မိူဝ်ႈၼႆႉဝၼ်းတီႈ 1/10/2021 ယၢမ်းၵၢင်ၼႂ် 9 မူင်း သိုၵ်းယၢင်း DKBA ပိုတ်းယိုဝ်းသၢႆသိုၵ်းဢဝ်ႁူမ်ႇလူမ်ႈပၼ် ၽူႈၵွၼ်းတိူင်းသိုၵ်းမၢၼ်ႈ တိူင်းသိုၵ်းၸဵင်ႇၸၢၼ်းဝၼ်းဢွၵ်ႇ ၸွမ်သိုၵ်းၵူဝ်ႇၵူဝ်ႇမွင်ႇ ဢၼ်ဢွၵ်ႇၶၢဝ်းတၢင်းၵႂႃႇၵေႃႇၵရဵတ်ႇ လႄႈ ၽူႈယႂ်ႇၵူၼ်းလူင်ၼႂ်းသိုၵ်းမၢၼ်ႈမၢတ်ႇၸဵပ်းလူႉတၢႆၼမ်။
ၸွမ်းၼင်ႇၸုမ်းၶၢဝ်ႇ ယၢၼ်ႇၵုင်ႇၶိတ်ႉတိတ်ႉမီႊတီႊယႃႊဢွၵ်ႇဝႆႉတႄႉဝႃႈ ၶုၼ်သိုၵ်းလူင် ၵေႃႉ ႞ လႄႈၵူၼ်းသိုၵ်း 3 ၵေႃႉ လူႉတၢႆ။ ၸၼ်ႉ G1 ၵေႃႉၼိုင်ႈမၢတ်ႇၸဵပ်းတီႈၶႃလူင်။ လိူဝ်ၼၼ်ႉသိုၵ်းဢၼ်မၢတ်ႇၸဵပ်းမၢၵ်ႇၵွင်ႈသမ်ႉပၢႆႈတပ်ႉ 3 ၵေႃႉ ။ ၾၢႆႇၸုမ်းသိုၵ်း DKBA ဢမ်ႇမၢတ်ႇၸဵပ်းသေၵေႃႉ – ဝႃႈၼႆ။
ၽွင်းပၢင်တိုၵ်းၼၼ်ႉသိုၵ်းမၢၼ်ႈလၢမ်းလိမ်းပိုတ်းယိုဝ်းၵွင်ႈလူင်ၵွင်ႈဢွၼ်ႇ 4 ႁူး 5 တၢင်းလႄႈ တိူဝ်ႉၺႃးႁိူၼ်းၵူၼ်းမိူင်းလူႉၵွႆၼမ်။ ဝၢႆးလင်ပဵၼ်ပၢင်တိုၵ်းၵၼ်ယဝ်ႉ သိုၵ်းမၢၼ်ႈလုၵ်ႉမျႃႉဝတီႇ သူင်ႇႁႅင်းသိုၵ်းမႃးႁိမ်းၸမ် 100 – လႆႈႁူႉၼင်ႇၼႆ။
