ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ပိုၼ်ၽၢဝ်ႇသဵၼ်ႈၸိုဝ်ႈ ၵူၼ်းမိူင်းႁူမ်ႈတုမ် တႃႇ 20 ၵေႃႉ ၸိူဝ်းထုၵ်ႇပိုတ်ႇလိူင်ႈၸွႆးတြႃး 505 (က) ၼၼ်ႉ ၼႂ်းၼၼ်ႉ ပႃးၼၢင်းမေႃယႃ ၼႂ်းမိူင်းတႆး ထႅင်ႈ 2 ၵေႃႉ။
မိူဝ်ႈၼႆႉ ဝၼ်းတီႈ 18/5/2021 ယၢမ်းၵၢင်ဝၼ်း 11 မူင်း ႁွင်ႈၵၢၼ်ၶၢဝ်ႇ မျႃႉဝတီႇ ၶွင် ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇ မႃးသဵၼ်ႈၸိုဝ်ႈ ၵူၼ်းမိူင်းႁူမ်ႈတုမ် ထုၵ်ႇပိုတ်ႇလိူင်ႈၸွႆႈတြႃး လူၺ်ႈမတ်ႉတႃ 505 (က) တႃႇ 20 ၵေႃႉ။ ၼႂ်းၼၼ်ႉ ပႃးၼၢင်း မေႃယႃ 2 ၵေႃႉ ပဵၼ်တေႃႇဢၢၼ်ႇသၢႆးၶၢဝ် တင်း တေႃႇၶိၼ်ႇသူၺ်ႇသိၼ်ႇ ၼႆယဝ်ႉ။
ၼႂ်းသိုဝ်ႇၶၢဝ်ႇ မျႃႉဝတီႇ ပိုၼ်ၽၢဝ်ႇဢွၵ်ႇမႃး တႃႇ 20 ၵေႃႉၼႆႉ ပဵၼ်ၾၢႆႇပၢႆးပၺ်ႇၺႃႇ 10 ၵေႃႉလႄႈ ပၢႆးယူႇလီ 10 ၵေႃႉ။ ၼႂ်း ၼၼ်ႉ ပႃးၼၢင်းမေႃယႃ ၼႂ်းမိူင်းတႆး 2 ၵေႃႉ။ တေႃႇဢၢၼ်ႇသၢႆးၶၢဝ်ၼႆႉ ပဵၼ် Nurse ၼၢင်းမေႃယႃလုမ်းလႃး တီႈႁူင်းယႃ ၵူၼ်းမိူင်း ဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ၊ တေႃႇၶိၼ်ႇသူၺ်ႇသိၼ်ႇသမ်ႉ ပဵၼ်ၼၢင်းမေႃယႃႁဵတ်း ၵၢၼ်တီႈႁူင်းယႃ ဝဵင်းဢွင်ႇပၢၼ်း ၸႄႈဝဵင်းၵၢတ်ႇလေႃး ၸိုင်ႈတႆးပွတ်းၸၢၼ်း ၸႄႈတွၼ်ႈတူၼ်ႈတီး ဝႃႈၼႆ။
ၼႂ်း 20 ၵေႃႉ ဢၼ်ထုၵ်ႇပိုတ်ႇလိူင်ႈၸွႆးတြႃး 505 (က) ၼႆႉ ႁၢပ်ႇၵၢၼ်ဝႆႉ ၼႂ်းၸႄႈဝဵင်းမိူင်းတႆး၊ ၸႄႈမိူင်းယၢင်း၊ ၸႄႈမိူင်း ၶၢင်၊ ၸႄႈမိူင်းမွၼ်း၊ တိူင်းၸႄႈၵႅင်း၊ ဢေႊရႃႇဝတီႊ၊ ဝဵင်းလိူဝ်ႇ၊ ပႃႇၵိူဝ်လႄႈ တိူင်းတၼၢဝ်းသီ ၸိူဝ်းၼႆ။
ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ပိုၼ်ၽၢဝ်ႇ ဢဝ်လိူင်ႈၸွႆးတြႃး 505 (က) ၵူၼ်းႁဵတ်းၵၢၼ် ၾၢႆႇပၢႆးယူႇလီ၊ ၾၢႆႇပၢႆးပၺ်ႇၺႃႇ ဢိၵ်ႇပႃးၵူၼ်းမိူင်း ၵူႈဝၼ်း ၼိုင်ႈဝၼ်းလႂ် ဢမ်ႇယွမ်း 20 ၵေႃႉ။
ၸုမ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း မိူင်းမၢၼ်ႈ AAPP ပိုၼ်ၽၢဝ်ႇဝႆႉ တေႃႇထိုင်ဝၼ်းထီႉ 17 ၼၼ်ႉ သိုၵ်းမၢၼ်ႈပိုၼ် ၽၢဝ်ႇဢဝ်လိူင်ႈ ၵူၼ်းမိူင်း လူၺ်ႈ 505 (က) မီး 1,699 ၵေႃႉ၊ ဢၼ်ထုၵ်ႇတီႉၺွပ်းမီး 5,210 ၵေႃႉလႄႈ သိုၵ်းမၢၼ်ႈဢဝ်တၢႆ ၽွင်းၵႂႃႇၼႄၵၢင်ၸႂ် မီး 802 ၵေႃႉယဝ်ႉ လႆႈႁူႉၼင်ႇၼႆ။
