Friday, March 29, 2024

ၵူၼ်းမိူင်းၼႄၵၢင်ၸႂ် တီႈတႃႈၶီႈလဵၵ်း မီး 10 ဝၼ်းပၢႆယဝ်ႉ ပႆႇထွႆၵၼ်

Must read

ၵူၼ်းမိူင်းတႃႈၶီႈလဵၵ်း  ၼႄၵၢင်ၸႂ် သၢၼ်ၶတ်းတေႃႇသိုၵ်းမၢၼ်ႈ ယိုတ်းဢႃႇၼႃႇမႃး မီးၶၢဝ်းတၢင်း 10 ဝၼ်းပၢႆယဝ်ႉ ပႆႇယွမ်းထွႆထွၼ် ၵူၺ်းဢမ်ႇၵႃး ယင်းၼမ်မႃးလိူဝ်ၵဝ်ႇ  ။

Image: ၵူၼ်းပိုၼ်ႉတီႈ/ ပၢင်ၼႄၵၢင်ၸႂ် တီႈတႃႈၶီႈလဵၵ်း

မိူဝ်ႈၼႆႉ ဝၼ်းတီႈ 15/2/2021 ယၢမ်းၵၢင်ၼႂ် ၵႃးၵၢပ်ႇလႅၵ်း/  ၵႃးတႅင်ႉယိုဝ်းသိုၵ်း 3 လမ်း၊ ၵႃးသိုၵ်းမၢၼ်ႈ 2 လမ်းလႄႈ ၵႃးၼမ်ႉ  မႃးပိၵ်ႉဢိုတ်းၶႂၢင်တၢင်းဝႆႉ တီႈပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ၵူၺ်းၵႃႈ ၵူၼ်း ၼႄၵၢင်ၸႂ်သၢၼ်ၶတ်းတေႃႇသိုၵ်းမၢၼ်ႈ ဢမ်ႇတူၵ်းၸႂ်ၵူဝ်ႁႄ- ၼႄၵၢင်ၸႂ်ၵႂႃႇတေႃႇပေႃးယဝ်ႉတူဝ်ႈ။

- Subscription -

ၽူႈၶဝ်ႈႁူမ်ႈ တူင်ႉၼိုင်ၼႄၵၢင်ၸႂ် ၵေႃႉၼိုင်ႈလၢတ်ႈဝႃႈ – “မိူဝ်ႈၼႆႉ သိုၵ်းမၢၼ်ႈ ဢဝ်ၵႃး မႃးႁႄႉဢိုတ်းဝႆႉၶႃႈဢေႃႈ ၵူၺ်းၵႃႈ ၵူၼ်း ၼႄၵၢင်ၸႂ်တႄႉ ဢမ်ႇၵူဝ်ဢမ်ႇႁႄၶႃႈ ပႆတၢင်းၼႄၵၢင်ၸႂ်လွတ်ႈလွတ်ႈလႅဝ်းလႅဝ်းယူႇၶႃႈ။ မိူဝ်ႈၵူႈဝၼ်းပူၼ်ႉမႃး  ၵႃး သိုၵ်းမၢၼ်ႈ ဢမ်ႇမႃးႁႄႉဢိုတ်းၸိူင်ႉၼႆ  ”- ဝႃႈၼႆ။

ပၢင်ၼႄၵၢင်ၸႂ် တီႈတႃႈၶီႈလဵၵ်းၼႆႉ  မီးပိုၼ်ႉတီႈ၊ ႁႅင်းၵၢၼ်ဢၼ်လုၵ်ႉတၢင်ႇတီႈသီႇလႅၼ်မႃး၊ မီးသင်ၶၸဝ်ႈဢိၵ်ႇ ၸၢဝ်းၶိူဝ်း မီးမွၵ်ႈ ၼိုင်ႈမိုၼ်ႇၵူႈဝၼ်း။ ၵူၼ်းၼႄၵၢင်ၸႂ်ၵမ်ႈၼမ် ဢွၼ်ၵၼ် သႂ်ႇၶူဝ်းလမ် ၊ ၸၢဝ်းၶိူဝ်းၵေႃႈ  သႂ်ႇၶူဝ်းၸၢဝ်းၶိူဝ်းၽႂ်မၼ်း မႃးၶဝ်ႈႁူမ်ႈ ၼႄၵၢင်ၸႂ်။

Image: ၵူၼ်းပိုၼ်ႉတီႈ/ ပၢင်ၼႄၵၢင်ၸႂ် တီႈတႃႈၶီႈလဵၵ်း

“ပၢင်ၼႄၵၢင်ၸႂ် တီႈတႃႈၶီႈလဵၵ်းၼႆႉ တေမီး ၶၢဝ်းတၢင်း 10 ဝၼ်းပၢႆယဝ်ႉ ဢမ်ႇၵိုတ်း ဢမ်ႇလိုဝ်ႈသေဝၼ်း ဢမ်ႇထွႆၵၼ် သေဝၼ်းၶႃႈ  ယိင်ႈယူႇယိင်ႈၵူၼ်းၼမ်မႃးထႅင်ႈၶႃႈဢေႃႈ။ ၵူၼ်းၼုမ်ႇ ၵမ်ႈၼမ် ဢွၼ်ၵၼ်သႂ်ႇၶူဝ်းလမ်ၶႃႈ။ ၵူၼ်း ပႂ်ႉၸႅၵ်ႇတၢင်းၵိၼ် ၸွမ်းတၢင်းၵေႃႈ မီးၼမ်ၵူႈဝၼ်းၶႃႈ”-  ၽူႈၶဝ်ႈႁူမ်ႈတူင်ႉၼိုင် လၢတ်ႈၼင်ႇၼႆ။

ပၢင်ၼႄၵၢင်ၸႂ် တီႈတႃႈၶီႈလဵၵ်းၼႆႉ ဢွၼ်တၢင်းသုတ်း ပဵၼ်ၵူၼ်းမိူင်းယိပ်းပၢႆႉ  ပႆၵၢင်တၢင်းဢွၼ်တၢင်း။ ဝၢႆးမႃးမီးပႃးၵူၼ်းၶီႇရူတ်ႉၶိူင်း၊ ၶီႇ ၵႃး ၶဝ်ႈႁူမ်ႈၼႄၵၢင်ၸႂ် တဵၵ်းႁွၼ်း လွင်ႈဢမ်ႇလႆႈၸႂ်သိုၵ်းယိုတ်းဢႃႇၼႃႇ။ ၵူၼ်းမိူင်း တႄႇဢဝ် တီႈႁူဝ်ၶူဝ်မိုတ်ႈၵိုဝ်းမၢႆ 1 ပႆတၢင်းတေႃႇထိုင်တၢင်းဢွၵ်ႇဝဵင်း ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း