ၶွင်ႇသီႇသိုၵ်းယိုတ်းမိူင်း သူင်ႇႁႅင်းသိုၵ်း ႁႅင်းပလိၵ်ႈ ႁေႃႈၵႃးလူင် လေႃႇတမ် ရူတ်ႉၶိူင်ႈ(သၢႆႇၵႄႇ) လႄႈ ၵူၼ်း ၼႂ်းၵၢင်ဝဵင်းတူၼ်ႈတီး ရူတ်ႉၶိူင်ႈ လူႉၵွႆလၢႆၵၼ်း၊ မီးၵူၼ်းမၢတ်ႇၸဵပ်းလၢႆၵေႃႉသေ ၵူၼ်းမိူင်းလႆႈလူႉတၢႆၵႂႃႇၵေႃႉၼိုင်ႈ။
ဝၼ်းတီႈ 17/3/2021 ယၢမ်းၵၢင်ၼႂ် မွၵ်ႈ 8 မူင်း ၶွင်ႇသီႇသိုၵ်းယိုတ်းမိူင်း ႁေႃႈၵႃးလူင်ၽႃႇတၢမ် ရူတ်ႉၶိူင်ႈ၊ ၵူၼ်းမိူင်းၶီႇရူတ်ႉၶိူင်ႈ၊ လေႃႇတမ်ပႃးၵူၼ်း လႄႈ လူတ်ႉၶိူင်ႈလူႉၵွႆလၢႆလၢႆလမ်း၊ ၵူၼ်းမၢတ်ႇၸဵပ်းလၢႆၵေႃႉ သေဢမ်ႇၵႃး မီးၵူၼ်းတၢႆပႃးၵေႃႉၼိုင်ႈ။ တင်ႈၸႂ်ႁေႃႈၵႃး ၽႃႈတမ် ရူတ်ႉၶိူင်ႈလႄႈ ၵူၼ်းၼႄၵၢင်ၸႂ် ဢၼ်မီးၼိူဝ်တၢင်း ၼႂ်းပွၵ်ႉၵၢၼ်ႇသျႄႉ ဝဵင်းတူၼ်ႈတီး။
ၵူၼ်းပိုၼ်ႉတီႈ ဢၼ်ႁၼ်တႂ်ႈၼႃႈတႂ်ႈတႃ လၢတ်ႈဝႃႈ – “သိုၵ်းမၢၼ်ႈ ပလိၵ်ႈမၢၼ်ႈ ႁေႃႈၵႃးလူင် သေ လမ်းၽႃႇ ၵူၼ်းၼႄၵၢင်ၸႂ် ၵူၼ်းၶီႇရူတ်ႉၶိူင်ႈ ဢေႃႈ။ ၵူၼ်းၼႄၵၢင်ၸႂ် ၸိူဝ်းၶီႇလူတ်ႉၶိူင်ႈ ပၢႆႈလွတ်ႈ၊ သမ်ႉလမ်းၽႃႇၵူၼ်းပႆတၢင်း သွင်ၵေႃႉ ၵေႃႉၼိုင်ႈလႆႈမၢတ်ႇၸဵပ်း မိုဝ်းႁၢၵ်း။ ထႅင်ႈၵေႃႉၼိုင်ႈ ထဝ်ႈၸၢႆး ဢႃယုမွၵ်ႈ ယႂ်ႇၼႃႇယဝ်ႉ၊ မၼ်းလႆႈ လူႉတၢႆၵႂႃႇဢေႃႈ” – ဝႃႈၼႆ ။
ၵေႃႉဢၼ်ၺႃး ၵႃးသိုၵ်းမၢၼ်ႈ ႁေႃႈၵႃးလမ်းၽႃႇသေ လႆႈလူႉတၢႆၵႂႃႇၼႆႉ ပဵၼ်ၸၢဝ်းၵြႃးႁိၼ်ႇတူႇ ဢႃႇယု မီး 90 ပၢႆ ၊ ပဵၼ်ၵူၼ်းယူႇယွမ်ႇ 11 ပွၵ်ႉၵၢၼ်ႇသျေႉ ဝဵင်းတူၼ်ႈတီး၊ ပူၼ်ႉၶၢပ်ႈတူဝ် တီႈပႃႇႁဵဝ်ႈ ၵြႃးႁိၼ်ႇတူႇ ဝဵင်းတူၼ်ႈတီး ၼႂ်းဝၼ်းမိူဝ်ႈၼႆႉ 18/3/2021 ယၢမ်းဝၢႆးဝၼ်း 2 မူင်း ၼႆ ၵူၼ်းႁူႉၸၵ်းထဝ်ႈၸၢႆးၵေႃႉၼၼ်ႉလၢတ်ႈၼႄ ၼင်ႇၼႆ ။
ပၢင်ၼႄၵၢင်ၸႂ် ၼႂ်းဝဵင်းတူၼ်ႈတီးၼႆႉ ႁူမ်ႈဝႃႈ သိုၵ်းမၢၼ်ႈ ဢဝ်လၢႆးႁုၵ်ႉႁၢႆႉ ၵႂၢတ်ႇလၢင်ႉသေတႃႉ ဢမ်ႇတဵတ်ႇယဵၼ်မွပ်ႈတႅတ်ႈၵႂႃႇ ယင်းၽွမ်ႉၵၼ်မႃးလိူဝ်ၵဝ်ႇသေ ၽႂ်ပွင်ပဵၼ်လႆႈ ၸိူင်ႉႁိုဝ်ၵေႃႈ သိုပ်ႇၼႄၵၢင်ၸႂ်ပွၵ်ႉၽႂ်ယွမ်ႇမၼ်း ၵူႈမိုဝ်ႉၵူႈဝၼ်း။
ၼႂ်းမိူင်းတႆးၼႆႉ ၵူၼ်းဢၼ်လႆႈလူႉတၢႆ ယွၼ်ႉသိုၵ်းမၢၼ်ႈ ပိုတ်းယိုဝ်းၶႃႈႁႅမ် မီး 3 ၵေႃႉ။ ဢုမ်ႇပဝ်း(ဢွင်ႇပၢၼ်း) ၵေႃႉၼိုင်ႈ၊ မူႇၸေႊၵေႃႉၼိုင်ႈ၊ တူၼ်ႈတီးၵေႃႉၼိုင်ႈ တင်း တီႈလႃႈသဵဝ်ႈၵေႃႉၼိုင်ႈ(ဢမ်ႇယိုၼ်ယၼ်လႆႈၶေႃၶေႃ – ဝႃႈပဵၼ်ၵူၼ်းတီႈလႂ်ဝၢၼ်ႈလႂ်)။
