ပလိၵ်ႈမၢၼ်ႈ ၵဵင်းတုင် ၸႂ်ႉလၢႆးႁုၵ်းႁၢႆႉသေ ႁေႃႈၵႃးလမ်းၽႃႇတမ် ၵူၼ်းၼုမ်ႇ ဢွၼ်ႇၸၢႆးသွင်ၵေႃႉ ပေႃႉ ထုပ်ႉႁၢဝ်ႈႁႅင်းသေ တီႉၺွပ်းၵုမ်းတူဝ်ၵႂႃႇ။

မိူဝ်ႈဝႃး ဝၼ်းတီႈ 26/5/2021 ယၢမ်းၵၢင်ၶိုၼ်းမွၵ်ႈ 11:20 မူင်းပၢႆၼၼ်ႉ ပလိၵ်ႈမၢၼ်ႈ ႁေႃႈၵႃးလမ်းတမ် ၵူၼ်းၼုမ်ႇ ဢွၼ်ႇၸၢႆး သွင်ၵေႃႉ တီႈတၢင်းလင် ႁူင်းပလိၵ်ႈ ႁိမ်းၵၢတ်ႇလူင် ဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။  ပေႃႉထုပ်ႉ ၶႃသွင်ၵေႃႉ ႁၢဝ်ႈႁႅင်းသေ လၢၵ်ႈၸၼ်ၶိုၼ်ႈၵႃးၵႂႃႇ ။

ၵူၼ်းၼုမ်ႇ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ပလိၵ်ႈမၢၼ်ႈ ႁေႃႈၵႃး ပုင်ႈသႂ်ႇၶဝ်၊ ၸုမ်းပလိၵ်ႈမၢၼ်ႈ မီး မွၵ်ႈ 4 ၵေႃႉၼႆႉ၊ ပေႃႉထုပ်ႉၵူၼ်းၼုမ်ႇ သွင်ၵေႃႉၼၼ်ႉ လၢႆလၢႆၵမ်းသေ လၢၵ်ႈၶိုၼ်းၵႃးၶဝ်ၵႂႃႇဢေႃႈ။ လၢႆးႁဵတ်းၶဝ် ၼႆႉ မိူၼ်ၵူၼ်းၵေႃႇၵၢၼ်ႁၢႆႉယဝ်ႉၶႃႈ”- ဝႃႈၼႆ။

ၵူၼ်းၼုမ်ႇ ၼႂ်းၸႄႈဝဵင်းၵဵင်းတုင် ၺႃးၸုမ်းသိုၵ်းမၢၼ်ႈ တီႉၺွပ်းၵႂႃႇ 30 ပၢႆ ၼႂ်း ၼၼ်ႉ  ပွႆႇပၼ်ၶိုၼ်းၽွင်ႈယဝ်ႉသေတႃႉ တိုၵ်ႉၵိုတ်းထႅင်ႈ 20 ၵေႃႉပၢႆ။

တီႈဝဵင်းတႃႈၶီႈလဵၵ်းၵေႃႈ မိူဝ်ႈဝၼ်းတီႈ 22-23/5/2021 ၼၼ်ႉ ပလိၵ်ႈမၢၼ်ႈ တီႉၺွပ်းၵူၼ်းၼုမ်ႇ 10 ၵေႃႉ၊ ၼႂ်း 10 ၵေႃႉၼၼ်ႉ တႃႇ 5 ၵေႃႉ ဢႃယု ပႆႇတဵမ် 18 ပီ လႄႈ ပွႆႇပၼ်ၶိုၼ်း။ ၵိုတ်း 5 ၵေႃႉတႄႉ ၺႃးၸႅင်ႈၵႂၢမ်း ၸွႆးတြႃး သေ ၺႃးတူတ်ႈၶွၵ်ႈဝႆႉ – ၵူၼ်းတႃႈၶီႈလဵၵ်းလၢတ်ႈၼႄ ၼင်ႇၼႆ။