ၸုမ်းပၢႆးယူႇလီတႆး TMF ပၼ်တၢင်းႁူႉလွင်ႈပၢႆးယူႇလီ လုၵ်ႈႁဵၼ်းတီႈဝၢၼ်ႈ

ၸုမ်းပၢႆးယူႇလီတႆး Tai Medical Family လူင်းပိုၼ်ႉတီႈ ပၼ်ပိုၼ်ႉႁူႉလွင်ႈပၢႆးယူႇလီ လုၵ်ႈဢွၼ်ႇ/ လုၵ်ႈႁဵၼ်း လွၵ်း လၢႆးႁႄႉၵင်ႈ လုမ်းလႃး တူဝ်ၵဝ် ၽွင်းၶၢဝ်းၾူၼ် ဝႃႈၼႆ။

မိူဝ်ႈဝၼ်းတီႈ 8/5/2021 ၼၼ်ႉ ယူႇတီႈၸုမ်းပၢႆးယူႇလီတႆး လူင်းပိုၼ်ႉတီႈသေ ၸတ်းႁဵတ်းပၢင်ပၼ်ပိုၼ်ႉႁူႉ လွၵ်း လၢႆး ႁႄႉၵင်ႈတၢင်းပဵၼ် ၽွင်းၶၢဝ်းႁိုဝ်ႉ ၶၢဝ်းၾူၼ် ၵူၼ်းမိူင်း လဵၵ်ႉယႂ်ႇၼုမ်ႇထဝ်ႈ ၼင်ႇႁိုဝ် ပေႃးတေ မေႃၵႅတ်ႇၶႄ ႁင်ႉၵင်ႈ တၢင်းပဵၼ်၊ ပၢင်သွၼ်ၼႆႉ ၸတ်းႁဵတ်းတီႈဝတ်ႉဝၢၼ်ႈယိူင်း ဢိူင်ႇထုင်ႉယိူင်း ၸႄႈဝဵင်းလၢႆးၶႃႈ ၸႄႈတွၼ်ႈ လွႆလႅမ် ၸိုင်ႈတႆး ပွတ်းၸၢၼ်း မီးလုၵ်ႈႁဵၼ်းၶဝ်ႈႁူမ်ႈ ထွမ်ႇၸွမ်း ဢမ်ႇယွမ်း 150 ၵေႃႉ ။

ၸၢႆးၵေႃယုမ်ႉ ၸုမ်းပၢႆးယူႇလီတႆး လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉဝႃႈ ၶၢဝ်းၾူၼ်ၵေႃႈ ၸမ်မႃးယဝ်ႉ။ လွင်ႈၸဵပ်းမႆႈ ၶႆႈၼၢဝ်ၸိူဝ်းၼႆႉၵေႃႈ ၸၢင်ႈပဵၼ်မႃး ။ လွင်ႈၸိူဝ်းၼႆႉ ႁဝ်းၶႃႈၶႂ်ႈပၼ်တၢင်းႁူႉသေ ၶႂ်ႈႁႂ်ႈၵူၼ်းၼုမ်ႇႁဝ်းၶႃႈ လုၵ်ႈႁဵၼ်း ႁဝ်းၶႃႈ ၵူႈၵေႃႉ ႁႂ်ႈဢွၼ်ၵၼ်မီးတၢင်းႁူႉ လွင်ႈပၢႆးယူႇလီ မေႃႁႄႉၵင်ႈ ၼင်ႇႁိုဝ် တေဢမ်ႇၸၢင်ႈၸပ်းပဵၼ်မႃး ႁဝ်းၶႃႈ မီးယိူင်းဢၢၼ်း ၸိူင်ႉၼႆသေ ၸင်ႇလူင်းပိုၼ်ႉတီႈပၼ်တၢင်းႁူႉၵႂႃႇ ”- ဝႃႈၼႆ။

တၢင်းပဵၼ် ဢၼ်မႃးၸွမ်းၶၢဝ်းၾူၼ်သမ်ႉ ၵမ်ႈၼမ် တေပဵၼ်တၢင်းပဵၼ်ၼၢဝ်ၼူၵ်ႉ ။ တၢင်းပဵၼ်ၼႆႉ  ၸၢင်ႈ တိတ်း ၸပ်းငၢႆႈၵၼ်  ။

ၸၢႆးၶိူဝ်းၸိုၼ်ႈ လုၵ်ႈႁဵၼ်း ႁူင်းႁဵၼ်း ၸိူဝ်ႉၸၢတ်ႈ ဝၢၼ်ႈၽြႃးလိူၼ်သီႇ ဢိူင်ႇထုင်ႉယိူင်း လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ လႆႈမႃးလဵပ်ႈႁဵၼ်း လွင်ႈပၢႆးယူႇလီၼႆႉ တေပဵၼ်လွင်ႈၼၢဝ်ၼူၵ်ႉလႄႈ လွင်ႈမူတ်းသႂ်ၶႃႈဢေႃႈ။ လွင်ႈၼၢဝ် ၼူၵ်ႉၼႆႉ သင်ႁဝ်းၶႃႈ မဝ်မၢင်သေ ယုင်းၶူပ်းၼႆ ႁဝ်းၶႃႈ တေၸၢင်ႈၸပ်းတၢင်းပဵၼ် ယွၼ်ႉၼၼ်လႄႈ တေၼွၼ်းၵေႃႈ ႁဝ်းၶႃႈ တေလႆႈၵၢင်ၽႃၵၢင်/ သုတ်းသေၼွၼ်းၵၼ်ၶႃႈဢေႃႈ ၼင်ႇႁိုဝ် ယုင်းပေႃးတေဢမ်ႇၸၢင်ႈမႃးၶူပ်းႁဝ်းၶႃႈ ၼၼ်ႉ”-  ဝႃႈၼႆ။

ၼွၵ်ႈလိူဝ်ၼၼ်ႉ မိူၼ်ၼင်ႇ လွင်ႈမူတ်းသႂ်ႇ လွၵ်းလၢႆးလၢင်ႉမိုဝ်း၊ လွၵ်းလၢႆးႁဵတ်းလွင်ႈမူတ်းသႂ်တူဝ်ၵဝ်ႇၸိူဝ်းၼႆႉၵေႃႈ    ပူင် သွၼ်လၢတ်ႈၼႄ ၵူၼ်းၼုမ်ႇထုင်ႉယိူင်း တင်းၼမ်။  

ၼၢင်းသႅင်ၵႅဝ်ႈ လုၵ်ႈႁဵၼ်း ဝၢၼ်ႈၽြႃးလိူၼ်သီႇ ဢိူင်ႇထုင်ႉယိူင်း လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ လႆႈမႃးလဵပ်ႈ ႁဵၼ်း လွင်ႈပၢႆးယူႇလီႈ ၵဵဝ်ႇၵပ်းတၢင်းပဵၼ်ၼၢဝ်ၼူၵ်ႉ ၸိူဝ်းၼႆႉ။ ယဝ်ႉၵေႃႈ လွၵ်းလၢႆးႁဵတ်းလွင်ႈမူတ်းသႂ်ႇ မိူၼ်ၼင်ႇ တေဢမ်ႇလႆႈၶီႈဝူၺ်ႇ၊ လွၵ်းလၢႆး လၢင်းမိုဝ်းၸိူဝ်းၼႆႉ။ လိူဝ်ၼၼ်ႉ လွၵ်းလၢႆးသီၶဵဝ်ႈ လွင်ႈသီၶဵဝ်ႈၼႆႉ ပေႃးႁဝ်းၶႃႈ တေသီၼႆ ၼိုင်ႈဝၼ်း တေလႆႈသီသွင်ပွၵ်ႈ တီႈဢေႇသုတ်းမၼ်း။ တၢင်းႁူႉ ဢၼ်ႁဝ်းၶႃႈ လႆႈလဵပ်ႈႁဵၼ်းမႃး ၸိူဝ်းၼႆႉ ႁဝ်းၶႃႈ တေဢဝ်မိူဝ်းသိုပ်ႇၶႆႈၼႄ ၵူၼ်းၼႂ်းႁိူၼ်းယေးႁဝ်းၶႃႈဢေႃႈ”- ဝႃႈၼႆ။

ၸုမ်းပၢႆးယူႇလီတႆးၼႆႉ ယၢမ်ႈလႆႈႁဵတ်းသၢင်ႈတူင်ႉၼိုင်ပၼ်ပိုၼ်ႉႁူႉ လွင်ႈပၢႆးယူႇလီ ၼိူဝ်ဢွၼ်ႊလၢႆႊ ဢိၼ်ႊထိူဝ်ႊ ၼႅတ်ႊ မႃးတႃႇသေႇ။ လိူဝ်ၼၼ်ႉ ယၢမ်ႈလႆႈလူင်းပိုၼ်ႉတီႈပၼ်ပိုၼ်ႉႁူႉ ၸွမ်းဝဵင်းမိူင်းၼၢႆး လၢင်းၶိူဝ်းမိူင်းပၼ်ႇ ၸဵမ် ၸိူဝ်းၼႆႉ။