သိုၵ်းမၢၼ်ႈ ႁႅၼ်းသိုၵ်း လေႃႇတိုၵ်း RCSS ဢၼ်မီးႁိမ်းၸမ် SSPP ပွတ်းမိူင်းၼွင် သွင်ၾၢႆႇပဵၼ်ပၢင်တိုၵ်းၵၼ် ႁိုင်ၸူဝ်ႈမူင်းပၢႆ ဝႃႈၼႆ။
ဝၼ်းတီႈ 9/3/2021 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉ သိုၵ်းမၢၼ်ႈ ဢဝ်ႁႅင်းသိုၵ်း တင်းၼမ် ၶိုၼ်ႈလေႃႇယိုဝ်း RCSS ဢၼ် မီးၾၢႆႇႁွင်ႇဝၢၼ်ႈႁူဝ်တၢတ်ႇ ဢိူင်ႇၼွင်ဢႄ ဝဵင်းမိူင်းၼွင် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၼႆယဝ်ႉ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “သိုၵ်းမၢၼ်ႈ တင်ႈၸႂ် ၶိုၼ်ႈယိုဝ်းႁဝ်းၶႃႈဢေႃႈ ။ ႁဵတ်းႁႂ်ႈ ႁဝ်းၶႃႈ သိုၵ်းတႆး သွင်ၸုမ်းႁၼ်ၽိတ်းၼိူဝ်ၵၼ်။ ၶဝ်ႁဵတ်းႁႂ်ႈ SSPP ႁၼ်ၽိတ်းႁဝ်း၊ ႁဵတ်းႁႂ်ႈ ႁဝ်းႁၼ်ၽိတ်း SSPP ၸိူင်ႉၼႆၶႃႈ”- ဝႃႈၼႆ။
သိုၵ်းမၢၼ်ႈတင်း RCSS ပဵၼ်ပၢင်တိုၵ်းၵၼ် တီႈဝဵင်းမိူင်းၼွင်ၼႆႉ ၶၢဝ်းယၢမ်းႁိုင်မွၵ်ႈၸူဝ်ႈ မူင်းပၢႆ ၵူၺ်းၵႃႈ လွင်ႈမၢတ်ႇၸဵပ်းတင်းသွင်ၾၢႆႇတႄႉ ပႆႇလႆႈႁူႉ ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ပဵၼ်ၸုမ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉၸုမ်းၼိုင်ႈ။ ဝၢႆးသေ သိုၵ်းမၢၼ်ႈယိုတ်းဢႃႇၼႃႇ ၸိုင်ႈမိူင်း မႃးမိူဝ်ႈဝၼ်းတီႈ 1/2/2021 ၼၼ်ႉ သိုၵ်းမၢၼ်ႈ ႁႅၼ်း သိုၵ်းလေႃႇတိုၵ်း RCSS မႃးႁၢဝ်ႈႁႅင်း ပဵၼ်လၢႆပွၵ်ႈ တၢင်းၸႄႈဝဵင်းမိူင်းပၼ်ႇ၊ သီႇပေႃႉလႄႈ မိူင်းၼွင် ၸႄႈဝဵင်းၵေးသီး ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ