Thursday, March 28, 2024

ပလိၵ်ႈမၢၼ်ႈသိုၵ်းမၢၼ်ႈၸႂ်ႉလၢႆးႁုၵ်းႁၢႆႉယႃႉၵဝ်းသေတႃႉ ၵူၼ်းတူၼ်ႈတီႈသိုပ်ႇၼႄၵၢင်ၸႂ် ၵူႈဝၼ်း

Must read

တင်ႈတႄႇ ဝၼ်းတီႈ 28 မႃး သိုၵ်းမၢၼ်ႈ ပလိၵ်ႈမၢၼ်ႈ ၸႂ်ႉလၢႆးႁုၵ်းႁၢႆႉ ယႃႉၵဝ်း သေတႃႉ ၵူၼ်းတူၼ်ႈတီး ၼပ်ႉႁူဝ်ပၢၵ်ႇ သိုပ်ႇၼႄၵၢင်ၸႂ် သၢၼ်ၶတ်း သိုၵ်းမၢၼ်ႈ ယိုတ်းဢႃႇၼႃႇ ဝၢၼ်ႈမိူင်း ၼၼ်ႉ ၵူႈမိုဝ်ႉ ၵူႈဝၼ်း။

Photo by – SHAN/ပၢင်ၼႄၵၢင်ၸႂ် တီႈတူၼ်ႈတီး မိူဝ်ႈၼႆႉ 4/3/2021

ၵူႈဝၼ်းဝၼ်းၼႆႉ ၵူၼ်းယူႇဝဵင်းတူၼ်ႈတီး ၼႄၵၢင်ၸႂ် လၢႆလၢႆး – ယၢမ်းၵၢင် ၶွၼ်ႈၵၼ်ၼိူဝ်တၢင်းလူင်သေ ပႆတၢင်း ၼႄၵၢင်ၸႂ်၊ ယၢမ်းႁူဝ်ၶမ်ႈ သုတ်ႇမုၼ်း လွတ်ႈႁေႃးပထၢၼ်းသေ ၼႄၵၢင်ၸႂ်၊ ယၢမ်းၵၢင်ၶမ်ႈသမ်ႉတွႆႇမေႃႈ တွႆႇပုင်းသေ ပၼ်သဵင်ၼႄၵၢင်ၸႂ်။ မိူဝ်ႈၼႆႉ ဝၼ်းတီႈ 4/3/2021 ယၢမ်းၵၢင်ၼႂ် ပလိၵ်ႈ/ သိုၵ်းမၢၼ်ႈ ပွႆႇမၢၵ်ႇၵႅတ်ႉသ်ၼမ်ႉ တႃသႂ်ႇပၢင်ၼႄၵၢင်ၸႂ် ဢမ်ႇယွမ်း 3 လုၵ်ႈ – ၵူၼ်းမိူင်းတႄႉ ဢမ်ႇၵူဝ် ဢမ်ႇႁႄ သိုပ်ႇၼႄၵၢင်ၸႂ်။

- Subscription -

ၽူႈသိုဝ်ႇၶၢဝ်ႇ ၽူႈတွႆႇႁွၵ်ႈ ဢၼ်မီးၼႂ်းပိုၼ်ႉတီႈ ပၢင်ၼႄၵၢင်ၸႂ်ၼၼ်ႉ လၢတ်ႈဝႃႈ – “ပလိၵ်ႈ/ သိုၵ်းမၢၼ်ႈ ပွႆႇမၢၵ်ႇၵႅတ်ႉသ် ၼမ်ႉတႃသႂ်ႇ မွၵ်ႈ 3 ႁူၺ်ႇၼႆႉၶႃႈ။ ယဝ်ႉၵေႃႈ ၶဝ်ပၢဝ်ႇၸူးထႅင်ႈ သင်ၵူၼ်းၼႄၵၢင်ၸႂ် ဢမ်ႇထွႆၼႆ တေပွႆႇထႅင်ႈ။ ၵူၺ်းၵႃႈ ၵူၼ်းၼႄၵၢင်ၸႂ် ဢမ်ႇယွမ်းထွႆ။ ထိုင်ၶၢဝ်း ၵေႃႈ ယၢႆႈၵၼ် ၵႂႃႇ ႁင်းၽႂ်ႁင်းမၼ်း။ ၸုမ်းတပ်ႉပလိၵ်ႈၵေႃႈ ထွႆပွၵ်ႈၵႂႃႇ ”- ဝႃႈၼႆ။

ၼိူဝ်ၵၢင်ဝဵင်းတူၼ်ႈတီး သိုၵ်းမၢၼ်ႈ ပလိၵ်ႈမၢၼ်ႈ ၵႆႉထႅမ်ႁႅင်းသိုၵ်း ၵႅတ်ႇႁႅတ်ႉ ၸွမ်းတၢင်းလူင်၊ ၾၢႆႇၼႄၵၢင်ၸႂ်တႄႉ ပေႃးသိုၵ်းမၢၼ်ႈ ပလိၵ်ႈမၢၼ်ႈ ယူႇတၢင်းတူၵ်း ၶဝ်ၵႂႃႇတၢင်းဢွၵ်ႇ ငိူင်ႉဝႄႈသႄ ၼႄၵၢင်ၸႂ်ယူႇၵူႈဝၼ်း။

“ၼႂ်းဝၼ်းသွင်ဝၼ်းမႃးၼႆႉ ၵူၼ်းၼႄၵၢင်ၸႂ် တီႈတူၼ်ႈတီးၼႆႉ ယွမ်းလူင်းၼမ် လိူဝ်မိူဝ်ႈၵူႈပွၵ်ႈၶႃႈ။ ၶၢဝ်ႇလိုဝ်း ၵၼ်ဝႃႈ မီးၵူၼ်းယိုဝ်းၵွင်ႈ Sniper ပႂ်ႉလၵ်ႉငွႆးယိုဝ်းဝႃႈၼႆ လွင်ႈၼႆႉ ၸႂ်ႈတႄႉ ဢမ်ႇၸႂ်ႉတႄႉၵေႃႈ ဢမ်ႇႁူႉ။ လွၵ်ႈၵၼ်ႁိုဝ်ၵေႃႈ ဢမ်ႇ ႁူႉ။ ၵူၺ်းၵႃႈ မိူဝ်ႈဝႃးတင်း မိူဝ်ႈၼႆႉတႄႉ ပလိၵ်ႈသိုၵ်းမၢၼ်ႈၶဝ် ဢမ်ႇလၢမ်းတီႉၵူၼ်းမိူင်းၶႃႈ”- ၵူၼ်းၼုမ်ႇၶဝ်ႈၼႄၵၢင်ၸႂ် တီႈတူၼ်ႈတီး ၵေႃႉၼိုင်ႈ လၢတ်ႈၼႄၼင်ႇၼႆ။

Photo by – SHAN/ပၢင်ၼႄၵၢင်ၸႂ် တီႈတူၼ်ႈတီး မိူဝ်ႈၼႆႉ 4/3/2021

ဝၢႆးသေ သိုၵ်းမၢၼ်ႈ ယိုဝ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ တေႃႇထိုင်ယၢမ်းလဵဝ် ၵူၼ်းမိူင်း ၵူၼ်း ၼုမ်ႇ ၼႂ်းၸႄႈဝဵင်းတူၼ်ႈတီး ဢွၵ်ႇၼႄၵၢင် ၸႂ်သၢၼ်ၶတ်းတေႃႇသိုၵ်းမၢၼ်ႈမႃး ဢမ်ႇၵိုတ်းဢမ်ႇလိုဝ်ႈ ။ လႃႈသဵဝ်ႈ မူႇၸေႊ ၼမ်ႉၶမ်း သီႇပေႃႉ ၵျွၵ်ႉမႄး ၸိူဝ်းၼႆႉ ၵူၼ်းၼုမ်ႇၵမ်ႈၽွင်ႈၺႃးတီႉၵႂႃႇသေတႃႉၵေႃႈ တိုၵ်ႉသိုပ်ႇၼႄၵၢင်ၸႂ် ယူႇၵူႈဝၼ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း