တႆးႁွတ်ႈၵဵင်းမႆႇ ဢႃယု 19 ပီ တိူဝ်ႉထီႇထႆး ရၢင်းဝလ်းသူးထီႉၼိုင်ႈ 1 ဝႂ် လႆႈငိုၼ်းသူး 6 လၢၼ်ႉဝၢတ်ႇ  ။

ဝၼ်းတီႈ 16/2/2021 ၸၢႆးဢွၼ်ႇၵေႃႉၼိုင်ႈ ဢႃယု 19 ပီ (ၸိုဝ်ႈၼႂ်းပပ်ႉၶၢမ်ႈမိူင်း ပတ်ႉသပူတ်ႉပဵၼ် Mr Khun Aung Phay) ယူႇသဝ်း ႁဵတ်းၵၢၼ် တီႈၸႄႈဝဵင်းသၼ်သၢႆး ၸႄႈတွၼ်ႈ ၵဵင်းမႆႇ ၸိုင်ႈထႆး တိူဝ်ႉထီႇလူင်ပွင်ၸိုင်ႈထႆး ရၢင်းဝလ်းထီႉၼိုင်ႈ  မၢႆ 424603 ၼိုင်ႈဝႂ် လႆႈငိုၼ်းသူး တႃႇ 6 လၢၼ်ႉဝၢတ်ႇ  ။

မၼ်းၸၢႆး လၢတ်ႈတီႈၽူႈမီးပုၼ်ႈၽွၼ်းပလိၵ်ႈဝႃႈ – “ဝႂ်ထီႇဢၼ်မၼ်းၸၢႆး ထုၵ်ႇ ၼၼ်ႉ မၼ်းၸၢႆးသိုဝ်ႉ မိူၼ် မိူဝ်ႈၵူႈ လိူၼ် ဢၼ်ယၢမ်ႈသိုဝ်ႉမႃးၼၼ်ႉၵူၺ်းၼင်ႇၵဝ်ႇ။ ၵူၺ်းၵႃႈ ပွၵ်ႈၼႆႉ  သမ်ႉတိူဝ်ႉ ဝႂ်ၼိုင်ႈ။  ငိုၼ်းတီႈလႆႈမႃးၼၼ်ႉ တေသူင်ႇပၼ် တၢင်းႁိူၼ်းၽွင်ႈသေ ၊  တေၸႂ်ႉ တိုဝ်းတႃႇၵူၼ်းႁိူၼ်းၵူၼ်းယေးဢၼ်မီးတီႈမိူင်းထႆးၼႆႉၸႂ်ႉၽွင်ႈ ”- ဝႃႈၼႆ။  

ဝႂ်ထီႇလူင်ပွင်ၸိုင်ႈထႆးၼႆႉ ဢွၵ်ႇ ၼိုင်ႈလိူၼ် 2 ပွၵ်ႈ။ ၵၢင်လိူၼ် လႄႈ ႁၢင်ႈလိူၼ်။ သိုဝ်ႉလႆႈၸွမ်းၵၢတ်ႇၸွမ်းႁၢၼ်ႉၶၢႆထီႇ လႆႈလွတ်ႈလွတ်ႈလႅဝ်းလႅဝ်း ၵူႈတီႈ ၵူႈၶၢဝ်း 1 ဝႂ်   100 ဝၢတ်ႇ။ ၸၢင်ႈတိူဝ်ႉလႆႈ သူးရၢင်းဝၼ်းထီႉၼိုင်ႈ  6 လၢၼ်ႉဝၢတ်ႇ (မီး 1 သူး) ၊ သူးထီႉသွင် 2 သႅၼ်ဝၢတ်ႇ(မီး 5 သူး)၊ သူးထီႉ 3  ပႅတ်ႇမိုၼ်ႇဝၢတ်ႇ (မီး 10 သူး) ၊ သူးထီႉ 4 သီႇမိုၼ်ႇဝၢတ်ႇ(မီး 50 သူး) ၊ သူးထီႉ 5 သွင်မိုၼ်ႇဝၢတ်ႇ(မီး 100 သူး) ၊ သူးၸမ်ၵၼ်တင်းသူးထီႉ 1 ၼိုင်ႈသႅၼ်ဝၢတ်ႇ( 2 သူး)၊ 3 တူဝ်တၢင်းၼႃႈ သီႇႁဵင်ဝၢတ်ႇ (2000 သူး) ၊ 3 တူဝ်တၢင်းလင် သီႇႁဵင်ဝၢတ်ႇ (မီး 2000 သူး) ၊ 2 တူဝ်လိုၼ်းသုတ်း 2000 ဝၢတ်ႇ(မီး 10000 သူး) ။ ထီႇဢွၵ်ႇ 1 ၸုပ်ႈမီးသူးဢၼ်ၸၢင်ႈတိူဝ်ႉ 14168 သူး။ ငိုၼ်းသူးတင်းမူတ်းမီးတႃႇ 48 လၢၼ်ႉဝၢတ်ႇ လႆႈႁူႉၸွမ်းႁွင်ႈၵၢၼ်ၾၢႆႇထီႇ လူင်ပွင်ၸိုင်ႈထႆး ၼင်ႇၼႆ။