ၾၢႆႇမေႃယႃ တီႈႁူင်းယႃၸဝ်ႈၸၢမ်ႇထုၼ်း တင်း ႁူင်းယႃမႄႈလႄႈလုၵ်ႈဢွၼ်ႇ ၼႄၵၢင်ၸႂ် သၢၼ်ၶတ်း လွင်ႈသိုၵ်းမၢၼ်ႈ ႁုပ်ႈယိုတ်းဢၢမ်းၼၢတ်ႈ ဝၢၼ်ႈမိူင်း ဝႃႈၼႆ။
မိူဝ်ႈၼႆႉ ဝၼ်းတီႈ 3/2/2021 ယူႇတီႈၸုမ်းမေႃယႃ တီႈႁူင်းယႃလူင် ၸဝ်ႈၸၢမ်ႇထုၼ်း တင်း ႁူင်းယႃလူင် မႄႈလႄႈလုၵ်ႈ ဢွၼ်ႇ တီႈၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼႄၵၢင်ၸႂ်သၢၼ်ၶတ်း လွင်ႈသိုၵ်းမၢၼ်ႈ တဵၵ်းတဵင် ယိုတ်း ဢၢမ်းၼၢတ်း လူင်ပွင်ၸိုင်ႈမိူင်းႁူမ်ႈတုမ် ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ – “ဢိင်ၼိူဝ် လွင်ႈသိုၵ်းမၢၼ်ႈ ယိုတ်းဢႃႇၼႃႇ လူင်ပွင်ၸိုင်ႈ မိူဝ်ႈဝၼ်းတီႈ 1/2/2021 ပူၼ်ႉမႃးၼၼ်ႉသေ ယူႇတီႈ ၸုမ်းမေႃယႃတီႈႁူင်းယႃ ၸဝ်ႈၸၢမ်ႇထုၼ်းတင်း ႁူင်းယႃႈမႄႈလႄႈ လုၵ်ႈဢွၼ်ႇ ဢမ်ႇသိုပ်ႇ ႁပ်ႉပုၼ်ႈၽွၼ်းႁဵတ်းၵၢၼ်ၵႂႃႇ တႂ်ႈဢမ်းၼၢတ်ႈသိုၵ်း။ ယွၼ်ႉၼၼ်ႉ မိူဝ်ႈၼႆႉ ယူႇတီႈၸုမ်းမေႃယႃ တေ ၼႄၵၢင်ၸႂ် သၢၼ်ၶတ်းၵႂႃႇလူၺ်ႈလၢႆးၵတ်းယဵၼ်”- ဝႃႈၼႆ။
ၽူႈႁၢပ်ႇၵၢၼ်ပၢႆးယူႇလီၸိူဝ်းယူႇဝဵင်းယႂ်ႇဝဵင်းလူင်ၵူႈဝဵင်းပတ်းပိုၼ်ႉမိူင်းႁူမ်ႈတုမ် ပႃးၸဵမ် တႃႈၵုင်ႈ၊ ဝဵင်းလိူဝ်ႇ ၵေႃႈ ဢွၵ်ႇၼႄၵၢင်ၸႂ် လူၺ်ႈလၢႆးၵတ်းယဵၼ်၊ သၢၼ်ၶတ်းလွင်ႈသိုၵ်းမၢၼ်ႈယိုတ်း ဢၢမ်းၼၢတ်ႈ ၼႆယဝ်ႉ။
မေႃယႃတီႈႁူင်းယႃၼႂ်းၸႄႈတွၼ်ႈလွႆလႅမ်ၵေႃႈၼိုင်ႈလၢတ်ႈဝႃႈ – “မေႃယႃလူင်ၶဝ်တႄႉၵႃႈတေလႆႈပႂ်ႉတူၺ်းၵူၼ်းပဵၼ်ဢၼ်ပဵၼ်ၵိၼ်းမၼ်းယူႇဢေႃႈ။ ၸိူဝ်းပဵၼ်မေႃယႃဢွၼ်ႇၶဝ်တႄႉ တိုၼ်းဝႃႈဢမ်ႇလူင်းၵၢၼ်ယဝ်ႉၶႃႈ။ ႁဝ်းၶႃႈ ၼေၵၢင်ၸႂ်လွင်ႈဝႃႈဢမ်ႇႁပ်ႉလႆႈလွင်ႈသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်း ”- ဝႃႈၼႆ။
ဝၼ်းတီႈ 1/2/2021 ၼၼ်ႉ ယူႇတီႈသိုၵ်းမၢၼ်ႈ ယိုတ်းဢၢမ်းၼၢတ်ႈ လူင်ပွင်ၸိုင်ႈမိူင်းႁူမ်ႈတုမ်မႃး ယၢမ်းလဵဝ် ယူႇတီႈသိုၵ်းမၢၼ်ႈ ၵုမ်းယိပ်းဢၢမ်းၼၢတ်ႈဝၢၼ်ႈမိူင်းၵႂႃႇ တႃႇၶၢဝ်းတၢင်း 1 ပီ ၼႆယဝ်ႉ။
