ၽူႈတႅၼ်းသၽႃး ၸိူဝ်းဢွင်ႇပေႉပၢင်လိူၵ်ႈတင်ႈ ပီ 2020 ပူၼ်ႉမႃးၼၼ်ႉ ယူႇတီႈႁူဝ်ပဝ်ႈ သၽႃးၸႄႈမိူင်းတႆး ႁွင်ႉ ၶိုၼ်ႈပၢင်ၵုမ် ပွၵ်ႈၵမ်းႁႅၵ်ႈ ၼႂ်းႁူဝ်လိူၼ်ၼႃႈ တေထိုင်ၼႆႉ ဝႃႈၼႆ။
ဝၼ်းတီႈ 17/1/2021 ယူႇတီႈၸၢႆးလူင်းသႅင် ႁူဝ်ပဝ်ႈသၽႃး ၸႄႈမိူင်းတႆး လူင်းလၢႆးမိုဝ်း ပိုၼ်ၽၢဝ်ႇ ႁွင်ႉပၢင်ၵုမ်ၽူႈ တႅၼ်းသၽႃးၸႄႈမိူင်းတႆး ၸုပ်ႈ 3 ပွၵ်ႈၵမ်းႁႅၵ်ႈ တီႈလုမ်းသၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်း ၸၢၼ်း ၽူႈတႅၼ်းသၽႃးၸႄႈမိူင်းတႆး ၶဵတ်ႇလိူၵ်ႈတင်ႈမၢႆ 1 တင်း မၢႆ 2 ၸိူဝ်းဢွင်ႇပေႉပၢင်လိူၵ်ႈတင်ႈ ပီ 2020 ပူၼ်ႉ မႃးၼႆႉ။
ၼၢင်းဢိမုၼ်ႇဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈဝႃႈ – “ၸႂ်ႈၶႃႈဢေႃႈ ပၢင်ၵုမ်သၽႃးၸႄႈမိူင်းတႆးတႄႉ တေတႄႇၼႂ်းလိူၼ်ၼႃႈတေထိုင်ၼႆႉ။ လိၵ်ႈၽိတ်ႈမွၵ်ႇၶဝ်ႈႁူမ်ႈပၢင်ၵုမ်သၽႃးတႄႉ ပႆႇၽႅဝ်မႃးတီႈႁဝ်းၶႃႈ။ ၵူၺ်းၵႃႈ လႆႈႁၼ် ၶဝ်တၢင်ႇၼိူဝ်ၽဵတ်ႉပုၵ်ႉဝႆႉ ၼၼ်ႉၵူၺ်း။ ယူႇတီႈႁဝ်းၶႃႈသေ တေလႆႈၶဝ်ႈ ႁူမ်ႈပၢင်ၵုမ်ၼႆႉ ပဵၼ်ဢၼ်ၸူမ်းသိူဝ်းဝႆႉၶႃႈဢေႃႈ။ ဢၼ်ႁဝ်းၶႃႈ ယူႇတၢင်းၼွၵ်ႈသေႁဵတ်းၵၢၼ်ၼႆႉ မၼ်းတေဢမ်ႇပေႃး တိူဝ်ႉ မိူၼ်ၼင်ႇႁဝ်းၶႃႈ ၵႂႃႇယူႇၼႂ်းသၽႃးသေႁဵတ်းသၢင်ႈ လၢတ်ႈဢုပ်ႇပၼ်တွၼ်ႈတႃႇၵူၼ်းမိူင်းႁဝ်းၶႃႈ”- ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ႁွင်ႈပၢင်ၵုမ်သၽႃးပွၵ်ႈၵမ်းႁႅၵ်ႈၼႆႉ တေပဵၼ်ဝၼ်းတီႈ 8/2/2021 ယၢမ်းၵၢင်ၼႂ် 10 မူင်း တီႈလုမ်း သၽႃးၸႄႈမိူင်းတႆး ၼႆယဝ်ႉ။
ပၢင်ၵုမ်ပွၵ်ႈၵမ်းႁႅၵ်ႈ တေထိုင်ၼႆႉ တေမီးၵၢၼ်လိူၵ်ႈႁူဝ်ပဝ်ႈလႄႈ ၵႅမ်ႁူဝ်ပဝ်ႈ သၽႃးၸႄႈမိူင်းတႆး တႃႇလူင်ပွင်ၸိုင်ႈ ၸုပ်ႈမႂ်ႇ ၼႂ်းပီ 2021-2025။
ပၢင်ၵုမ်သၽႃးၸႄႈမိူင်းတႆး ၸုပ်ႈ 3 တေမႃးၼႆႉ ၽူႈတႅၼ်းသၽႃး ဢၼ်တေလႆႈၶဝ်ႈႁူမ်ႈ ပႃႇတီႇၼူၵ်ႉ ယုင်း 29 ၵေႃႉ၊ ႁူဝ်သိူဝ် 26 ၵေႃႉ၊ သၢင်ႇသီႈ 24 ၵေႃႉ၊ တဢၢင်း 7 ၵေႃႉ၊ ပဢူဝ်း 7 ၵေႃႉ၊ ဝႃႉ 2 ၵေႃႉ၊ လႃးႁူႇ 1 ၵေႃႉ၊ သိူဝ်ၽိူၵ်ႇ 1 ၵေႃႉ လႄႈ သုၼ်ႇတူဝ်/သုၼ်ႇလဵဝ် 1 ၵေႃႉ။ ၸွမ်းၼင်ႇ ပိူင်ပိုင်းလၵ်းမိူင်း 2008 သေ ဢၼ်ဢမ်ႇ လႆႈလိူၵ်ႈတင်ႈ တူဝ်တႅၼ်း သိုၵ်းမၢၼ်ႈသမ်ႉတေမႃးၶိုၼ်ႈလုမ်းသၽႃးၸွမ်း 35 ၵေႃႉ (3 ပုၼ်ႈ ႞ ပုၼ်ႈ ဢၼ် ၵူၼ်းမိူင်းလိူၵ်ႈတင်ႈ) တင်းမူတ်းမီး 140 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ