ၵူၼ်းဝၢၼ်ႈ ယဵပ်ႇၺႃးမၢၵ်ႇ 2 ၵေႃႉ ၼႂ်းသူၼ်မၢၵ်ႇၸွၵ်းမိူင်းၵိုင်

ၵူၼ်းမိူင်းၵိုင် သွင်ၵေႃႉ ယဵပ်ႇၺႃးမၢၵ်ႇမႅင်းၾင်လိၼ် ၼႂ်းသူၼ်မၢၵ်ႇၸွၵ်း ဢိူင်ႇႁၢမ်းငၢႆး ယၢမ်းလဵဝ် လႆႈသူင်ႇယူတ်းယႃတူဝ်တီႈႁူင်းယႃဝႆႉ ဝႃႈ ၼႆ။

မိူဝ်ႈဝႃး ဝၼ်းတီႈ 5/10/2021 ယၢမ်းဝၢႆးဝၼ်း 3 မူင်းၶိုင်ႈ ၵူၼ်းမိူင်းၵိုင် သွင်ၵေႃႉ ယဵပ်ႇၺႃးမၢၵ်ႇမႅင်းၾင်လိၼ် ၼႂ်းသူၼ်မၢၵ်ႇၸွၵ်း ႁိမ်း ဝၢၼ်ႈၼေႃႇသႅင် ဢိူင်ႇႁၢမ်းငၢႆး ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸၢၵ်ႇမၢၵ်ႇတိူဝ်ႉၺႃးတီႈတိၼ်လႄႈ ၵွင်လင် ၼႆ ယဝ်ႉ။

ၽူႈၸွႆႈထႅမ် ၸုမ်းပရႁိတ မိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မၢတ်ႇၸဵပ်းႁႅင်းဝႆႉၶႃႈ။  ၵေႃႉၼိုင်ႈယဵပ်ႇၺႃးမၢၵ်ႇသေ ၵေႃႉၼိုင်ႈသမ်ႉ  ၸၢၵ်ႇမၢၵ်ႇသဵၼ်သႂ်ႇၶႃႈဢေႃႈ။  ပဵၼ်မိူဝ်ႈ ဝႃး ယၢမ်းဝၢႆးဝၼ်း 3 မူင်းၶိုင်ႈ။ မိူဝ်ႈၼႆႉ ၵၢင်ၼႂ် ႁဝ်းၶႃႈ လႆႈၵႂႃႇႁပ်ႉဢဝ်မႃးသူင်ႇဝႆႉတီႈ ႁူင်းယႃမိူင်းၵိုင်ယဝ်ႉၶႃႈ။ လွတ်ႈၽေးတင်းသွင်ၵေႃႉ  ယဝ်ႉၶႃႈ”- ဝႃႈၼႆ။

ၵူၼ်းမိူင်း သွင်ၵေႃႉ ဢၼ်ယဵပ်ႇၺႃးမၢၵ်ႇၼၼ်ႉ ပဵၼ်လုင်းဢွင်ႇ ဢႃယု 52 ပီ ပဵၼ်ၵူၼ်းဝၢၼ်ႈပၢင်ႇၶႅမ် တိူဝ်ႉၺႃးတီႈတိၼ်လႄႈ ၵွင်းလင်။ လုင်း သၢင်ႇၺၢၼ်ႇ ဢႃယု 50 ပီ ၵူၼ်းဝၢၼ်ႈၼေႃႇသႅင် တိူဝ်ႉၺႃးတီႈတိၼ်   မၢတ်ႇၸဵပ်းႁႅင်းဝႆႉ ဝႃႈၼႆ။

မၢၵ်ႇမႅင်းၾင်လိၼ် ဢၼ်ၵူၼ်းမိူင်းယဵပ်ႇၺႃးၼၼ်ႉ ပဵၼ်ၶွင်ၽႂ် ၸုမ်းလႂ် ၼမ်ႉမိုဝ်းၽႂ်ႁၢင်ႈၵၢင်ဝႆႉတႄႉ ဢမ်ႇလႆႈႁူႉ ။ တီႈမိူင်းၵိုင်ၼႆႉ ယဵပ်ႇၺႃးမၢၵ်ႇၼႂ်းသူၼ် ၼႂ်းထိူၼ်ႇၸိူင်ႉၼႆ မိူဝ်ႈၵွၼ်ႇပႆႇယၢမ်ႈမီးမႃးသေပွၵ်ႈ ။ ပဵၼ်ဢၼ်မႆႈၸႂ်တႃႈၵူၼ်းပိုၼ်ႉတီႈ တေၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉ ၸွမ်းႁိူၵ်ႈၸွမ်းသူၼ်တႄႉတႄႉ ၵူၼ်းပိုၼ်ႉတီႈ ဢိူင်ႇႁၢမ်းငၢႆး လၢတ်ႈၼင်ႇၼႆ။

တႄႇဢဝ် ဝၼ်းတီႈ 14/9/2021 မႃး သိုၵ်း RCSS တင်း တပ်ႉပွင်းၸူႉ လႄႈ SSPP လႆႈပဵၼ်ပၢင်တိုၵ်းၵၼ် ၼႂ်းဢိူင်ႇႁူဝ်ၶၢႆးမႃး ႁၢဝ်ႈႁႅင်း ။ ထိုင်ယၢမ်းလဵဝ် ပၢင်တိုၵ်းၽႄႈလၢမ်း  လၢႆတီႈ မိူၼ်ၼင်ႇ ၼႂ်းဢိူင်ႇပၢင်ႇၵေႇတု၊ ႁၢမ်းငၢႆး ၸိူဝ်းၼႆႉထႅင်ႈ။ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉ တီႈ လႆႈပၢႆႈယၢၼ်ႁိူၼ်းယေး တီႈယူႇတၼ်းသဝ်းၵၼ် ၼပ်ႉႁူဝ်ႁဵင်လႄႈ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ ၵိၼ်းၸႂ် ။