မၢၵ်ႇတႅၵ်ႇၼႂ်းတပ်ႉသိုၵ်းမၢၼ်ႈ တီႈပွၵ်ႉ 1 ဝဵင်းလႃႈသဵဝ်ႈ လွင်ႈမၢတ်ႇၸဵပ်း လူႉတၢႆတႄႉ ဢမ်ႇမီး ဝႃႈၼႆ။
မိူဝ်ႈၼႆႉ ဝၼ်းတီႈ 2/4/2021 ယၢမ်းၵၢင်ဝၼ်း မွၵ်ႈ 12 မူင်းၶိုင်ႈ မၢၵ်ႇတႅၵ်ႇ ၼႂ်းတပ်ႉ သိုၵ်းမၢၼ်ႈ မၢႆ 4 ပဵၼ်တပ်ႉဢၼ်ႁူမ်ႈ ႁႅင်းၵဵပ်းသိုၵ်းမႂ်ႇ ၶွင်သိုၵ်းမၢၼ်ႈ ဢၼ်မီးတီႈသဵၼ်ႈတၢင်း ၵမ်ႉၵေႃႇ ပွၵ်ႉ1 ဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ။
ၵူၼ်းပိုၼ်ႉတီႈ ဢၼ်လႆႈႁူပ်ႉႁၼ်သိုဝ်ႈၼႃႈၵေႃႉၼိုင်ႈ လၢတ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇ တီႈတပ်ႉသိုၵ်းမၢၼ်ႈ မီးၵူၼ်း ၶီႇရူတ်ႉၶိူင်ႈ မႃးဝိုတ်ႉသႂ်ႇ။ ၵူၺ်းၵႃႈ လွင်ႈတုမ်ႉတိူဝ်ႉမၢတ်ႇၸဵပ်းလူႉတၢႆတႄႉ ဢမ်ႇမီး။ ယွၼ်ႉဝႃႈ တီႈႁိမ်းႁွမ်းၼၼ်ႉ ဢမ်ႇ မီးၵူၼ်း ”- ဝႃႈၼႆ။
မၢၵ်ႇၼၼ်ႉ ပဵၼ်ၼမ်ႉမိုဝ်းၽႂ် ၸုမ်းလႂ် ၵႂႃႇဝိုတ်ႉသႂ်ႇ ပႆႇႁူႉ။ မၢၵ်ႇဢၼ်ၵႂႃႇ ဝိုတ်ႉသႂ်ႇၼၼ်ႉ ပဵၼ်မၢၵ်ႇပွမ်း (လက်လုပ်မိုင်း) ဝႃႈၼႆ။
ၼႂ်းလိူၼ်မၢတ်ႊၶျ် တင်း လိူၼ်ဢေႊပရိူဝ်ႊ သွင်လိူၼ်ထပ်းၵၼ်မႃးၼႆႉ တီႈၸႄႈဝဵင်းလႃႈသဵဝ်ႈမၢၵ်ႇတႅၵ်ႇ 3 တီႈ။ မိူဝ်ႈ ဝၼ်းတီႈ 31/3/2021 ၼၼ်ႉ မၢၵ်ႇတႅၵ်ႇတီႈ ႁိမ်းလုမ်းၽွင်းငမ်းပွၵ်ႉ 5 ၵၢင်ဝဵင်းလႃႈသဵဝ်ႈ။ မိူဝ်ႈဝၼ်းတီႈ 23/3/2021 ၼၼ်ႉ မၢၵ်ႇတႅၵ်ႇတီႈ ဝၢၼ်ႈၼႃးမၢၵ်ႇၶေႃ ႁိူၼ်းသိုၵ်းမၢၼ်ႈထၢၵ်ႈ ၊ ၵူၼ်းတိူဝ်ႉမၢတ်ႇၸွမ်း 2 ၵေႃႉ။
မိူဝ်ႈဝႃး ဝၼ်းတီႈ 1/4/2021 ယၢမ်းႁူဝ်ၶမ်ႈ မွၵ်ႈ 6 မူင်းပၢႆၵေႃႈ မၢၵ်ႇတႅၵ်ႇ တီႈႁိမ်းလုမ်းပလိၵ်ႈမၢၼ်ႈၸႄႈတွၼ်ႈ ပွၵ်ႉ မႄႈၶၢဝ် ၸႄႈဝဵင်းတႃႈၶီႈလဵၵ်း 3 လုၵ်ႈ။ ၵူၺ်းၵႃႈ ဢမ်ႇမီးၵူၼ်းလူႉတၢႆ မၢတ်ႇၸဵပ်း ။
