ၵူၼ်းပၢႆႈၽေးသိုၵ်းဢၼ်မႃးမီးတီႈ ဢိူင်ႇႁၢမ်းငၢႆး ၸႄႈဝဵင်းမိူင်းၵိုင်ၼၼ်ႉ မႄႈလုၵ်ႈမႄႈလၢင်းၼမ် ဢၼ်တိုၵ်ႉၸင်ႇႁႃမႃးၵိူတ်ႇလဵင်ႉလုၵ်ႈၼႂ်းပၢင်သဝ်းၼႆႉၵေႃႈမီးလႄႈ ယၢပ်ႇၽိုတ်ႇတီႈယူႇတီႈသဝ်း လွင်ႈၸႂ်ႉၶူဝ်းသွႆ။
တီႈၵျွင်းမုၼ်ၸဝ်ႈၵုင်းၸူင် ၼႂ်းဢိူင်ႇႁၢမ်းငၢႆးၼၼ်ႉ မီးၵူၼ်းပၢႆႈၽေးသိုၵ်း 750 ပၢႆ။ ၼႂ်းၼၼ်ႉမီးမႄႈလုၵ်ႈဢွၼ်ႇလဵၵ်ႉ 20 ပၢႆ၊ မီးလုၵ်ႈဢွၼ်ႇ 3 ၶူပ်ႇလူင်းတႂ်ႈ 40 ပၢႆ ၊ 6 ၶူပ်ႇလူင်းတႂ်ႈ 85 ၵေႃႉ ၵူၼ်းၸွႆႈထႅမ်ၵူၼ်းပၢႆႈၽေးသိုၵ်းၵေႃႉၼိုင်ႈလၢတ်ႈ။
“တႃႇမႄႈလုၵ်ႈဢွၼ်ႇလႅင်တႄႉ ယၢပ်ႇၽိုတ်ႇတႃႇတီႈယူႇ တီႈၵိၼ်ဢေႃႈ။ ၶဝ် ဢမ်ႇၵိၼ်လႆႈၸေးမိူၼ်ပိူၼ်ႈၶႃႈလူးၼေႃ။ တႃႇၵိၼ်ၵေႃႈယၢပ်ႇၽိုတ်ႇဢေႃႈ။ တႃႇလုၵ်ႈဢွၼ်ႇၶဝ်သမ်ႉလူဝ်ႇ ၼမ်ႉၼူမ်း ၊ ၽွင်ဢရႃႇရ ၶူဝ်းၸႂ်ႉသွႆၶႃႈဢေႃႈ ”-ဝႃႈၼႆ။
ယွၼ်ႉပိူဝ်ႈပၢင်တိုၵ်းသိုၵ်း RCSS လႄႈ SSPP သေ ၵူၼ်းဝၢၼ်ႈၼႂ်းဢိူင်ႇႁူဝ်ၶၢႆး ပၢႆႈမႃးယူႇသဝ်းတီႈၵျွင်းၵုင်းၸူင်။ ဢၼ်မႃးၵိူတ်ႇလုၵ်ႈဢွၼ်ႇတီႈၵျွင်းၵုင်းၸူင်ၵေႃႈမီးယူႇ 2 ၵေႃႉ။ တႃႇၵေႃႉၼိုင်ႈၵႂႃႇၵိူတ်ႇတီႈႁူင်းယႃမိူင်းၵိုင်။
“ဢၼ်မႃးၵိူတ်ႇတီႈပၢင်သဝ်းၵူၼ်းပၢႆႈၽေးၼႆႉ မီး 3 ၵေႃႉယဝ်ႉဢေႃႈ။ ”- ၵူၼ်းၸွႆႈထႅမ်ၵူၼ်းပၢႆႈၽေးၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။
ဝၼ်းတီႈ 30/9/2021 ၼႆႉ ပွတ်းဢိူင်ႇႁူဝ်ၶၢႆး ပၢင်တိုၵ်းတိုၵ်ႉပဵၼ်ယူႇထႅင်ႈ သဵင်ၵွင်ႈပႆႇယဵၼ်။
“ တၢင်းဝၢၼ်ႈတႄႉ သဵင်ၵွင်ႈတိုၵ်ႉတႅၵ်ႇယူႇတိၵ်းတိၵ်းၶႃႈ။ ၵူၼ်းပၢႆႈၽေးသိုၵ်းၵေႃႈတိုၵ်ႉမႃးယူႇယႂ်းယႂ်းပႆႇထၢတ်ႇ။ ယၢမ်းလဵဝ်တႄႉ လူဝ်ႇၽၵ်းဢေႃႈတွၼ်ႈတႃႇၶဝ်။ ” မၼ်းၸၢႆး သိုပ်ႇလၢတ်ႈထႅင်ႈၼင်ႇၼႆ။
ၵူၼ်းပၢႆႈၽေးသိုၵ်း ႁွတ်ႈထိုင်မႃးယူႇၵူႈဝၼ်းလႄႈ တႃႇၸိူဝ်းၶဝ်ယူႇသဝ်း လႆႈႁဵတ်းသုမ်ႉသွင်းပၼ် လႄႈ ၽႃႈယၢင် တႃႇမုင်းတႃႇၵင်ႈၵေႃႈတိုၵ်ႉလူဝ်ႇထႅင်ႈ လႆႈႁူႉၼင်ႇၼႆ။
တီႈဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်ၼႆႉ သိုၵ်းသွင်ၸုမ်းပိုတ်းယိုဝ်းၵၼ်ႁၢဝ်ႈႁႅင်း တင်ႈတႄႇဝၼ်းတီႈ 14/9/2021 တေႃႇထိုင်မိူဝ်ႈၼႆႉ။ ၵူၼ်းမိူင်းဢွၼ်ၵၼ်ပၢႆႈၽေးသိုၵ်းဢမ်ႇယွမ်း 3000 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ