵွင်ႈဢွၼ်ႇ တိုၵ်ႉ မေႃးယူႇ။ မိူဝ်ႈဝႃးတႄႉ ယဵၼ်ၵႂႃႇယဝ်ႉ။ မိူဝ်ႈၼႆႉၵၢင်ၼႂ်ၵေႃႈ ယဵၼ်ဝႆႉ။ ပၢင်တိုၵ်းၼႆႉ ၸမ်တေတဵမ်ၼိုင်ႈလိူၼ်ယဝ်ႉ ပေႃးထိုင် ဝၼ်းတီႈ 14 ၼႆႉ တဵမ် ၼိုင်ႈလိူၼ်ယဝ်ႉ။ ၵူၼ်းပွတ်းဢိူင်ႇႁူဝ်ၶၢႆး ၵမ်ႈၽွင်ႈပွၵ်ႈၶိုၼ်း ယွၼ်ႉဝႃႈပၢင်တိုၵ်းယဵၼ်ဝႆႉၼႂ်းထုင်ႉၼၼ်ႉ ။ ယၢမ်းလဵဝ်ပၢင်တိုၵ်းပဵၼ်တၢင်းဢိူင်ႇပၢင်ႇၵေႇတုၼႆႉ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပွၵ်ႈႁိူၼ်းယေးၵၼ် ၵမ်ႈၼမ်တႄႉ တေပဵၼ်ၵူၼ်းၼႂ်းဢိူင်ႇႁူဝ်ၶၢႆးလႄႈ ႁၢမ်းငၢႆး ။ ၸိူဝ်းပၢႆႈမႃးသွၼ်ႈဝႆႉ ၸွမ်းသၢပ်ႇဝဵင်းၵမ်ႈၽွင်ႈၵေႃႈ တေဢွၼ်ၵၼ်ပွၵ်ႈၶိုၼ်းၵေႃႈမီး – ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼင်ႇၼႆ။
“ၵူၺ်းၵႃႈ ၸိူဝ်းၶဝ်ပွၵ်ႈၶိုၼ်းႁိူၼ်းၵေႃႈ ပႆႇႁတ်းၵႂႃႇသူၼ်ၵႂႃႇႁိူၵ်ႈၵၼ်ၶႃႈ။ ယွၼ်ႉပိူဝ်ႈတီႈသူၼ်ၶဝ်ၵူဝ်မီးမၢၵ်ႇဢၼ်ႁၢင်ႈၵၢင်ဝႆႉ ၼႆၶႃႈဢေႃႈ”- မၼ်းၸၢႆးသိုပ်ႇ လၢတ်ႈထႅင်ႈၼင်ႇၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉသမ်ႉ တီႈဢိူင်ႇပၢင်ႇၵေႇတု လင်ၶႃးႁိူၼ်း 485 လင် ႁူဝ်ၵူၼ်း 2,138 ၵေႃႉ။ တီႈဢိူင်ႇႁၢမ်းငၢႆး ႁူဝ် ၵူၼ်း မွၵ်ႈ 1 ႁဵင် သွင်တီႈ ႁူမ်ႈၵၼ် တေမီး 3 ႁဵင်ပၢႆ ယင်းတိုၵ်ႉပႆႇၸၢင်ႈပွၵ်ႈၶိုၼ်းဝၢၼ်ႈၽႂ်မၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ