ၶွင်ႇသီႇသိုၵ်းမၢၼ်ႈ ပိၵ်ႉဢိုတ်းၶျွင်ႉၶၢဝ်ႇၵူႈဢၼ်ၼႂ်းသလွင်း PSI ပႃးၸဵမ် Mizzima တင်း DVB ဝႆႉၶျွင်ႉၶၢဝ်ႇမျႃႉဝတီႇ ၵူၺ်းတႃႇပိုၼ်ၽၢဝ်ႇၶၢဝ်ႇငၢဝ်းၼႄၵူၼ်းမိူင်း ဝႃႈၼႆ။
တႄႇဢဝ် ဝၼ်းတီႈ 8/4/2021 ၼႆႉမႃး ၶျွင်ႉၶၢဝ်ႇ Mizzima တင်း DVB ဢၼ်ပိုတ်ႇၼႄတီႈ PSI Satellite Myanmar ၼၼ်ႉၵေႃႈ ထုၵ်ႇသိုၵ်းမၢၼ်ႈ သင်ႇပိၵ်ႉဢိုတ်းပႅတ်ႈ သေဢဝ်ၶျွင်ႉၶၢဝ်ႇ မျႃႉဝတီႇ မႃးပုတ်ႈတႅၼ်းတၢင် ၼႄၵူၼ်းမိူင်းၵႂႃႇ ။
ၵူၼ်းမိူင်း ၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈ လၢတ်ႈဝႃႈ – “ ၶျွင်ႉၶၢဝ်ႇ 2 ၶျွင်ႉၼၼ်ႉဢမ်ႇမီးယဝ်ႉ ၶဝ်ဢဝ် ၶျွင်ႉၶၢဝ်ႇမျႃႉဝတီႇ မႃး တႅၼ်းတၢင်ဝႆႉ။ ယၢမ်းလဵဝ် ၵူၼ်းမိူင်း ဢွၼ်ၵၼ်ၶိုၼ်းထွမ်ႇရေႇတီႇယူဝ်ႇမိူၼ်ပၢၼ်ၵူႈပွၵ်ႈၶိုၼ်းဢေႃႈ။ ယွၼ်ႉဝႃႈ သိုၵ်းမၢၼ်ႈ ၶဝ်ပိၵ်ႉဢိုတ်းပႅတ်ႈတင်းမူတ်းလႄႈ ဢမ်ႇၸၢင်ႈတူၺ်းၶၢဝ်ႇသင်ယဝ်ႉလူး”- ဝႃႈၼႆ။
မိူၼ်ၼင်ႇ တၢင်ႇၸႄႈဝဵင်း ဢၼ်တိတ်းဝႆႉ သလွင်းၸိူဝ်းၼၼ်ႉၵေႃႈ ထုၵ်ႇယႃႉလူင်းပႅတ်ႈ လႄႈၵူၼ်းမိူင်းသုၵ်ႉယုင်ႈၸႂ်ၶေႃး၊ ၶူဝ်းၶွင်မီးၼႂ်းႁိူၼ်းၸဝ်ႈၵဝ်ႇၵေႃႈဢမ်ႇမီးလွင်ႈႁူမ်ႇလူမ်ႈ။
“ႁဝ်းၶႃႈတႄႉ လႆႈတူၺ်းၶၢဝ်ႇ ဢွင်ႈတီႈဢၼ်မီးသၼ်ႊယႃႊၼႅတ်ႊၼၼ်ႉၵူၺ်းၶႃႈ။ ယွၼ်ႉဝႃႈ ၶျွင်ႉၶၢဝ်ႇ မိတ်ႉၸီႉမ တင်း တီႊဝီႊပီႊ ၵေႃႈဢမ်ႇဝႆႉ ဢမ်ႇၵိုတ်း ၊ ထုၵ်ႇပိၵ်ႉၵႂႃႇယဝ်ႉလႄႈ ဢမ်ႇလႆႈ ၶၢဝ်ႇမၢၼ်ႇမႅၼ်ႈ ။ ယွၼ်ႉသင်လႄႈၶဝ်ၶႆႈပိၵ်ႉလႅင်းထီႊဝီႊ 2 ဢၼ်ၼႆႉ ။ ယၢမ်းလဵဝ်တႄႉႁဵတ်းႁႂ်ႈၵူၼ်းမိူင်းတႃႇမွတ်ႇမူတ်းယဝ်ႉ”- ၵူၼ်းပိုၼ်ႉတီႈ သိုပ်ႇလၢတ်ႈၼႄ ၼင်ႇၼႆ။
ၼႂ်းမိူင်းႁူမ်ႈတုမ်ၼႆႉ ႁွင်ႈၵၢၼ်သိုဝ်ႇၶၢဝ်ႇယႂ်ႇလူင် ဢၼ်ပဵၼ်သိုဝ်ႇၶၢဝ်ႇလွတ်ႈလႅဝ်းထၢင်ႇႁၢင်ႈ ပိုၼ်ၽၢဝ်ႇ ပဵၼ်တၢင်း ၵၢၼ်ဝႆႉ တင်းမူတ်းမီး 5 ဢၼ် မိူၼ်ၼင်ႇ DVB, Mizzima, Myanmar Now, 7 Days လႄႈ Khit Thit Media ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ