ၸွမ်သိုၵ်း ထုၼ်းထုၼ်းၼွင်ႇ ၽွင်းလူင်ၾၢႆႇလႅၼ်လိၼ် ၶွင်ႇသီႇသိုၵ်းမၢၼ်ႈ လၢတ်ႈ ၵူၼ်းဝၢၼ်ႈၵူၼ်းမိူင်း ၶၢဝ်းတၢင်းဝဵင်းပူႇထဝ်ႈ (ပူႇတႃႇဢူဝ်ႇ) မိူင်းၶၢင် ဝႃႈ ယႃႇတူၺ်း ယႃႇထွမ်ႇၶၢဝ်ႇ BBC, VOA, DVB ၸိူဝ်းၼႆႉ ဝႃႈၼႆ။
ဝၼ်းတီႈ 3/10/2021 ၸွမ်သိုၵ်းထုၼ်းထုၼ်းၼွင်ႇ ဢွၵ်ႇၶၢဝ်းတၢင်းၵႂႃႇတၢင်းဝဵင်းၼွင်မူၼ်ႇ၊ မၶျၢၼ်းပေႃး၊ ၶွင်ႇလၢၼ်ႇၽူး၊ ပၢင်ၼၢင်းတိၼ်ႇ ၸိူဝ်းၼႆႉသေ ႁူပ်ႉထူပ်းၵူၼ်းပိုၼ်ႉတီႈ လၢတ်ႈဝႃႈ ယႃႇတူၺ်းၶၢဝ်ႇ BBC, VOA, DVB ၸိူဝ်းၼႆႉ။ ယွၼ်ႉပိူဝ်ႈၶဝ်ဢွၵ်ႇၶၢဝ်ႇၽၢမ်းတႃၵူၼ်းမိူင်း၊ ဢွၵ်ႇၶၢဝ်ႇပွမ်ၶၢဝ်ႇၽၢင်း ၶၢဝ်ႇၽိတ်းလွၼ်ႉလွၼ်ႉ ၊ ယႃႇပေတူၺ်း ယႃႇပေယုမ်ႇ ဝႃႈၼႆ။
ၸွမ်သိုၵ်းထုၼ်းထုၼ်းၼွင်ႇ ႁူပ်ႉထူပ်းၵူၼ်းမိူင်းပိုၼ်ႉတီႈသေဢမ်ႇၵႃး ႁူပ်ႉထူပ်းပႃး ၸုမ်းပျီႇတူႉၸိတ်ႉပိုၼ်ႉတီႈ ပၼ်ႁႅင်းၵူၼ်းၸိူဝ်းမႃးၾိုၵ်းၵၢၼ်သိုၵ်းပႃး ဝႃႈၼႆ။
ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၼႆႉ ၽႅၼ်ၵၢၼ်တႃႇၵႂႃႇဢႅဝ်ႇယဵမ်ႈ တၢင်းဝဵင်းပူႇထဝ်ႈလၢႆလၢႆၵမ်း။ ၶၢဝ်ႇတူင်ႇဝူင်းၵူၼ်းၼုမ်ႇ ၾိုၵ်းၵၢၼ်သိုၵ်းဢွၵ်ႇဝႆႉဝႃႈ ၸုမ်း PDF ထုင်ႉၼၼ်ႉပိုၼ်ၽၢဝ်ႇဝႃႈပေႃး မဢလ မႃးတေယိုဝ်းတႄႉတႄႉ -ဝႃႈၼႆသေ ဢဝ်ၶၢဝ်းတၢင်းမၼ်းၵၢတ်ႈပႅတ်ႈ 2 ၵမ်း။ ၾၢႆႇသိုၵ်းမၢၼ်ႈတႄႉပိုၼ်ၽၢဝ်ႇဝႃႈ ၾိင်ႈၾႃႉရႃႇသီႇဢုတု ဢမ်ႇလီလႄႈ ယုၵ်ႉလိူၵ်ႈၶၢဝ်းတၢင်း ၼႆတင်းသွင်ပွၵ်ႈ။ လိုၼ်းသုတ်းၸင်ႇပွႆႇ ၸွမ်သိုၵ်းထုၼ်းထုၼ်းၼွင်ႇ ၵႂႃႇတႅၼ်းတၢင်မၼ်း ဝႃႈၼႆ။
ၵူၼ်းမိူင်းတႆးပွတ်းႁွင်ႇၵေႃႉၼိုင်ႈတႄႉလၢတ်ႈဝႃႈ – သိုၵ်းမၢၼ်ႈ ၸႂ်ႉဢမ်းၼၢတ်ႈယိပ်းၵွင်ႈ လွၵ်ႇငိုတ်ႈတဵၵ်းတဵင်ပေႉၵိၼ်တီႉၺွပ်းၵူၼ်းမိူင်း ။ ပၢႆပိၵ်ႉႁူ ဢိုတ်းတႃၵူၼ်းမိူင်း ဢမ်ႇပၼ်ၵူၼ်းမိူင်းလဵပ်ႈႁဵၼ်းႁူႉႁၼ်သင် ၵူၼ်းမိူင်းဢမ်ႇမီးလွင်ႈလွတ်ႈလႅဝ်း၊ မိူၼ်ငဝ်းလၢႆး ၽွင်းပၢၼ် ၵွၼ်ႇၼႃႈ 2010 ၼၼ်ႉၶိုၼ်းလီလီ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ