မိူဝ်ႈၼႆႉ ဝၼ်းတီႈ 28/5/2021 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈ မၢၵ်ႇတႅၵ်ႇၼႂ်းဝၢင်းႁူင်းႁဵၼ်း ၸၼ်ႉၵၢင် မၢႆ 2 ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်း 2 လုၵ်ႈ လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆ ဢမ်ႇမီး။
ၵူၼ်းၼုမ်ႇ ပိုၼ်ႉတီႈ ဝဵင်းပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇၼႂ်းဝၢင်းႁူင်းႁဵၼ်း ၸၼ်ႉၵၢင်မၢႆ 2 တီႈပၢင်လူင်ၼႆႉ 2 လုၵ်ႈၶႃႈဢေႃႈ။ တႅၵ်ႇႁႅင်းၼႃႇၶႃႈ။ လႆႈငိၼ်းသဵင်တႅၵ်ႇတင်းသွင်လုၵ်ႈၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် ႁဵတ်းဢၼ်ဝႃႈၼၼ်ႉ ပႆႇလႆႈႁူႉၸွမ်း ဝႃႈၼႆ။
“ဝၢႆးသေ မၢၵ်ႇတႅၵ်ႇယဝ်ႉၼၼ်ႉ ပလိၵ်ႈ/သိုၵ်းၶဝ် ပိၵ်ႉဢိုတ်းသဵၼ်ႈတၢင်းဝႆႉၵမ်းၼိုင်ႈ ဢမ်ႇပႃးၵူၼ်းၵႂႃႇမႃး။ တီႈႁူင်းႁဵၼ်း ၼၼ်ႉ ပဵၼ်ၵႃႈ ပလိၵ်ႈယေး သိုၵ်းၶဝ် ပေႃးတဵမ်ၵႂႃႇမူတ်းၶႃႈ မိူဝ်ႈၵႆႈၼႆႉ၊ ဢၼ်တႅၵ်ႇတီႈပၢင်လူင် မိူဝ်ႈၼႆႉ တေလႆႈဝႃႈ ပဵၼ် ပွၵ်ႈၵမ်းႁႅၵ်ႈၶႃႈဢေႃႈ”- ၵူၼ်းၼုမ်ႇပၢင်လူင် သိုပ်ႇလၢတ်ႈၼႄ ၼင်ႇၼႆ။
မိူၼ်ၼႆၼင်ႇၵဝ်ႇ မိူဝ်ႈၼႆႉဝၼ်းတီႈ 28/5/2021 ယၢမ်းၵၢင်ၼႂ် မွၵ်ႈ 8 မူင်းပၢႆ မၢၵ်ႇတႅၵ်ႇတီႈၵၢင်ဝဵင်း မူႇၸေႊ လုၵ်ႈၼိုင်ႈ တႅၵ်ႇတိူဝ်ႉသႂ်ႇ ဢွၼ်ႇၸၢႆးၼုမ်ႇ လူႉတၢႆ ၵေႃႉၼိုင်ႈ။
ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 27/5/2021 ယၢမ်းၵၢင်ၶမ်ႈမွၵ်ႈ 8 မူင်းပၢႆ ၼၼ်ႉၵေႃႈ မၢၵ်ႇတႅၵ်ႇတီႈၼႃႈလုမ်းပၢႆးပၺ်ႇ ၺႃႇ ၸႄႈဝဵင်းမိူင်းၵိုင် လုၵ်ႈၼိုင်ႈ ၼႆယဝ်ႉ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး ဝၢၼ်ႈ မိူင်း ဢမ်ႇၼိမ်သဝ်း သုၵ်ႉယုင်ႈဢူၼ်ဢၢၼ် ထိုင်မႃးၼႂ်းလိူၼ်ဢေႊၿရိူဝ်ႊ တင်း လိူၼ်မေႊၼႆႉ ၸွမ်းႁူင်းႁဵၼ်း လုမ်းပၢႆး ပၺ်ႇၺႃႇလႄႈ ၸွမ်းယေးငိုၼ်း ဢိၵ်ႇလူၺ်ႈ ၸွမ်းၵၢင်ဝဵင်း ၸိူဝ်းၼႆႉ ၵႆႉမီးလွင်ႈမၢၵ်ႇတႅၵ်ႇမႃးၶိူဝ်းယႂ်း ၼႂ်းမိူင်းတႆး လၢႆ ၸႄႈဝဵင်း တုမ်ႉတိူဝ်ႉၵူၼ်းမိူင်း လႆႈမၢတ်ႇၸဵပ်း လူႉတၢႆ ၸွမ်းၵေႃႈမီး ။ ၾၢႆႇၼိုင်ႈသိုၵ်းမၢၼ်ႈသမ်ႉပိုၼ်ၽၢဝ်ႇႁႂ်ႈပေႃႈမႄႈၵူၼ်းမိူင်းဢဝ်လုၵ်ႈလၢင်းၵႂႃႇၾၢၵ်ႇႁူင်းႁဵၼ်းၼႂ်းဝၼ်းတီႈ 24 ထိုင်လိူၼ်မေႊၼႆႉသဵင်ႈ။ ၼႂ်းလိူၼ်ၵျုၼ်ႊၼႆႉ ဢၢၼ်းပိုတ်ႇႁူင်းႁဵၼ်းဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ