ပၢင်ၼုင်ႈသၢင်ႇမႂ်ႇ ၽွင်းၶၢဝ်းၵတ်း ပွၵ်ႈၵမ်းႁႅၵ်ႈ တီႈဝဵင်းၶူဝ်လမ်

ပၢင်ၼုင်ႈသၢင်ႇမႂ်ႇ ၽွင်းၶၢဝ်းၵတ်း တီႈဝတ်ႉႁူမ်ႈယဵၼ်လွႆၸၢၵ်ႈတေႃႇ ၼွင်ၽႃ ဝဵင်းၶူဝ်လမ် ၸတ်းႁဵတ်းပဵၼ်ပွၵ်ႈၵမ်းႁႅၵ်ႈ တင်းမူတ်းမီးသင်ၶၸဝ်ႈ 100 ပၢႆ။

တႄႇဢဝ် ဝၼ်းတီႈ 12/12/2020 တေႃႇထိုင်ဝၼ်းတီႈ 12/1/2021 တီႈဝတ်ႉႁူမ်ႈ ယဵၼ် လွႆၸၢၵ်ႈတေႃႇ ၼွင်ၽႃ ဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸတ်းႁဵတ်းပၢင်ၼုင်ႈသၢင်ႇမႂ်ႇ တႄႇဢဝ် ဢႃယု 10 ၶူပ်ႇ ထိုင် 15 ပီ တႃႇၶၢဝ်းတၢင်း ၼိုင်ႈလိူၼ် ၼႂ်းၽွင်းၶၢဝ်းၵတ်းၼႆႉ။

ၸဝ်ႈၶူး သီႇရိထမ်ႇမ ဝဵင်းဢိၼ်း ၸဝ်ႈၵွၼ်းဝတ်ႉႁူမ်ႈယဵၼ် လွႆၸၢၵ်ႈတေႃႇ ၼွင်ၽႃ လၢတ်ႈဝႃႈ – “ယိူင်းဢၢၼ်း ဢၼ်လႆႈ ၸတ်းႁဵတ်းၶူင်းၵၢၼ်ၼုင်ႈသၢင်ႇမႂ်ႇ ၽွင်းၶၢဝ်းၵတ်းၼႆႉ ၸူဝ်ႈလုၵ်ႈ ဢွၼ်ႇပႆႇၵႂႃႇၶိုၼ်ႈႁူင်းႁဵၼ်းလူင်ပွင်ၸိုင်ႈၼၼ်ႉ ဢဝ်တိုဝ်ႉ တၢင်းဢၼ်ၼႆႉသေ ၼင်ႇႁိုဝ် လုၵ်ႈ ဢွၼ်ႇၸိူဝ်းၼႆႉ ပေႃးတေမေႃလိၵ်ႈတႆးႁဝ်း ယဝ်ႉၵေႃႈ ႁႂ်ႈပေႃးၸမ်ၸႂ်တၢင်းသႃသၼႃသေ မႃးယူႇၽိုတ်းတူဝ်/ၸႂ်ၵၼ် ႁႂ်ႈပေႃး မီးလွင်ႈယဵၼ်ႇငႄႈလၵ်းလႅမ် ႁူႉၾိင်ႈထုင်း လိၵ်ႈလၢႆးႁဝ်းၼၼ်ႉယဝ်ႉ”- ဝႃႈ ၼႆ။

ၶူင်းၵၢၼ်ၼုင်ႈၶၢမ်ႇသၢင်ႇမႂ်ႇ ၶၢဝ်းၵတ်း ပွၵ်ႈၵမ်းႁႅၵ်ႈၼႆႉ ႁပ်ႉဢဝ်ဢွၼ်ႇၸၢႆး ဢႃယု 10 ၶူပ်ႇ ထိုင် 15 ပီ လွၼ်ႉလွၼ်ႉ။ လိူဝ်ၼၼ်ႉ သင်ဝႃႈ ၶူင်းၵၢၼ်ၼႆႉယဝ်ႉ တေသိုပ်ႇ ႁပ်ႉ ဢွၼ်ႇယိင်း ဢႃယု 10 ၶူပ်ႇထိုင် 15 ပီၵႂႃႇ ၼႆယဝ်ႉ။

“သင်ဝႃႈ ၸုပ်ႈဢွၼ်ႇၸၢႆးၼႆႉယဝ်ႉၵႂႃႇၸိုင် တေသိုပ်ႇႁပ်ႉဢွၼ်ႇယိင်းၵႂႃႇ တေၸတ်းႁဵတ်းပၢင်ၾိုၵ်းၽွၼ်ႉ ပဵၼ်ၸုပ်ႈ ပဵၼ်ၸုပ်ႈၵႂႃႇ ၸူဝ်ႈပႆႇၶိုၼ်ႈႁူင်းႁဵၼ်း လူင်ပွင်ၸိုင်ႈၼႆႉ။ ႁၼ်ထိုင်ဝႃႈ ၼႂ်းမိူင်းတႆးၼႆႉ ပၢင်တြႃး ၵူၼ်းလူင်/ ထဝ်ႈၼႆႉ ၼမ်ၼႃႇယဝ်ႉ။ ပၢင်တြႃးၵူၼ်းၼုမ်ႇ ဢၼ်မႃးၾိုၵ်းၽွၼ်ႉၵၼ်ၸိူင်ႉၼႆ မိူၼ်မိူင်းထႆးၼၼ်ႉ ပႆႇမီးလႄႈ ႁဝ်းၸဝ်ႈ သူၼ်ၸႂ်ပႃးၸႂ်သေ ၸတ်းႁဵတ်းမႃး ယဝ်ႉၵေႃႈ တေဢၢၼ်းၸတ်းႁဵတ်းၶူင်းၵၢၼ်ၼႆႉၵႂႃႇၵူႈလိူၼ် ”- ၸဝ်ႈၶူး သီႇရိထမ်ႇမ ဝဵင်းဢိၼ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝတ်ႉႁူမ်ႈယဵၼ် လွႆၸၢၵ်ႈတေႃႇ ၼွင်ၽႃၼႆႉ သဵၼ်ႈမၢႆသင်ၶၼႂ်းဝတ်ႉ မိူၼ်ၼင်ႇ ၸဝ်ႈရႁၢၼ်း 17 တူၼ်၊ ၸဝ်ႈသၢင်ႇ 123 တူၼ်၊ ၸဝ်ႈၶၢဝ် 18 တူၼ်၊ လုၵ်ႈႁဵၼ်း 6 ၵေႃႉလႄႈ ၵူၼ်းႁုင်မိုဝ်ႉ 5 ၵေႃႉ ႁူမ်ႈၵၼ်တင်းမူတ်းမီး 169 တူၼ်/ ၵေႃႉ ၼႆယဝ်ႉ။