ၵူၼ်းၼုမ်ႇ မိူင်းမၢၼ်ႈ တူင်ႈပဵင်း ၵေႃႉၼိုင်ႈ မႃးယူႇမိူင်းယႆ ႁူမ်ႈၵူၼ်းမိူင်း လုၵ်ႉႁိၼ်ၼႄ ၵၢင်ၸႂ် ၼၼ်ႉ ၺႃးပလိၵ်ႈမၢၼ်ႈတီႉၺွပ်းၵႂႃႇ ႁၢၼ်ႉတေႃႇ ဝၼ်းမိူဝ်ႈၼႆႉ ပႆႇပွႆႇပၼ်ၶိုၼ်း။
ၵူၼ်းလုၵ်ႉတၢင်းမိူင်းမၢၼ်ႈတူင်ႈပဵင်း မႃးယူႇၼႂ်းမိူင်းယႆ ၸိုဝ်ႈ မွင်ႇသူဝ်းၵျေႃႇ ဢႃႇယု 27 ပီ ၼႄၵၢင်ၸႂ် လႄႈ ၺႃးပလိၵ်ႈမၢၼ်ႈ ႁွင်ႉၵႂႃႇသေတႃႉ မိူဝ်ႈၼႆႉ ဝၼ်းတီႈ 10/2/2021 ၵူၼ်းမိူင်း တိုၵ်ႉသိုပ်ႇၼႄ ၵၢင်ၸႂ် သၢၼ်ၶတ်း ၸုမ်းသိုၵ်းမၢၼ်ႈ ယိုတ်းဢႃႇၼႃႇ ။
ၵူၼ်းမိူင်းယႆ ၽူႈၶဝ်ႈႁူမ်ႈၼႄၵၢင်ၸႂ် ၵေႃႉၼိုင်ႈ လၢတ်ႈဝႃႈ –“မိူဝ်ႈၼႆႉ ၵူၼ်းမႃးၼႄၵၢင်ၸႂ် တေမီးမွၵ်ႈ 4-5 သိပ်းၼႆႉၶႃႈ။ ႁဝ်းၶႃႈ ဢမ်ႇထွႆ ဢွၼ်ၵၼ်ယိပ်းပၢႆႉသေၼင်ႈၼႄၵၢင်ၸႂ် တီႈၵွင်းမူးၵၢင်ဝဵင်းၼႆႉၶႃႈဢေႃႈ။ ႁဝ်းၶႃႈ တေၼင်ႈသၢၼ်ၶတ်း ၵႂႃႇ တေႃႇထိုင်ၶဝ် လူင်းလုမ်းဝၢႆးဝၼ်းၼႆႉၶႃႈ”– ဝႃႈၼႆ။
မွင်ႇသူဝ်းၵျေႃႇ ၼႆႉ ၺႃးတီႉၵႂႃႇ မိူဝ်ႈဝႃး ဝၼ်းတီႈ 9/2/2021 ယၢမ်း ႁူဝ်ၶမ်ႈမွၵ်ႈ 6 မူင်းပၢႆ ။
“မိူဝ်ႈၼႆႉ ႁဝ်းၶႃႈၵႂႃႇတီႈႁူင်းပလိၵ်ႈသေထၢမ် ၽႂ်ၸႂ်ႉၺွပ်းၼႆ ၶဝ်တွပ်ႇဝႃႈ ပဵၼ်ၽူႈၵွၼ်းၸႄႈဝဵင်း ၸႂ်ႉၺွပ်း။ ၽူႈၵွၼ်းသမ်ႉဝႃႈ ပဵၼ် ပိဝ်ႇႁႃႇ (သိုၵ်းမၢၼ်ႈ) ၸႂ်ႉၺွပ်းၼႆဝႃႇ။ ယၢမ်းလဵဝ် မၼ်းၸၢႆး မီးတီႈႁူင်းပလိၵ်ႈမိူင်းယႆဢေႃႈ။ ၶဝ်ၵုမ်းဝႆႉလၢႆလၢႆၵူၺ်း၊ ဢမ်ႇမီးလွင်ႈမႆႈၸႂ်သင် ၶဝ်ၵေႃႈ ဢမ်ႇႁဵတ်းသင်တီႈမၼ်းၸၢႆးၶႃႈ”- ၵူၼ်းမိူင်းယႆ သိုပ်ႇလၢတ်ႈၼႄၼင်ႇၼႆ။
ၵူၼ်းမိူင်း ၸိူဝ်းၼႄ ၵၢင်ၸႂ်ၼႆႉ ၵမ်ႈၽွင်ႈၺႃးတီႉသေတႃႉ ၵမ်ႈၼမ်တႄႉ တႅပ်းတတ်းဝႃႈ ပေႃးတေၵိုတ်း သေ ဢမ်ႇသိုပ်ႇၼႄ ၵၢင်ၸႂ်တေႃႇ ပေႃးပူၼ်းၸဝ်ႈဢႃႇၼႃႇသိုၵ်းမၢၼ်ႈ လႆႈ ၽဝ ၵူၼ်းမိူင်း ၵူႈႁေႃ ၵူႈႁိူၼ်း တေသိုပ်ႇ တူၵ်း တႂ်ႈ ဢႃႇသိုၵ်း၊ တေလႆႈတုၵ်ႉယၢၵ်ႈ မိူၼ် မိူဝ်ႈ ပၢၼ်ပေႃႈမႄႈ ပူႇမွၼ်ႇ ၼၢႆးယႃ ၺႃးပေႉၵိၼ်လူလၢႆမႃးလႄႈ ၵမ်ႈၼမ် တႅပ်းတတ်း ပုတ်းၶၢတ်ႇ ဝႆႉဝႃႈ တိုၼ်းတေ သိုပ်ႇၼႄၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ