ၸုမ်းယိပ်းၵွင်ႈၸုမ်းၼိုင်ႈပႂ်ႉၵဵပ်းၶွၼ်ႇၼိူဝ်သဵၼ်ႈတၢင်း လႃႈသဵဝ်ႈ-မူႇၸေႊ ၸဝ်ႈရူတ်ႉၸဝ်ႈၵႃးထူပ်းတၢင်းယၢပ်ႇၽိုတ်ႇ။
တင်ႈဢဝ်ဝၼ်းတီႈ 2/2/2021 ၼႆႉမႃး မီးၸုပ်းယိပ်းၵွင်ႈၸုမ်းၼိုင်ႈ ပႂ်ႉၵဵပ်းၶွၼ်ႇ ၼႂ်းၵႄႈဝၢၼ်ႈ တႃႈလူင် – ၼမ်ႉၽၵ်းၵႃ ၼိူဝ်သဵၼ်ႈတၢင်းလူင် လႃႈသဵဝ်ႈ – မူႇၸေႊ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ပႂ်ႉၵဵပ်းၶွၼ်ႇတီႈၸဝ်ႈရူတ်ႉၵႃးလူင်ၵႂႃႇမႃး 24 ၸူဝ်ႈမူင်း ဝႃႈၼႆ။
ၸဝ်ႈၵႃးလူင် ၵေႃႉၼိုင်ႈ ဢၼ်လႅၼ်ႈသၢႆလႃႈသဵဝ်ႈ-မူႇၸေႊ လၢတ်ႈဝႃႈ – “ ၺႃးၼႂ်းၵႄႈတႃႈလူင် – ၼမ်ႉၽၵ်းၵႃၶႃႈ။ ၶဝ်ဢဝ်ၵႃးဢွၼ်ႇပႂ်ႉဝႆႉဢေႃႈ။ သင်ဝႃႈၶဝ်ႁႄႉယဝ်ႉ ၵႃးလူင်ဢမ်ႇၵိုတ်းၼႆၶဝ်ဢဝ်ၵႃးဢွၼ်ႇလမ်းၸွမ်းဢေႃႈ။ ဝၢႆးသိုၵ်းမၢၼ်ႈ ယိုတ်းဢႃႇၼႃႇမိူင်းၼႆႉ ၶဝ်ပႂ်ႉၵဵပ်းၶွၼ်ႇ 24 ၸူဝ်ႈမူင်းၶႃႈဢေႃႈ။ ယၢပ်ႇၽိုတ်ႇတႃႇၸဝ်ႈၵႃး ႁဝ်းၶႃႈ ဢၼ်ၶဝ်ႁဵတ်းၸိူင်ႉၼႆ ႁဝ်းၶႃႈတႄႉ ဢမ်ႇႁၼ်လီၸွမ်းၶႃႈ၊ ပဵၼ်သိုၵ်းၶၢင်ၶႃႈဢေႃႈ”- ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတွင်ႈထၢမ်တီႈၸုမ်းသိုၵ်းၶၢင်ယူႇသေတႃႉ ၵပ်းသိုပ်ႇဢမ်ႇလႆႈလႄႈ ပဵၼ်သိုၵ်းၶၢင်ၸုမ်းလႂ်ၼႆ ဢမ်ႇၸၢင်ႈယိုၼ်ယၼ်လႆႈတႅတ်ႈတေႃး။
ၸုမ်းသိုၵ်းၼႆႉ ယွၼ်းငိုၼ်းတီႈၸဝ်ႈရူတ်ႉၵႃးလူင် ၼိုင်ႈလမ်း 4 – 5 သႅၼ်ထိုင် 10 သႅၼ်ပျႃး။
ၸဝ်ႈၵႃးလူင် သိုပ်ႇလၢတ်ႈဝႃႈ “မိူဝ်ႈၵူႈပွၵ်ႈၵူႈပီပူၼ်ႉမႃး ၶဝ်ၵဵပ်းၼိုင်ႈလိူၼ်မွၵ်ႈ ပွၵ်ႈ 2 ပွၵ်ႈ ။ ၵႃးလူင်လႆႈပၼ် 10 သႅၼ်ပျႃး။ ၼႂ်းပီ 2021 ၼႆႉမႃး လိူၼ်ၵျႅၼ်ႊၼိဝ်ႊရီႊ ဝၼ်းတီႈ 4 မႃးၼႆႉၶဝ်ပႂ်ႉၵဵပ်း ၵူႈဝၼ်း၊ ဝၢႆးလင်သိုၵ်းယိုတ်း ဢႃႇၼႃႇၼႆႉၶဝ်ပႂ်ႉ 24 ၸူဝ်ႈမူင်း။ ၵႃးဢွၼ်ႇ ၵႃးလူင် ႞ လမ်းၶဝ်ၵဵပ်း 4 သႅၼ် ထိုင် 5 သႅၼ်ပျႃးၸိူဝ်းၼႆႉဢေႃႈ ” – ဝႃႈၼႆ။
သဵၼ်ႈတၢင်းလူင်ဝဵင်းလိူဝ်ႇ – လႃႈသဵဝ်ႈ – မူႇၸေႊၼႆႉ ပဵၼ်သဵၼ်ႈတၢင်းၵၢၼ်ၵႃႉၶၢႆ ပၢႆးမၢၵ်ႈမီးလူင် ဢၼ်ၼိုင်ႈ တွၼ်ႈတႃႇ ၼႂ်းမိူင်းႁူမ်ႈတုမ်။ ပဵၼ်သဵၼ်ႈတၢင်းဢၼ်ၸုမ်းယိပ်းၵွင်ႈၵၢင်ႇပႂ်ႉၵဵပ်းၶွၼ်ႇၼမ်၊ ၸုမ်းပႂ်ႉယိုဝ်းရူတ်ႉၵႃး တၢင်ႇဝူဝ်းၵႂၢႆးၵေႃႈၼမ်။ ၵူၺ်းၵႃႈ ပဵၼ်ၽႂ် ၸုမ်းလႂ်ၼႆ လူင်ပွင်ၸိုင်ႈဢမ်ႇတွၼ်ႉတီႉၺွပ်းလႆႈသေပွၵ်ႈ။