ၵူၼ်းမိူင်းလၢင်းၶိူဝ်းၵမ်ႈၽွင်ႈၸူးငၢႆႈပႅတ်ႈယုၵ်းယၢၵ်းႁိမ်းတၢင်း ဢမ်ႇၶဝ်ႈထိုင်တီႈလုမ်ယုၵ်းယၢၵ်း ၵမ်ႈၽွင်ႈ ယင်းတိုၵ်ႉပွႆႇတူၵ်းၼမ်ႉတဵင်းယူႇလႄႈ ၵူၼ်းၼုမ်ႇလၢင်းၶိူဝ်းမႆႈၸႂ်ၾၢင်ႁၢင်ႈဝဵင်းတေႁၢင်ႈႁၢႆႉၸႃႉ  ပိူင်လူင်ၵူဝ်တုမ်ႉတိူဝ်ႉ ပၢႆးယူႇလီၵူၼ်းမိူင်း။

တွၼ်ႈတႃႇၵူၼ်းမိူင်း ဝဵင်းလၢင်းၶိူဝ်းပႅတ်ႈယုၵ်းယၢၵ်းၼၼ်ႉ ၾၢႆႇလိူမ်ႈလႆႇၸႄႈဝဵင်း တမ်းဝႆႉပၼ်တီႈပႅတ်ႈယုၵ်းယၢၵ်း မီးၼႂ်းပႃႇ တိၼ်လွႆ ၾၢႆႇၶႂႃမိုဝ်း တၢင်းၶဝ်ႈဝဵင်းလၢင်းၶိူဝ်း ၊ ၵူၺ်းၵႃႈၵူၼ်းမိူင်း ၵမ်ႈၽွင်ႈၸူးငၢႆႈ ဢမ်ႇၶဝ်ႈထိုင်တီႈပႅတ်ႈယုၵ်းယၢၵ်းသေ ဝိုတ်ႉ/ထိုမ်ႈပွႆႇဝႆႉႁိမ်းၶၢင်ႈတၢင်း၊ တၢင်းၶဝ်ႈၵႂႃႇၸူးတီႈပႅတ်ႈယုၵ်းယၢၵ်းလႄႈႁဵတ်းႁႂ်ႈၾၢင်ႁၢင်ႈဝဵင်း သဝ်ႈမွင် ဝူၺ်ႇႁင်ႈ။

ၵူၼ်းၼုမ်ႇ ၽူႈၸၢႆး သႅၼ်းပၢၼ်ဢႃယုမွၵ်ႈ 40 ၊ ၵူၼ်းၸႃႇတိ လၢင်းၶိူဝ်းလၢတ်ႈတီႈၽူႈတွႆႇႁွၵ်ႈဝႃႈ – “  ၵမ်ႈၽွင်ႈၵမ်ႈၼမ် ၸူးငၢႆႈသေ ဢမ်ႇၶဝ်ႈၵႂႃႇထိုင် တီႈပႅတ်ႈယုၵ်းယၢၵ်းတၢင်းၼႂ်းပုၼ်ႉၶႃႈ ။ ဢွၼ်ၵၼ်ထိုမ်ႈပႅတ်ႈတီႈႁိမ်းၶၢင်ႈတၢင်း ႁဵတ်းႁႂ်ႈၾၢင်ႁၢင်ႈဝဵင်းသဝ်ႈမွင်ဢေႃႈ။ ၶၢဝ်းၼႆႉသမ်ႉပဵၼ်ၶၢဝ်းၾူၼ်၊ မႅင်းမူၼ်း ႁိၼ်ႉ ယုင်းၵေႃႈၼမ်လႄႈ ပေႃးမီးလွင်ႈဝူၺ်ႇႁင်ႈ ၵူဝ်တုမ်ႉတိူဝ်ႉပႃးပၢႆးယူႇလီၵူၼ်းမိူင်းဢေႃႈ ” – ဝႃႈၼႆ။

ၾၢႆႇၼိုင်ႈ ၵူၼ်းၸိူဝ်းယူႇႁၢင်ဝဵင်း၊ ၾင်ႇၼမ်ႉ လႄႈ ယၢၼ်ၵႆၵၼ်တင်းတီႈပႅတ်ႈယုၵ်းယၢၵ်းသမ်ႉ ဢဝ်ထူင်ယုၵ်းယၢၵ်းၸဝ်ႈၵဝ်ႇ ၵႂႃႇပႅတ်ႈၸွမ်းၾင်ႇၼမ်ႉတဵင်း၊ ၵမ်ႈၽွင်ႈပႅတ်ႈတူၵ်းၼမ်ႉတဵင်းၵေႃႈယင်းတိုၵ်ႉမီးယူႇ ၵူၼ်းယူႇႁိမ်းၵၢတ်ႇ ႁိမ်းၾင်ႇၼမ်ႉတဵင်းလၢတ်ႈ။

ယိင်းၼွင်ႉဢွၼ်ႇ ၵူၼ်းယူႇႁိမ်းၾင်ႇၼမ်ႉတဵင်းဝဵင်းလၢင်းၶိူဝ်းလၢတ်ႈၽူႈတွႆႇႁွၵ်ႈဝႃႈ -“တီႈတႄႉဝဵင်းႁဝ်းၶႃႈၼႆႉ ၶဝ်ႈပႃးၼႂ်းဝဵင်းဢၼ်မီးသၽႃႇဝ တၢင်းႁၢင်ႈလီဝဵင်းၼိုင်ႈ ၼႂ်းမိူင်းတႆး။ ၼမ်ႉတဵင်းၵေႃႈလႆႈဝႃႈသၢႆၸႂ်လမ်ႇလွင်ႈတွၼ်ႈတႃႇၵူၼ်းလၢင်းၶိူဝ်းႁဝ်းၶႃႈဢဝ်ၵိၼ်ဢဝ်ၸႂ်ႉ ၊ လူင်းဢၢပ်ႇၼမ်ႉတဵင်း ၊ ၵမ်ႈၽွင်ႈယင်းဝႃႈပဵၼ်ယႃႈယႃပေႇၵူၼ်ႉပေႇမူၺ်ႈ။ သင်ဝႃႈၵူၼ်းမိူင်းႁဝ်းၶႃႈသမ်ႉ ဢမ်ႇဝႆႉၵႃႈၶၼ် သၽႃႇဝ တၢင်းႁၢင်ႈလီၼႆႉသေ ဢမ်ႇႁၵ်ႉၼမ်ႉတဵင်းသေ ဢဝ်ယုၵ်းယၢၵ်းပႅတ်ႈတူၵ်း ထွၵ်ႇတူၵ်းၼမ်ႉတဵင်းႁဵတ်းၼႆတိၵ်းတိၵ်းတႄႉတေတုမ်ႉတိူဝ်ႉၼမ်ႉလိၼ်ႁိမ်ၽႃ၊ ၼမ်ႉတဵင်းတေဝူၺ်ႇႁင်ႈ။  ၵွပ်ႈၼႆၶႆႈတိုၵ်းသူၼ်းထိုင်ၵူၼ်းလၢင်းၶိူဝ်းႁဝ်းၶႃႈၵူႈၵေႃႉ ၵႂႃႇပႅတ်ႈယုၵ်းယၢၵ်းတီႈပိူၼ်ႈ မၢႆဝႆႉပၼ် ႁဵတ်းဝႆႉပၼ်တီႈပႅတ်ႈယုၵ်းယၢၵ်းၼၼ်ႉ ႁႂ်ႈပဵၼ်ပၵ်းပဵၼ်ပိူင်တႄႉတေလီဢေႃႈ ”- ဝႃႈၼႆ။

ဝဵင်းလၢင်းၶိူဝ်းၼႆႉ  ပဵၼ်ဝဵင်းၾိင်ႈၾႃႉရႃႇသီႇ မႆႈႁွၼ်ႉ ဝႃႈၼႆသေတႃႉ ယွၼ်ႉပိူဝ်ႈယူႇၸွမ်းသၢႆၵေးၼမ်ႉတဵင်းလႄႈ ၾၢင်ႁၢင်ႈဝဵင်းတႄႉ ၶဵဝ်ၸမ်ႉႁၢင်ႈလီ။ သွမ်းသၢပ်ႇၼမ်ႉတဵင်းၼၼ်ႉ လိၼ်လီ ၽုၵ်ႇသွမ်ႈၶႅမ်ႉ။ ၵူၺ်းၵႃႈ ပေႃးပႅတ်ႈယုၵ်းယၢၵ်းလူင်းၼမ်ႉ ၊ ပေႃးၶုတ်းသၢႆး ၶုတ်းလိၼ် မၢၵ်ႇႁိၼ် ၼႂ်းၼမ်ႉတဵင်းၵေႃႈမိူၼ်တၢင်းယႃႉသၢႆၵေးၼမ်ႉတဵင်းလူႉလႄႈ ၸၢင်ႈႁဵတ်းႁႂ်ႈၼမ်ႉတဵင်းၶုၼ်ႇ ၊ သၢႆၼမ်ႉပိူင်ႈ သေ ၼမ်ႉတဵင်းတေၸဵဝ်းႁႅင်ႈ ၊ ၸဵဝ်းလူႉ ပေႃႈၾႃႉမႄႈမိူင်း ၼႂ်းဝဵင်းလၢင်းၶိူဝ်းၵေႃႈၼိုင်ႈၵေႃႈ တၵ်ႉၼၢႆတူၵ်ႇလၢတ်ႈၼင်ႇၼႆ။