ၽူႈၸတ်းၵၢၼ်ပၢႆးပၺ်ႇၺႃႇႁူင်းႁဵၼ်းၸၼ်ႉသုင် ငဝ်ႈၸိုင်ႈလွႆတႆးလႅင်း လႆႈႁပ်ႉသူး ၵူၼ်းၼုမ်ႇၽူႈဢွၼ်ႁူဝ် ၸဝ်ႈၼၢင်းသုၸၼ်ႇတီႇ Sao Thusandi Leadership Award တွၼ်ႈတႃႇ ပီ 2020 ။
ဝၼ်းတီႈ 8/2/2021 ယၢမ်းၵၢင်ဝၼ်း 12 မူင်း ၶွမ်ႊမတီႊမွပ်ႈယိုၼ်ႈသူး(ရၢင်းဝလ်း) ၸဝ်ႈသုၸၼ်ႇတီႇ ယုၵ်ႉယွင်ႈ မွပ်ႈယိုၼ်ႈ သူးရၢင်းဝလ်းၸဝ်ႈသုၸၼ်ႇတီႇ ထိုင် ၶူးၼၢင်းမူၺ်ၶိူဝ်း ၽူႈၸတ်းၵၢၼ်ပၢႆးပၺ်ႇၺႃႇ ႁူင်းႁဵၼ်းၸၼ်ႉသုင် (လွႆတႆးလႅင်း) လႄႈ ၵႅမ်ၽူႈၸတ်းၵၢၼ် 2 ၸုမ်းပွင်ၵၢၼ်ပၢႆးပၺ်ႇၺႃႇ Education Commission တီႈႁူင်းႁဵၼ်းၸၼ်ႉသုင် ႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း ။
ၽူႈမီးပုၼ်ႈၽွၼ်း ၶွမ်ႊမတီႊမွပ်ႈသူးရၢင်းဝလ်း ၸဝ်ႈသုၸၼ်ႇတီႇ လၢတ်ႈဝႃႈ – “ပီ 2020 ၼႆႉ ၽူႈလႆႈႁပ်ႉသူး ရၢင်းဝလ်း ၸဝ်ႈသုၸၼ်ႇတီႇ(ၸဝ်ႈမႄႈဢိင်းငႄး) ပဵၼ်ၼၢင်းမူၺ်ၶိူဝ်း။ ပၢင်ၵႅဝ်ႈ မွပ်ႈယိုၼ်ႈသူးရၢင်းဝလ်းၼႆႉတႄႉ ၸတ်းႁဵတ်းတီႈ ႁူင်း ႁဵၼ်းၸိူဝ်ႉ ၸၢတ်ႈ လွႆတႆးလႅင်း။ ယွၼ်ႉတၢင်းပဵၼ်ၶူဝ်ႊဝိတ်ႉ 19 လႄႈ မွၵ်ႇထိုင် ၼႂ်းပိုၼ်ႉတီႈငဝ်ႈၸိုင်ႈ လွႆတႆးလႅင်း ၼၼ်ႉ ၶဝ်ႈႁူမ်ႈၵူၺ်း”- ဝႃႈၼႆ။
ၼၢင်းမူၺ်ၶိူဝ်းၼႆႉ ပဵၼ်ၽူႈၸတ်းၵၢၼ်ပၢႆးပၺ်ႇၺႃႇႁူင်းႁဵၼ်းၸၼ်ႉသုင် လွႆတႆးလႅင်း။ ယၢမ်းလဵဝ် မၼ်းၼၢင်းလႆႈဢဝ် ပုၼ်ႈၽွၼ်းပဵၼ်ၵႅမ်ၽူႈၸတ်းၵၢၼ် 2 ၸုမ်းပွင်ၵၢၼ်ပၢႆးပၺ်ႇၺႃႇ Education Commission လိူဝ်ၼၼ်ႉ မၼ်းၼၢင်း ၸတ်းႁဵတ်းပၢင်သွၼ်ပူၵ်းပွင်ၼမ်ႉၵတ်ႉၶူးသွၼ်လႄႈ ၵူၼ်းၼုမ်ႇၼႂ်းမိူင်းတႆး၊ ၸွမ်းလႅၼ်လိၼ်တႆး – ထႆး လၢႆလၢႆတီႈ ဢိၵ်ႇပႃး ႁူမ်ႈႁဵတ်းဢွၵ်ႇပိူင်ၵၢၼ်သွၼ် လႄႈ ပပ်ႉႁဵၼ်းတွၼ်ႈတႃႇၸႂ်ႉတိုဝ်းၼႂ်းႁူင်းႁဵၼ်း။
ၼၢင်းမူၺ်ၶိူဝ်းၼႆႉ ပဵၼ်ၽူႈ ၶတ်းၸႂ် ႁႃၶိူင်ႈၵမ်ႉၵႅမ်ၵၢၼ်ႁဵၼ်း တွၼ်ႈတႃႇလုၵ်ႈႁဵၼ်းလႄႈမေႃသွၼ်၊ ႁူမ်ႈၵႄႈလိတ်ႈ တၢင်းယၢပ်ႇၽိုတ်ႇ လုၵ်ႈႁဵၼ်းလႄႈမေႃသွၼ် ၽွင်းၵၢပ်ႈတၢင်းပဵၼ် (COVID-19) ။ ၼၢင်းမူၺ်ၶိူဝ်းၼႆႉ ပဵၼ်ၽူႈမီး တၢင်းၶတ်းၸႂ် မီးတၢင်းယၢပ်ႇၽိုတ်ႇၸိူင်ႉႁိုဝ်မႃးၵေႃႈ ဢမ်ႇတွၼ်ႉႁူၼ်လင်၊ ႁပ်ႉပုၼ်ႈၽွၼ်းပဵၼ်ၶူးသွၼ်၊ ၶိုင်ပွင်ပၢႆးပၺ်ႇ ၺႃႇ ႁူင်းႁဵၼ်းၸိူဝ်ႉၸၢတ်ႈတႆး တႃႇႁႂ်ႈပေႉတူဝ်၊ ပူၵ်းပွင်ပၼ် လုၵ်ႈႁဵၼ်းတႃႇႁႂ်ႈပဵၼ်မႃးၽူႈဢွၼ်ႁူဝ်လီ၊ ၸွႆႈထႅမ်ၵၢၼ် တူင်ႇဝူင်း၊ ၸွႆႈထႅမ် ၵူၼ်းမိူင်း ၸိူဝ်းၺႃး ၸၢၵ်ႇသိုၵ်း ၸၢၵ်ႇသိူဝ် ဢၼ်သိုၵ်းမၢၼ်ႈလိုပ်ႈႁေႃႈ လႆႈပၢႆႈယၢၼ် ႁိူၼ်းယေး တီႈယူႇ၊ ၸွႆႈပူၵ်းပွင် ပၼ်တၢင်းႁူႉ တႃႇပဵၼ်ၵူၼ်းမိူင်းလီလႄႈမေႃႁၵ်ႉၸိူဝ်ႉၸၢတ်ႈ ၸိူဝ်းၼႆႉ။
ၼၢင်းမူၺ်ၶိူဝ်းၼႆႉ ၵိူတ်ႇတီႈဝဵင်းၵုၼ်ႁဵင် မိူင်းတႆးပွတ်းၸၢၼ်း။ မၼ်းၼၢင်း လႆႈႁပ်ႉၸုမ်ႈၶူး ၾၢႆႇၸတ်းၵၢၼ် ပၢႆးပၺ်ႇၺႃႇ (Master of Education in Education Administration) တီႈၸၼ်ႉၸွမ်ဢၼ်ၼိုင်ႈၼႂ်းမိူင်းထႆး (လဵပ်ႈႁဵၼ်းလႆႈၶေႃႈမုလ်း တီႈ ဝႅပ်ႊသၢႆႊ shan.saothusandiaward.com )။
သူးၸဝ်ႈၼၢင်းသုၸၼ်ႇတီႇ (Sao Thusandi Leadership Award) ပဵၼ်သူးဢၼ်ၸဝ်ႈ ဢိင်းငႄး သႃးၵျိၼ်း (Inge Sargent) ႁွင်ႉၸဝ်ႈၼၢင်းသုၸၼ်ႇတီႇ ၵေႃႉဢၼ်ယၢမ်ႈပဵၼ် ၸဝ်ႈၼၢင်းၶၢင်းႁူဝ် ၸဝ်ႈၾႃႉလူင် မိူင်းသီႇပေႃႉ၊ ၸဝ်ႈၾႃႉလူင် ၸဝ်ႈၵျႃႇသႅင် ၼၼ်ႉမွပ်ႈယိုၼ်ႈပၼ် ။ သူးၼႆႉပၼ်မႃး မိူဝ်ႈပီ 2008 ယုၵ်ႉယွင်ႈ မွပ်ႈယိုၼ်ႈ ၵူၼ်းၼုမ်ႇတႆး ၽူႈဢွၼ်ႁူဝ် တူင်ႉၼိုင် ၸွႆႈၵၢၼ်ပူၵ်းပွင် ႁႂ်ႈဝၢၼ်ႈမိူင်း ၵူၼ်းမိူင်း လႆႈလွင်ႈထၢင်ႇႁၢင်ႈ၊ တူင်ႉၼိုင်သုၼ်ႇလႆႈ တီႊမူဝ်ႊၶရေႊသီႊလႄႈ ပႅင်းမႅပ်ႇႁၵ်ႉသႃ သုၼ်ႇလႆႈ ၸိူဝ်ႉၸၢတ်ႈဝၢၼ်ႈမိူင်း ၸဝ်ႈၵဝ်ႇ။
ၽူႈလႆႈႁပ်ႉသူးရၢင်းဝလ်ႊၸဝ်ႈသုၸၼ်ႇတီႇ ၵေႃႉႁႅၵ်ႈ မိူဝ်ႈပီ 2008 ပဵၼ်ၸၢႆးၽူးမိူင်း၊ ပီ 2009 ၸၢႆးသႅင်ၽၼ်း၊ 2010 ၼၢင်းမွၼ်းၵဵင်၊ 2011 မေႃယႃ ၸၢႆးပေႇတႃႉ၊ 2012 ၸဝ်ႈၶူးသီႇရိ ဝတ်ႉၾႃႉဝဵင်းဢိၼ်း၊ 2013 ၸၢႆးသၢမ်ၾူၼ်သႅင်၊ 2014 မေႃယႃၼၢင်းလႃႈ၊ 2015 ၼၢင်းၼူၼ်းႁွမ်၊ 2016 ၸၢႆးသူႉ၊ 2017 ၸၢႆးသီၶိူဝ်း(သဵင်ႈ)၊ 2018 ၸၢႆးၵွၼ်းသႅင်လႄႈ 2019 သမ်ႉ ပဵၼ်ၸဝ်ႈၶူးမိင်ႇတၵ ၊ တွၼ်ႈတႃႇ ပီ 2020 တႄႉ ပဵၼ် ၶူးသွၼ်ၼၢင်းမူၺ်ၶိူဝ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ