ပီႈၼွင်ႉၸၢဝ်းတႆး ၸိူဝ်းႁွတ်ႈၽႅဝ်ယူႇဝႆႉ မိူင်းဢမေႊရိၵၼ်ႊ ႁူမ်ႈၵၼ်သေ ၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းတႆးလႄႈ မိူင်းယၢင်းလႅင် ။
မိူဝ်ႈဝႃး ဝၼ်းတီႈ 10/10/2021 ယူႇတီႈမူႇၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇ/ အမေရိကန်သျှမ်းတိုင်းရင်းသားများအဖွဲ့ (SHAN AMERICAN COMMUNITY) လႆႈၵမ်ႉၸွႆႈထႅမ်မႃး တႃႇၵူၼ်းပၢႆႈၽေးသိုၵ်း ၼႂ်းၸႄႈဝဵင်း မိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း တႃႇငိုၼ်း 50 သႅၼ်ပျႃး ၼႆယဝ်ႉ။
ၸၢႆးၼေႃႇ ၽူႈတၢင်တူဝ် မူႇၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇ လၢတ်ႈၼႄၽူႈတွႆႇႁွၵ်ႈဝႃႈ -“ ႁဝ်းၶႃႈ ပီႈၼွင်ႉတႆး တီႈမိူင်းဢမေႊရိၵၼ်ႊ ႁူမ်ႈၵၼ်သေ ႁႃငိုၼ်းၵွင်ၵၢင်။ ယဝ်ႉၵေႃႈ ၸိူဝ်းႁဝ်းၶႃႈ ပီႈၼွင်ႉတႆး ယူႇႁိမ်းႁွမ်းၵၼ်ၸိူဝ်းၼႆႉသေ ၸူႉတုမ်ၵၼ်သေ ၸွႆႈထႅမ်ပႃးထႅင်ႈ။ တီႈမိူင်း ၵိုင်ၼႆႉ ႁဝ်းၶႃႈ ႁူမ်ႈၵၼ် ၸွႆႈထႅမ်ၵႂႃႇ ပွၵ်ႈၼႆႉ 50 သႅၼ်ပျႃးၶႃႈ။ သိုဝ်ႉၶဝ်ႈသၢၼ်၊ ၼမ်ႉမၼ်း၊ ႁူဝ်မီႇ၊ ၶွင်ၵိၼ်ယႅမ်ႉ တႃႇၵူၼ်းပၢႆႈ ၽေးႁဝ်းၶႃႈ ငိၼ်းဝႃႈ မိူဝ်ႈၼႆႉ ဝၼ်းတီႈ 11 တေတေႃႉမိူဝ်းၸႅၵ်ႇပၼ် တီႈပီႈၼွင်ႉၵူၼ်းပၢႆႈၽေးသိုၵ်းႁဝ်းၶႃႈယဝ်ႉ”- ဝႃႈၼႆ။
ယူႇတီႈမူႇၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇၼႆႉသေ ၸွႆႈထႅမ်ထိုင်မႃး ၵူၼ်းပၢႆႈၽေးသိုၵ်း တၢင်းဝဵင်းလၢႆးၶႃႈ၊ ၵေးသီး၊ မိူင်းၵိုင်၊ ၵျွၵ်ႉမႄး လႄႈ ႁူင်းႁဵၼ်း ၸိူဝ်ႉၸၢတ်ႈတႆး ထုင်ႉယိူင်း ၼႂ်းမိူင်းတႆးၵူၺ်းဢမ်ႇၵႃး ၸွႆႈထႅမ်ပၼ်ပႃး ပီႈၼွင်ႉတႆး ၼႂ်းမိူင်းယၢင်းလႅင်ထႅင်ႈ တင်းမူတ်းၸွႆႈထႅမ်ယဝ်ႉ 8 ပွၵ်ႈ။ ႁူမ်ႈငိုၼ်းၸွႆႈထႅမ်မႃးတင်းမူတ်းမီး 200 သႅၼ်ပျႃး ပၢႆယဝ်ႉ လႆႈႁူႉၼင်ႇၼႆ။
“ဢၼ်ႁဝ်းၶႃႈ ၸွႆႈထႅမ်ၵႂႃႇ ၸိူဝ်းၼၼ်ႉ ၼိုင်ႈတီႈလႂ် 30 သႅၼ် 40 သႅၼ် 50 သႅၼ်။ တၢင်းမိူင်းယၢင်းလႅင်တႄႉ ႁဝ်းၶႃႈ ၸွႆႈၵႂႃႇ တေမီး 3-4 ပွၵ်ႈယဝ်ႉၶႃႈ။ ယွၼ်ႉဝႃႈ ႁဝ်းၶႃႈ မီးပုၼ်ႈၽွၼ်း ၵူႈၵေႃႉသေ ၸင်ႇဢုပ်ႇဢူဝ်းၵၼ် ၵဵပ်းငိုၼ်းၵၼ်သေ ႁူမ်ႈၸွႆႈထႅမ်ၵႂႃႇၶႃႈဢေႃႈ”- ၸၢႆးၼေႃႇ သိုပ်ႇလၢတ်ႈၼႄၼင်ႇၼႆ။
သင်ဝႃႈ ပီႈၼွင်ႉတႆး ၵူၼ်းမိူင်းတႆး ၵူႈၵေႃႉ ၸိူဝ်းႁွတ်ႈၽႅဝ်ဝႆႉ ၼွၵ်ႈမိူင်း ၶႂ်ႈႁူမ်ႈလူႇၸွႆႈထႅမ်ၸွမ်းၼႆၸိုင် ၵပ်းသိုပ်ႇ လႆႈတီႈ မူႇၸုမ်းၸၢဝ်းၶိူဝ်းတႆး မိူင်းဢမေရိၵၢၼ်ႇၵေႃႈလႆႈ Email : [email protected]/ ဢမ်ႇၼၼ် မၢႆၾူၼ်း (517) 803-8231, ဢမ်ႇၼၼ် (856) 668-6681 ၵေႃႈလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ