ၾႆးမႆႈလုမ်းၽူႈၵွၼ်းပွၵ်ႉၺွင်ႇၽိဝ်ႇ (ညောင်ဖြူစခန်း ရပ်ကွက်ရုံး) မိူဝ်ႈဝႃးၼႆႉ ၵူၼ်းၼႂ်းပွၵ်ႉမႃးၸွႆႈၶႄၾႆး ၺႃးသိုၵ်းမၢၼ်ႈတီႉၺွပ်းၵႂႃႇ 4 ၵေႃႉ ။
မိူဝ်ႈဝႃး ဝၼ်းတီႈ 4/4/2021 ယၢမ်းၵၢင်ၶမ်ႈ မွၵ်ႈ 8 မူင်းၼၼ်ႉ မၢၵ်ႇတႅၵ်ႇတီႈလုမ်းၽူႈၵွၼ်းပွၵ်ႉၺွင်ႇၽိဝ်ႇ ဝဵင်းတူၼ်ႈတီး ၊ ဝၢႆးၼၼ်ႉ ၾႆးမႆႈ လုမ်းၵွၼ်းပွၵ်ႉ၊ ၵူၼ်းၼႂ်းပွၵ်ႉယွမ်ႇ ဢွၼ်ၵၼ်ၵႂႃႇၸွႆႈၶႄၾႆးမွတ်ႇ။ ဝၢႆးသေ ၵူၼ်း မိူင်း ပိုၼ်ႉတီႈ ၸွႆႈၵၼ်ၶႄၾႆးယဝ်ႉ သိုၵ်းမၢၼ်ႈ ၶဝ်ႈတီႉၺွပ်း ၵူၼ်းၸွႆႈၶႄၾႆးၵႂႃႇ ဢမ်ႇယွမ်း 4 ၵေႃႉ ၼႆယဝ်ႉ။
ၵူၼ်း တူၼ်းတီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ဝၢႆးသေ ၾႆးမႆႈယဝ်ႉၵႂႃႇၼၼ်ႉ သိုၵ်းမၢၼ်ႈ တီႉၵူၼ်းၸွႆႈၶႄၾႆး၊ၶဝ်ႈတီႉထိုင်ၼႂ်းႁိူၼ်းယေးလင်ၼိုင်ႈလႆႈၵႂႃႇၵူၼ်း 4 ၵေႃႉ။ မိူဝ်ႈၼႆႉ တီႈပွၵ်ႉၺွင်ႇၽိဝ်ႇၼႆႉ ပဵၼ်ၵႃး သိုၵ်းမၢၼ်ႈ မွၵ်ႈ 7 လမ်းၼႆႉ မႃးပႂ်ႉဝႆႉ။”- ဝႃႈၼႆ။
ယွၼ်ႉသင်လႄႈ သိုၵ်းမၢၼ်ႈတီႉၵူၼ်းၼႂ်းပွၵ်ႉၵႂႃႇဢၼ်ဝႃႈၼၼ်ႉ တေႃႇထိုင် ယၢမ်းလဵဝ် ပႆႇလႆႈႁူႉၶေႃႈမုလ်းတႅတ်ႈတေႃး။
ဝၢႆးသေ သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း မႃးၼႆႉ ၾႆးၵႆႉမႆႈ လုမ်းၽူႈၵွၼ်းပွၵ်ႉ၊ ႁူင်းပလိၵ်ႈ၊ ႁူင်းၵၢၼ်ပၢႆးမၢၵ်ႈမီးလႄႈ ၼႂ်းတပ်ႉသိုၵ်းမၢၼ်ႈ ၸိူဝ်းၼႆႉ ။
ၾႆးၼႆႉၵႆႉမႆႈ လင် 8 မူင်းၵၢင်ၶမ်ႈ၊ ပဵၼ်ၶၢဝ်းယၢမ်းဢၼ် သိုၵ်းမၢၼ်ႈ ပိုၼ်ၽၢဝ်ႇ ႁၢမ်ႈၵူၼ်း မိူင်း ဢွၵ်ႇၼွၵ်ႈႁိူၼ်းယေး (မၢႆမီႈသိုၵ်း)ဝႆႉ တႄႇဢဝ် ၵၢင်ၶမ်ႈ 8 မူင်း ထိုင် 4 မူင်းၵၢင်ၼႂ်။ လွင်ႈၼႆႉ ၵူၼ်းမိူင်းဢွၼ်ၵၼ်လၢတ်ႈဝႃႈ ၾႆးမႆႈၼႆႉ တေဢမ်ႇၸႂ်ႈ ၼမ်ႉမိုဝ်း ၵူၼ်းမိူင်းႁဵတ်း၊ ၸၢင်ႈပဵၼ်လၢႆးၵူတ်ႉငွၵ်းဢၼ်ၶဝ်သၢင်ႈၶိုၼ်ႈမႃးၵူၺ်း ဝႃႈၼႆ။