ၵႃးတၢင်ႇသၢႆး/ လိၼ် လမ်းၼိုင်ႈ လေႃႈတမ်သႂ်ႇ ႁိူၼ်းယေး ၵူၼ်းဝၢၼ်ႈ လင်ၼိုင်ႈ တီႈၸႄႈဝဵင်းၼမ်ႉၸၢင် ၸဝ်ႈရူတ်ႉ မၢတ်ႇၸဵပ်းလိုမ်းတူဝ် ဝႃႈၼႆ။
မိူဝ်ႈၼႆႉ ဝၼ်းတီႈ 3/9/2021 ယၢမ်းၵၢင်ၼႂ် မွၵ်ႈ 10 မူင်ပၢႆ ၵႃးတၢင်ႇသၢႆး/ လိၼ် ၽႃႇသႂ်ႇ ႁိူၼ်းၵူၼ်းဝၢၼ်ႈ တီႈ ပွၵ်ႉ 4 ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ ပဵၼ်ႁိူၼ်းဢၼ်ယူႇၸပ်းသဵၼ်ႈတၢင်းလူင်။
ၵူၼ်းၼမ်ႉၸၢင်ၵေႃႉၼိုင်ႈ ဢၼ်ႁၼ်လွင်ႈပိူင်ပဵၼ်ၵႃးၽႃႇႁိူၼ်းၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၽႃႇ ႁႅင်းဝႆႉဢေႃႈ ။ ၵူၼ်းႁေႃႈၵႃးသမ်ႉပေႃးလိုမ်းတူဝ်ၶမ်ဝႆႉၼႂ်းၵႃး။ ၸုမ်းၸွႆႈထႅမ် မႃး ၸွႆႈၵၼ်ဢဝ်ဢွၵ်ႇၵႃး ႁိုင်မွၵ်ႈ 30 မိၼိတ်ႉၼႆႉၶႃႈဢေႃႈ။ ဢၼ်လႆႈမၢတ်ႇၸဵပ်းတႄႉ ပဵၼ်ၸဝ်ႈၵႃး ၵေႃႉ လဵဝ် ၵူၺ်းၶႃႈ၊ လွင်ႈလူႉတၢႆတႄႉ ဢမ်ႇမီးၶႃႈ”- ဝႃႈၼႆ။
ႁိူၼ်းယေး ၵူၼ်းဝၢၼ်ႈဢၼ်ၺႃးၽႃႇတမ်သေလူႉၵွႆၵႂႃႇၼၼ်ႉ တင်းမူတ်း ၵႃႈၶၼ်တူၵ်းမႅၼ်ႈၵႃႈႁိုဝ် တႄႉပႆႇႁူႉတႅတ်ႈတေႃး။
“ ၵတ်ႉၵႃႈၸဝ်ႈႁိူၼ်းဢမ်ႇယူႇတၢင်းၼႃႈႁိူၼ်းလႃႈ။ ဢမ်ႇတိူဝ်ႉၺႃးၵူၼ်းသေၵေႃႉၼင်ႇၵဝ်ႇၶႃႈ။ ” ၵူၼ်းၼမ်ႉၸၢင်ၵေႃႉၼၼ်ႉလၢတ်ႈၼင်ႇၼႆ။
ယၢမ်းလဵဝ် ၵူၼ်းႁေႃႈရူတ်ႉၼၼ်ႉတႄႉၸုမ်းၸွႆႈထႅမ် ဢဝ်တူဝ်သူင်ႇ ႁူင်းယႃ ၸႄႈဝဵင်းၼမ်ႉၸၢင်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ