သိုၵ်းမၢၼ်ႈ ယိုတ်းၸိုင်ႈမိူင်းမႃး ၶၢဝ်းတၢင်း 3 ဝၼ်း မိူဝ်ႈၼႆႉ Facebook ဢၼ်ၵူၼ်းမိူင်းၸႂ်ႉယူႇၼၼ်ႉ တႄႇၺႃးႁႅတ်ႉတတ်း လႄႈ ၵူၼ်းမိူင်း ၵမ်ႈၽွင်ႈ လိမ်ႇၸႂ်ႉ VPN ပဵၼ်ၼႅင်ႈလတ်းသေ သိုပ်ႇၸႂ်ႉ Facebook တင်း App Messenger ။
ဝၼ်းတီႈ 3/2/2021 ယူႇတီႈႁွင်ႈၵၢၼ်ၽွင်းလူင် ၾၢႆႇတိတ်းတေႃႇလႄႈ တေႃႉသူင်ႇ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇမႃး တႄႇ ဢဝ် ဝၼ်းတီႈ 4 တေႃႇထိုင် ဝၼ်းတီႈ 7 တႃႇၶၢဝ်းတၢင်း 4 ဝၼ်း တေပိၵ်ႉဢိုတ်းပႅတ်ႈ Facebook ဝႆႉ ၸူဝ်ႈၶၢဝ်း ၼႂ်းမိူင်း ႁူမ်ႈတုမ် ပတ်းပိုၼ်ႉ ၼင်ႇႁိုဝ် ပေႃးတေဢမ်ႇမီးလွင်ႈ သေႃႇသူၼ်းသုၵ်ႉယုင်ႈဢူၼ်ၵဝ်း လွင်ႈၼိမ်သဝ်းၼႂ်းဝၢၼ်ႈမိူင်း ၼႆ ယဝ်ႉ။
ၸၢႆးၸၢမ်ႇ ၵူၼ်းမိူင်းတႃႈၶီႈလဵၵ်း လၢတ်ႈဝႃႈ – “တီႈတႃႈၶီႈလဵၵ်းႁဝ်းၼႆႉ ၾဵတ်ႉပုၵ်ႉ ဢမ်ႇၸႂ်ႈလႆႈယဝ်ႉၶႃႈ တႄႇဢဝ် မိူဝ်ႈ ၼႆႉၵၢင်ၼႂ်မႃး သင်ဝႃႈ ပေႃးဢမ်ႇၸႂ်ႉ VPN ၵၼ်၊ ယၢပ်ႇၽိုတ်ႇတႃႇၵၢၼ်တိတ်းတေႃႇ ၵၼ်ၶႃႈဢေႃႈ”- ဝႃႈၼႆ။
ၵူၼ်းမိူင်းၵမ်ႈၼမ် ဢွၼ်ၵၼ် လူတ်ႇဢဝ် VPN သႂ်ႇၼႂ်းၾူၼ်း၊ သႂ်ႇၼႂ်းၶွမ်ႊပိဝ်ႊတိူဝ်ႊ ၽႂ်မၼ်းသေၸႂ်ႉၼမ်မႃး၊ ၶၢဝ်ႇဢမ်ႇယိုၼ်ယၼ် ယင်းဢွၵ်ႇမႃးဝႃႈ ၾၢႆႇသိုၵ်းယိုတ်းဢႃႇၼႃႇ ဝၢင်းၽႅၼ် ၶိုင်ယႃႉ VPN – Virtual Private Network ႁႂ်ႈလႆႈဝႃႈၼႆ။
