သိုၵ်းၶၢင် KIA တင်း ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ သိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်း ပဵၼ်တင်းဝၼ်းတင်းၶိုၼ်း ၵူၼ်းမိူင်းပိုၼ်ႉတီႈ ၸႄႈဝဵင်းမိူင်းမွၵ်ႇ လႆႈပၢႆႈၽေးသိုၵ်း ႁွတ်ႈၽႅဝ် မၢၼ်ႈမေႃႇထႅင်ႈ တင်းၼမ်။
တႄႇဢဝ် ဝၼ်းတီႈ 10/4/2021 ၼႆႉမႃး တေႃႇထိုင်ယၢမ်းလဵဝ် သိုၵ်းၶၢင် KIA တင်း ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ သိုပ်ႇပဵၼ် ပၢင်တိုၵ်းၵၼ်ႁၢဝ်ႈႁႅင်း ၵူႈဝၼ်း ၼႂ်းၸႄႈဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမၢၼ်ႈမေႃႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ဝႃႈ – “ၸွမ်းၼင်ႇႁဝ်းၶႃႈ လႆႈၵဵပ်းသဵၼ်ႈ မၢႆဝႆႉ ၵမ်းထီႉၼိုင်ႈၼၼ်ႉ တေမီး 3,128 ၵေႃႉ။ ယၢမ်းလဵဝ် ပၢႆႈမႃးထႅင်ႈတင်းၼမ်လႄႈ ႁဝ်းၶႃႈ Update သဵၼ်ႈမၢႆ ပႆႇယဝ်ႉ တိုၵ်ႉၵဵပ်းယူႇၶႃႈ။ ပၢင်တိုၵ်းတႄႉ တိုၵ်ႉပဵၼ်ယူႇၶိုၼ်းၶိုၼ်းဝၼ်းဝၼ်းၶႃႈဢေႃႈ။ ယၢမ်းလဵဝ် ၵူၼ်းပၢႆႈၽေး ဢၼ်လူဝ်ႇ တင်းၸွႆႈထႅမ်တႄႉ ၽႃႈႁူမ်ႇၶူဝ်းၼွၼ်းၵၼ်ၶႃႈဢေႃႈ”- ဝႃႈၼႆ။
ၼႂ်းၸႄႈဝဵင်းမိူင်းမွၵ်ႇၼႆႉ ၵမ်ႈၼမ် ပဵၼ်ပီႈၼွင်ႉၸၢဝ်းတႆးယူႇသဝ်း။ ယၢမ်းလဵဝ် လႆႈဢွၼ်ၵၼ်ပၢႆႈမႃးသွၼ်ႈဝႆႉတၢင်း ၸႄႈဝဵင်းမၢၼ်ႈမေႃႇ ၸွမ်းဝတ်ႉမုၼ်ၸဝ်ႈ၊ ၵျွင်းၼၢႆးၶၢဝ်လႄႈ ႁူင်းႁဵၼ်း တင်းမူတ်းတေမီး 29 တီႈ။ လိူဝ်ၼၼ်ႉ ပၢႆႈဝႆႉ ၸွမ်းႁိူၼ်းပီႈႁိူၼ်းၼွင်ႉၵၼ် ၸိူဝ်းၼႆႉၵေႃႈမီး ပေႃးႁူမ်ႈၵၼ်ပႃးတင်းမူတ်းတေမီး မွၵ်ႈ 5 ႁဵင်ၼႆႉ ဝႃႈၼႆ။
ၼွၵ်ႈလိူဝ်ၼၼ်ႉ တီႈဝၢၼ်ႈၼၢင်းဢီႇ ၵူၼ်းပၢႆႈၽေးႁွတ်ႈဝႆႉ မီးလင်ၶႃးႁိူၼ်း 35 လင် ၊ၵူၺ်းၵႃႈ ပူႇၵႄႈဝၢၼ်ႈ ဢမ်ႇႁပ်ႉတၢင်းၸွႆႈထႅမ် ဢၼ်ၵူၼ်းတၢင်းၼွၵ်ႈၶဝ်ႈၸွႆႈ လႄႈႁူပ်ႉတင်းယၢပ်ႇၽိုတ်ႇ ဝႃႈၼႆ။
“မိူဝ်ႈဝႃး ႁဝ်းၶႃႈလႆႈငိၼ်းတႄႉ တီႈဝၢၼ်ႈၼၢင်းဢီႇ (နန်းအီကျေးရွာ) လင်ႁိူၼ်းၵူၼ်းပၢႆႈၽေး ဢၼ်ၵႂႃႇသွၼ်ႈဝႆႉတီႈ ၼၼ်ႈ တေမီး 35 လင်ၶႃးႁိူၼ်း။ ၵူၼ်းတၢင်းၼွၵ်ႈ တေၵႂႃႇၸွႆႈထႅမ် ပူႇၵႄႇဝၢၼ်ႈ ဢမ်ႇႁပ်ႉ ယွၼ်ႉၽူႈၵွၼ်းပိုၼ်ႉတီႈ ၼၼ်ႈ ဢမ်ႇ ပၼ်ႁပ်ႉတၢင်းၸွႆႈထႅမ်ၼႆၶႃႈ ၵွပ်ႈၼႆလႄႈ ဢမ်ႇလႆႈၵႂႃႇ ၸွႆႈထႅမ်။ ထိုင်ယၢမ်းလဵဝ် ၵပ်းသိုပ်ႇႁႃၵေႃႈ ဢမ်ႇလႆႈ တီႈဝၢၼ်ႈၼၼ်ႉ” – ဝႃႈၼႆ။
သိုၵ်းၶၢင် KIA တင်း ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တိုၵ်ႉသိုပ်ႇပဵၼ်ပၢင်တိုၵ်း တၢင်းၸႄႈဝဵင်းမိူင်းမွၵ်ႇ ႁၢဝ်ႈႁႅင်းယူႇ။ ၾၢႆႇ သိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းႁၢဝ်ႈႁႅင်း တုမ်ႉတိူဝ်ႉႁိူၼ်းယေးၵူၼ်းဝၢၼ်ႈလႆႈလူႉ ၵွႆလႅဝ် တင်းၼမ် ။ ၵူၼ်း မိူင်းလူႉတၢႆ 5 ၵေႃႉ၊ မၢတ်ႇၸဵပ်းၵမ်ႈၽွင်ႈလႄႈ ဝူဝ်းၵႂၢႆးၶူဝ်းၶွင်ၵူၼ်းမိူင်းမၢတ်ႇၸဵပ်းတၢႆၸွမ်း ဢမ်ႇယွမ်း 60 – 70 တူဝ် ၼႆယဝ်ႉ။
ဝၢႆးသေ သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ ပိုတ်ႇၼႃႈသိုၵ်းၸူး ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ႁၢဝ်ႈႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ